Ölkə başçısı həmişə müşavirələrində vurğulayır ki, "Məmur xalqın xidmətçisidir. Hər zaman xalqın yanında olmalı, onların problemləri ilə maraqlanmalıdır."

Deyir, "sən saydığını say, gör məmurlar nə sayır".
Ölkə başçısının ciddi tapşırığına baxmayaraq, hələ bir çox icra başçıları öyrəşdiyi formada işini davam etdirir. Yəni, "köhnə hamam, köhnə tas"... Bir çox icra başçıları nəinki, kəndləri gəzib, sakinləri dinləmir, heç dəfələrlə idarəyə gəlib müraciət edənlərə, hətta sosial media vasitəsilə Prezidentə müraciət edənlərə də əhəmiyyət vermir.

Yeri gəlmişkən, Cəbrayıl rayon Böyük Mərcanlı kənd sakini, hazırda Biləsuvar rayon ərazisində yerləşən Cəbrayıl qəsəbəsində yaşayan Məmmədova Elmira Əliş qızı və digər bir neçə Cəbrayıl rayon sakinləri də dəfələrlə "DogruXeber.az" informasiya portalı vasitəsilə prezidentə müraciət edib, İcra başçısı Kamal Həsənovun barəsində narazılıqlarını ifadə ediblər. Sakinlərin hər müraciətindən sonra, onlara reaksiya verən İcra başçısı deyil, onun işlə təmin etdiyi tərəfdarları olub. Hansı ki, xanımların reportajları yayımlanan sayt və YouTube kanalının şərh bölməsində onları təhqir ediblər. İcra başçısının "mərhəmətindən töhfə alan" bəzi "şansı yavər gedən" rayon sakinləri, başçıdan narazılıq edən yüzlərlə rayon sakinlərini şiddətlə qınayır, "yalançı"lıqda ittiham edirlər.
Elmira xanım Məmmədova bu dəfə də üzünü prezidentə tutaraq, bu dəfə daha ciddi iddialı ifadələr səsləndirib. Bu qədər narazılıqlara, şikayətlərə, özbaşınalıqlara rəğmən, İcra başçısının işini hələ də öz bildiyi kimi idarə etməsinə və barəsində heç bir tədbir görülmədiyinə görə, prezident administrasiyasında onu dəstəkləyən hər hansı bir şəxsin olduğu qənaətinə gəldiklərini ifadə edib. Xanım düşünür ki, prezident aparatında onların şikayətlərinin ölkə başçısına çatdırılmasını əngəlləyən tərəfdarlar fəaliyyət göstərir.
Üstəlik də bəzi təhsili olmayan, yaxud diplomu sual altında olan və yuxarıda da qeyd etdiyimiz kimi, başçının "mərhəmətindən nəsibini alan" şəxslər narazı sakinləri susdurmaq, həmçinin onların etiraz səslərini ictimailəşdirən mediaya bu işdə əngəl olmaq üçün əllərindən gələn bütün vasitələri (təhdid, xahiş və s) sınaqdan keçirirlər. Amma, heç bir halda sakinləri narazı salan səbəbləri aradan qaldırmağı planlarına daxil etmirlər. Hansı ki, başçıya olan "sevgi və ehtiram"ları sayəsində sahib olduqları vəzifənin səlahiyyətləri, bu problemlərin bəzilərinin həllinə qismən  də olsa çatır. Həmin şəxslər isə hətta mətbuata müraciət etmək istəyən onlarla sakinlərə də yalan vədlərlə əngəl olurlar. Hər gün "yaxşı olacağ"ına söz verərək, beləcə vaxt qazanırlar.
Maraqlıdır, nə vaxta qədər?Mövzuya qayıdacağıq.
Redaksiyamız hər kəsin söz haqqını tanıyır.

Gundemxeber.Az