​ ​ Yeni tədris ili başlanandan indiyə kimi Gəncə şəhərindəki Mircəlal Paşayev adına 39 saylı tam orta məktəbdə yaşananlar, daha çox isə, adı çəkilən bu təhsil ocağına rəhbərlik edən Nizami Rzayevin həyata keçirdiyi “müstəbeh idarəçilik” haqda digər məlumatları eşitdikcə, sanki şoka deyil, birbaşa “şökə” düşməli oluruq.

Buna səbəb, məhz bu şəxsin idarəçiliyini öz düşüncə tərzinə uyğun həyata keçirməsidir. Belə ki, dolaşan söz-söhbətlərə görə Rzayev soyadını daşıyan və təqribən doqquz ilə yaxın müddət ərzində yazıçı, ədəbiyyatşünas, filologiya elmləri doktoru, professor, 1934-cü ildən​ Azərbaycan Yazıçılar Birliyinin​ üzvü, Azərbaycan SSR əməkdar elm xadimi,​ Azərbaycan SSR Lenin komsomolu mükafatı​ laureatı​ adlarını daşıyan Mircəlal Paşayevin də çalışdığı 39 saylı tam orta məktəbə rəhbərlik edən Nizami müəllim, hal-hazırda da “xariqələr yaratmaq”la məşğul olur. Məsələn, söylənilənlərə görə o, məktəbin ştat cədvəlində texniki işçi vəzifəsini daşıyan şəxsləri də sinif rəhbəri təyin edir. Yəni, müəyyən iddialara görə Nizami Rzayev hər kəsi, o cümlədən​ məktəbin laborantını, kitabxanaçısını və digər texniki işçilərini də 200 manat​ pulun müqabilində sinif rəhbəri təyin edir. Müəyyən hesablamalara görə o, deyəsən belə bir gedişlə gələcəkdə​ xadimələri də sinif rəhbəri təyin edəcək. Düşündürücü hal odur ki, mövcud qanunvericiliyin tələbinə görə təhsil müəssisələrində texniki işçi vəzifəsində çalışan şəxs və ya şəxslər heç zaman sinif rəhbəri təyin oluna bilməzlər. O halın varlığını da unutmaq olmaz ki, Nizami Rzayev laborantı, kitabxanaçını və s. sinif rəhbəri vəzifəsinə təyin etsə də, əslində sənədləşmə işlərində həmin vəzifəyə digər şəxslərin adları rəsmiləşdirilir. Belə bir səbəb üzündəndir ki, o, orda-burda danışır ki, mənim bu yöndə atdığım addımları bir kimsə sübuta yetirə blməz.

​ ​ ​ ​ Xüsusi qeyd olunası hallardan biri də, bu gün 39 saylı tam orta məktəbin M.C. Paşayevin adını daşımasına baxmayaraq, hal-hazırda tam əksəriyyətin Nizami Rzayevin bu təhsil ocağına rəhbərlik etməsini usandırıcı hal hesab etmələridir. Çünki əldə etdiyimiz bəzi məlumatlara görə, vaxtilə bu təhsil ocağına çox böyük hörmət-izzət sahibi olan müdrik şəxslər rəhbərlik etmişlər və 39 saylı tam orta məktəb, məhz onların sayəsində nüfuzlu təhsil ocaqlarından birinə çevrilmişdir. Hal-hazırda isə, Nizami Rzayevin rəhbərlik etdiyi bu təhsil müəssisəsində fərqli bir ab-hava hökm sürməkdədir. Məsələn, müəyyən iddialara görə uzun illər ərzində adı çəkilən bu təhsil müəssisəsində çalışan və olduqca nüfuz sahibi olan bəzi müəllimləri direktor öz davranışı və yarıtmaz idarəçiliyi ilə bezdirir. Yayılan söz-söhbətlərə görə, Nizami Rzayev çox zaman nüfuz sahibi olan bəzi müəllimlərə “Sən iclasda yatırsan” deməkdən də ehtiyat etmir. Bundan əlavə, pensiyaya çıxmaq üçün yaş həddi çatan elə nüfuzlu müəllim var ki, direktor onların yaş həddinin tamam olmasını səbirsizliklə gözləyir. Elə ki,​ həmin müəllimlərin yaş həddi tamam olur, o halda Nizami Rzayev həmin müəllimin evinə zəng edib “Gəl ərizəni yaz da işdən çıx” deyir. Hansı ki, həmin şəxslərin Mircəlal Paşayev adına 39 saylı tam orta məktəbdə lazımi qədər zəhmətləri olmuşdur. Əslində bu təhsil müəssisəsinə rəhbərlik edən şəxs onları gül dəsti ilə yola salmalı və barələrində xoş fikirlər səsləndirməli olduğu halda, Nizami Rzayev isə atdığı addımları ilə fərqli yanaşmasını ortaya qoyur. Unutmaq olmaz ki, vaxtilə M.C.Paşayevin özü də bu məktəbdə çalışmış və məktəbin nüfuzlu təhsil ocağına çevrilməsində xüsusi rol oynamışdır.

​ ​ ​ Bütün bunlara baxmayaraq, bu gün Nizami Rzayevin öz ətrafında ayrı-ayrı qruplar yaratdığı da söylənilir. Belə ki, əldə etdiyimiz bəzi məlumatlara görə o, daha çox cavanları öz ətrafına toplayır və onların da əsas işi-peşəsi, məhz bir ünvandan digər ünvana “söz daşımaq” olur. Diqqəti cəlb edən hallardan biri də, 39 saylı tam orta məktəbdə (məktəb davamlı fəaliyyət göstərən zamanlarda) ibtidai siniflərə və yuxarı sinif şagirdlərinə xidmət göstərən iki bufetin fəaliyyət göstərməsi və həmin bufetlərdə direktorun istədiyi ərzaq məhsullarını satdırması olur. Elə ki, ayın sonu çatır, o halda Nizami Rzayev hər bufeti işlədən şəxsdən müəyyən etdiyi “haqq-hesab”ı tələb edir.​

​ ​ ​ ​ İddialara görə Anar Qədimalıyevin xeyli bundan öncə Gəncə şəhər təhsil idarəsinə rəis təyin olunması, məhz Nizami Rzayevin “əl-qolu”nun bağlanması ilə nəticələnib. Belə ki, ŞTŞ-i rəisinin verdiyi tapşırıqdan sonra, 39 saylı tam orta məktəbin direktoru dərs saatlarını müəllimlərə pulla satmaqdan “vaz keçdi”.​Buna görə də, kollektiv üzvlərinin bu gün də Anar Qədimalıyevə təşəkkür etdikləri söylənilir.

​ ​ Başqa bir məqamı da qeyd edək ki, Nizami Rzayevin həyata keçirdiyi idarəçiliyin mahiyyəti ilə bağlı indiyə kimi bəzi media qurumlarında tənqidi yazılar dərc olunub. Adı çəkilən bu şəxs məqalələrdə sadalanan faktlardan hansısa nəticəni çıxartmaq, problemləri aradan qaldırmaq və s. əvəzinə, hələlik adının çəkilməsini istəmədiyimiz müəllimin “üstünə hücum çəkməyi” vəziyyətdən çıxış yolu hesab edir. Yəni, əldə etdiyimiz məlumatlara görə 39 saylı tam orta məktəbə rəhbərlik edən bu şəxsin atdığı addımlar, bu gün ailədaxili münaqişənin baş verməsinə də səbəb olmaqdadır. Qarşı tərəfin də mövqeyini dinləyə bilərik.

Bu yöndə araşdırmamız davam edəcək.

GundemXeber.Az