Məlumdur ki, ötən ilin avqust ayında həbs olunan jurnalistlər Sənan Həsənoğlu və İlqar Atabəyli, məhz həbs olunduqları vaxta qədər ölkəmizin nüfuzlu media quruluşlarında çalışan şəxslər olublar və hər iki jurnalistin media sahəsində kifayət qədər xidmətləri də var. Belə bir səbəbdəndir ki, istər Sənan Həsənoğlunun, istərsə də İlqar Atabəylinin həbsi bu gün də geniş ictimai rezonans doğurmaqdadır. Qeyd edək ki, Sənan Həsənoğlu vaxtilə AzTV-də və digər  televiziya kanallarında Qarabağ bölgəsi üzrə müxbir vəzifəsində çalışıb və 2016-cı ilin “Aprel döyüşləri” zamanı bu şəxsin fəaliyyəti  hərbi komandanlıq tərəfindən fədakar jurnalist kimi də qiymətləndirilib. İlqar Atabəyli isə, media cameəsində özünün istedadı, bacarığı, yüksək potensialı və s. ilə ad-san çıxaran qələm əhli olaraq tanınıb. Ailənin yeganə qazanc gətirəni olan Sənan Həsənoğlu, 1-ci Qarabağ Müharibəsinin iştirakçısı olmaqla bərabər, həbs olunduğu vaxta qədər ağır cərrahi əməliyyat olunub və ürək nahiyəsinə 7 ədəd stend də qoyulub. İlqar Atabəyli də oxşar qaydada ailənin yeganə qazanc gətirəni olub və onun himayəsində azyaşlı övladları var ki, onlardan biri ağır xəstədir. Bu şəxsləri yaxından tanıyan hər kəs bilir ki, Sənan Həsənoğlu da, İlqar Atabəyli də peşəkar jurnalist olmaqla bərabər, heç zaman haqqı nahaqqa  qurban verməyən qələm əhlidirlər. Hər iki jurnalist olduqca vətənpərvər, olduqca doğma xalqına bağlı olmaları ilə tanınırlar. Bəli, istər Sənan Həsənoğlu, istərsə də İlqar Atabəyli bütün fəaliyyətləri dönəmində yalnız və yalnız azərbaycançılıq idealogiyasını əsas tutmaqla, əməli addımlarında ümumilli maraqlarımızdan çıxış ediblər. Qeyd edək ki, həyatda səhvsiz insan olmur. Bəlkə də, hər iki jurnalist etdikləri müəyyən səhvlərin məsuliyyətini ötən bir il ərzində lazımınca dərk ediblər. Bundan əlavə, iş üzrə şikayətçi olan şəxslər də onları bağışlayıblar və barələrində heç bir şikayətlərinin olmadığını ortaya qoyublar.

Onu da qeyd edək ki, Sənan Həsənoğlu vaxtilə ölkə rəhbəri İlham Əliyev cənablarının etdiyi cağırışı əsas tutaraq, respublikamızda baş verən ictimai-siyasi  hadisələri  işiqlandırmaq məqsədilə, 2021-ci ilin əvvəllərində “Xəbər kanalı” adlı internet televiziyası təsis edir və çox keçmir ki, bu media qurumu geniş ictimaiyyət tərəfindən  tənqidi media resrusu olaraq tanınır. Dəfələrlə bu internet televiziyasında Vətəninə, xalqına qarşı nankorluq edən, büdcə oğurluğu ilə məşğul olan vəzifə sahibləri tənqid olunublar. 

      Unutmaq olmaz ki, bugünə kimi Azərbaycan milli mətbuatı zəngin inkişaf yolu keçmişdir və ötən son illər ərzində bu sahənin inkişaf etdirilməsində, məhz hər iki jurnalistin də müstəsna xidmətləri olmuşdur. Bu Gün Milli Mətbuatın yaranmasının 147-ci ildönümü tamam olur. Bəli, Milli mətbuatımızın inkişafı mərhum prezidentimiz Heydər Əliyevin adı ilə bağlıdır. Çünki, 1998-ci ildə Azərbaycan mətbuatı üzərindən dövlət senzurası götürüldü və ölkəmizdə söz və mətbuat azadlığının əsası qoyuldu ki, bu ki, milli mətbuatın inkişafına ciddi təsirini göstərdi. Artıq ölkəmizdə Milli Mətbuat gününün geniş şəkildə qeyd olunması ənənəyə çevrilib. Bütün bunları əsas tutaraq düşünürük ki, istər Sənan Həsənoğlunun, istərsə də İlqar Atabəylinin həbsi ilə bağlı cəmiyyətin daha böyük kəsiminin, o cümlədən nüfuzlu jurnalistləri, ictimai fəalların, vətəndaş cəmiyyəti üzvlərinin, tanınmış ictimai-siyasi xadimlərin və digərlərinin ifadə etdikləri ictimai etiraz, məhz hakimiyyətin yuxarı dairələrində ciddi şəkildə müzakirə olunacaq və hər iki tanınmış jurnalistlə bağlı ədalətli məhkəmə qərarı da elan olunacaq.

GundemXeber.Az