Azərbaycan Respublikası Ali Məhkəməsinin Mülki Kollegiyasına Sumqayıt şəhəri,42-ci məhəllə, ev-7, mənzil-45 ünvanda qeydiyyatda olan və yaşayan Abdullayev Kamil Xaliq oğlu tərəfindən kassasiya şikayəti verilib. Buna səbəb, 08 dekabr 2012-ci il tarixdə adı çəkilən bu şəxslə “Unibank” KB ASC arasında bağlanmış zaminlik müqaviləsinin şərtlərinə Kamil Abdullayev vaxtlı-vaxtında əməl etsə də, bank tərəfinin yaratdığı problem bu gün də məhkəmə müstəvilərində araşdırılmaqdadır. Belə ki, “Unibank” KB ASC ilə Kamil Abdullayev arasında bağlanmış 37/12SU saylı zaminlik müqaviləsinin 1.2 bəndinə uyğun olaraq, müştəri  Abdullayev  Elgün Kamil oğlu bankdan götürdüyü 45000 (qırx beş min) manat əvəzinə, tam olaraq “Unibank” KB ASC-yə 73309,62 (yetmiş üç min üç yüz doqquz manat, altımış iki qəpik) manat həmin günün məzənnəsi ilə 93437,54 (doxsan üç min dörd yüz otuz yeddi dollar, əlli dörd sent) ABŞ dolları həcmində kredit borcunu ödəyir. Qeyd olunan ödənişləri sübuta yetirən və “Unibank” KB ASC-nin Sumqayıt filialı tərəfindən təsdiq edilmiş ödəniş qəbzləri, bugünə kimi keçirilən məhkəmələrdə iş materialına əlavə olunmuşdur. Lakin keçirilən məhkəmələrdə bu hallar qimətləndirməmiş, edilmiş ödənişlərə heç bir halda nəzər salınmamış, iş materiallarına əlavə edilmiş “Unibank” ASC tərəfindən təsdiq edilmiş ödəniş qəbzlərinə məhəl qoyulmamışdır. Bu da onu sübut edir ki, işə baxan hakimlər verilmiş sifarişllər əsasında tamamilə qeyri-qanuni və əsassız qətnamələr çıxarmışlar. Həmçinin Kamil Abdullayev ilə “Unibank” KB ASC arasında bağlanmış zaminlik müqaviləsinin bütün şərtləri, iddiaçı tərəfindən vaxtında yerinə yetirilmiş və ödəniş tam şəkildə həyata keçirilmişdir. Yəni, İpoteka və Əsas Kredit Müqavilələrinə uyğun olaraq göstərilən 45000 (qırx beş min) manat kredit məbləğinin müqabilində, “Unibank” KB ASC-yə 73309,62 (yetmiş üç min üç yüz doqquz manat altımış iki qəpik) manat, ödənilən günün məzənnəsinə uyğun olaraq 93437,54 (doxsan üç min dörd yüz otuz yeddi dollar, əlli dörd sent) ABŞ dolları həcmində pul ödənilmişdir. Lakin, iddiaçının bu faktı sübutla birlikdə məhkəmələrə təqdim etməsinə baxmayaraq, işə baxan məhkəmə hakimləri bu faktı araşdırmamış, iş üzrə çıxarılan qətnamələrdə bu hal dəyərləndirməmiş və məhkəmə qətnamələrində olmamış kimi hesab olunaraq bu fakta toxunmamışlar. Göstərilənlərə əsasən hesab etmək olar ki, məhkəmə iddiaçı Kamil Abdullayevin “Unibank” KB ASC arasında 08.12.2012-ci il tarixdə bağlanmış 37Z/12 saylı zaminlik müqaviləsinin ləğv edilməsi barədə iddia ərizəsinin təmin edilməməsini qət etməklə haqlı olmamış və birbaşa maddi hüquq pozuntusuna yol vermişdir. Ümumiyyətlə, cavabdeh tərəf lazımi dəlilləri məhkəmələrə təqdim edib, qol qoyulan qanunsuzluqlara davamlı etirazını bildirsə də, məhkəmə instansiyaları bu kimi xüsusatlarla bağlı lazımi araşdırma işləri aparmamış və lazımi sübutların qiymətləndirilməsinə birtərəfli yanaşmışlar.

  Halbuki, Azərbaycan Respublikası MPM-nin 88-ci maddəsinə əsasən, məhkəmə sübutlara obyektiv, qərəzsiz, hərtərəfli və tam baxdıqdan sonra, həmin sübutlara tətbiq edilməli hüquq normalarına müvafiq olaraq qiymət verir. Göründüyü kimi, sonuncu dəfə işə baxan Sumqayıt Şəhər Apellyasiya Məhkəməsi instansiyası bir sıra maddi və prosessual hüquq pozuntularına yol verməklə, olduqca qeyri-obyektiv, olduqca qanunsuz və əsassız qətnamə qəbul etmişdir. Azərbaycan Respublikası MPM-nin 418.1-ci maddəsinə əsasən, maddi və prosessual hüquq normalarının pozulması və ya düzgün tətbiq olunmaması, məhz apellyasiya instansiyası məhkəməsinin qətnamə və qərardadının ləğv edilməsi üçün tam əsas verir. Ona görə də düşünürük ki, Ali Məhkəmənin Mülki Kollegiyası MPM-nin 418.1-ci maddəsinin tələblərini əsas tutub, ədalətin bərpası yöndə qərarını elan edəcək.

Mövzunu diqqətdə saxlayacağıq.

Gundemxeber.az