Bugünlərdə GundemXeber.Az saytının elektron poçtuna Ucar rayonu, Qarabörk kənd sakini Əliyev Allahverdi Tarif oğlu tərəfindən şikayət ərizəsi daxil olub.

Şikayətçi Allahverdi Əliyev yazır ki, “Mən Qarabörk kənd tam orta məktəbində təsərrüfat müdiri vəzifəsində çalışıram və bu vəzifədə işlədiyim ötən 12 il müddətində heç bir ciddi nöqsana yol verməmişəm. Buna baxmayaraq,  məktəbin direktoru Aysel Həmidova məndən istədiyi pulu ona verə bilmədiyim üçün, bu gün o, məni işdən çıxardacağı ilə hədələyir. Qeyd edim ki, 15 sentyabr  2020-ci il tarixdə Qarabörk kənd tam orta  məktəbinə  direktor  təyin olunan  Aysel Həmidova, vəzifəsinin icraasına başladığı ilk günlərdən   məktəbi  biznes  sahəsinə  çevirməyə başladı. Yəni, o, rəhbərlik etdiyi bu təhsil müəssisəsində təhsili inkişaf etdirmək, bu sahəyə aid problemləri aradan qaldırmaq və s. kimi işlərlə deyil, yalnız  pul  toplamaqla  məşğul olmağa başladı. Belə ki, o, bu gün də daşıdığı vəzifəsinin imkanlarından  sui-istifadə  edir, iş rejimini və onun qaydalarını, bir sözlə əmək intizamının tələblərini pozmaqda davam edir. Aysel xanım  ilin  əvvəlində dərs bölgüsü  zamanı  müəllimlərin  adına  dərs, dərnək, məşğələ və s. düzüb-qoşur  və bu yolla əldə olunan pulların  hər  ay  ona  verilməsini tələb edir. O, məktəbdə çalışan hər kəsə bir günlük icazə verirsə, həmin şəxsdən icazəyə görə 15-20  manat pul alır.  Bəzi  texniki  işçilərin  işə  davamiyyətinə  göz yumur və bunun qarşılığında  onlardan da  pul  alır. Direktor  Aysel Həmidova hər  ay  “Fond  pulu”  adı altında  müəllimlərdən  15-20  manatdan  pul  yığır ki, bu da ayda təqribən 1200 manat pul edir. O, bu ad altında pulları yığarkən “Fonda yığılan pullardan məktəbə aid xərclər ödəniləcək” deyir. Ancaq ötən 1 il 6 ay ərzində fonda yığılan pullardan cəmi bir ədəd, hansı ki, qiyməti 250 manat olan hidrofon alınıb. Hidrafona görə 125 manat pul fonda yığılan pullardan ödənilsə də, 125 manatı isə, hələ də mağazaya ödənilməyib. Aysel Həmidova hansı müəllim xəstəliyə görə bulletendə  olursa, həmin müəllimin dərs saatlarını digər əvəzləyici müəllimə həvalə edir və bu yolla da  əldə olunan pullları  mənimsəyir. Faktdır ki, direktor rəhbərlik etdiyi təhsil müəssisəsində sağlam mühit yarada bilmir və bu şəxsin əsas hədəfi, yalnız və yalnız öz cibini və xeyrini güdməsi olur. O, bütün müəllimləri və texniki işçiləri təzyiq altında saxlayır. Ona görə də, hal-hazırda Qarabörk kənd tam orta məktəbində  kütləvi  narazılıq hissi  hökm  sürməkdədir. Aysel Həmidovanın  məktəbin  hansı qaydalarla  idarə  olunmasından, müasir  təlim-tədris  texnologiyalarından heç bir xəbəri  yoxdur. Bir sözlə, onun  İKT yöndə bilikləri sıfır  səviyyəsindədir. Aysel xanım sadə yazı nümunələrini  yazmağı bacarmır, məktəbdə  kargüzarlıq  və  sənədləşmə  işləri biabırçı  vəziyyətdədir. Direktor  məktəbdə dırnaqarası “ştat” formalaşdırıb və  kimlərisə işə düzəltmək adı altında Qarabörk kənd sakinlərinin bir neçəsindən  pul alıb.  Məsələn, məktəbin bufetini işlədən Kifayət adlı kənd sakinini məktəbdə texniki işçi kimi işə götürəcəyi adı ilə ondan 2500 manat pul alıb.  Bu gün də Kifayəti nə işə götürə bilib, nə də ki, ondan aldığı pulları geri qaytarmayıb. Məktəbin ştat cədvəlində adı musiqi müəllimi kimi gedən şəxs bir gün də işə gəlməyib. Buna baxmayaraq, onun alacağı əmək haqqını hər ay Aysel Həmidova mənimsəyir.

     Direktor elə bir əməl və düşüncə sahibidir ki, o, şəhid məzarına əklil qoyulması məqsədilə  müəllimlərdən 150 manat pul toplayır və bu məbləğ puldan şəhid məzarına cəmi  20 manat dəyərində əklil qoydurur. Əslində bu cür addımın atılması rəzalətdir, utancdır, şəhid adına, şəhid ruhuna ən böyük hörmətsizlikdir. Ölkəmizdə seçkilər keçirilərkən hər yerdə olduğu kimi Qarabörk kənd tam orta məktəbində də səsvermə məntəqəsi yaradılır. Bu məqsədlə səsvermə məntəqəsinə alınmış 700 manat dəyərində yeni elektrik genratorunu və bir neçə ədəd oturaq stolunu direktor evinə aparır və evindəki köhnələri səsvermə məntəqəsinə gətirir. Bir faktı da qeyd edim ki, Babayev Zahir və onun həyat yoldaşı Babayeva Limuzər növbəlilik əsasında məktəbdə qarovulçu işləsələr də, bu şəxslər də heç zaman işə gəlmirlər.  Faktdır ki, məktəb 26 ədəd müşahidə kameraları vasitəsilə qorunur. Əgər hansı şəxsin işə gəlib-gəlmədiyini dəqiqləşdirməyə ehtiyac duyularsa, o halda müşahidə kameralarını açıb baxmaq kifayət edər. Aysel Həmidova əslən Goranboy rayonundan olsa da, o, Ucar rayonunun Qazyan kəndində ailə həyatı qurub. Direktor hər yerdə özünü hər kəsə təhsil naziri cənab Emin Əmrullayevin yaxın qohumu kimi təqdim edib, istənilən formada korrupsiya əməlləri ilə məşğul olmaqda davam edir.

   Faktdır ki, hal-hazırda Qarabörk kənd  tam orta məktəbində analoqu olmayan rəzalət yaşanmaqdadır və direktor bu təhsil ocağını biznes sahəsinə çevirməklə, sanki düşündüyü hər cür addımını atır.  Elə ki, bir kimsə bu və digər məsələlərlə bağlı ona irad bildirir, o halda o,  “Bu mənim işimdir, özüm bilərəm” deyir. Bir xatırlamanı yada salaq ki, iki mərtəbədən,  üç korpusdan və 420 şagird yerlik Qarabörk kənd tam orta məktəbi 15 sentyabr 2020-ci il tarixdə Heydər Əliyev Fondunun maliyyə dəstəyi sayəsində inşa olunaraq istifadəyə verilmişdir. Söz yox ki, Fondun prezidenti çox hörmətli Mehriban xanım Əliyevanın bu yöndə addımı, bu gün də Qarabörk kənd sakinləri tərəfindən alqışlanmaqdadır. Təəssüflər olsun ki, belə bir təhsil müəssisəsinə feodal təfəkkürlü, hansı ki, korrupsioner adı ilə tanınan bir şəxs rəhbərlik edir. Mən mətbuat vasitəsi ilə təhsil naziri cənab Emin Əmrullayevdən və hüquq-mühafizə orqanlarından xahiş edirəm ki, Ucar rayonu, Qarabörk kənd tam orta məktəbində direktor vəzifəsini daşıyan Aysel Həmidovanın əmlləri ilə bağlı hərtərəfli, obyektiv araşdırmalar aparılsın və barəsində qanuni əsaslarla tədbirlər görülsün”.

 Hörmətli oxucular! Bu yazı  Ucar rayonu, Qarabörk kənd sakini Əliyev Allahverdi Tarif oğlu tərəfindən GundemXeber.az saytının elektron poçtuna göndərilmiş şikayət ərizəsi əsasında hazırlanıb. Yazıda qeyd olunan faktlarla bağlı qarşı tərəfin də mövqeyini dinləməyə və yayımlamağa hazırıq.    

GundemXeber.Az