Bakı Apellyasiya Məhkəməsinin hakimi Azər Hüseynovun ədalətsiz qərarından şikayət - DSX-nin haqsız yerə xidmətdən uzaqlaşdırılan giziri Ali Məhkəmənin ədalətinə ümid edir.

Vətəndaş Cənnətova Rəqsanə Şəmil qızı GundemXeber.Az-ın redaksiyasına müraciət edərək oğlu Cənnətov Alim Cənnət oğlunun haqsızlıqla üzləşdiyini bildirmiş, məhkəmə ədalətsizliyindən şikayətlənmişdir.

R.Cənnətova bildirir ki, gizir rütbəli Alim Cənnətov Dövlət Sərhəd Xidmətinin Dövlət Sərhəd Nəzarəti İdarəsində “Heydər Əliyev Beynəlxalq Aeroportu” sərhəd nəzarəti şöbəsinin yük sərhəd nəzarəti bölməsinin nəzarətçisi vəzifəsində xidmət edirmiş. Onu iki il əvvəl Mirzəyev Şahin Sahib oğlu şəxsin şikayəti əsasında və İdarənin daxili təhlükəsizlik şöbəsinin rəisi Namiq Cəlilovun ona qarşı qərəzli mövqe nümayiş etdirək təzyiq altında aldığı izahatla formalaşdırdığı mənfi rəy  nəticəsində guya “Hərbi vəzifə və hərbi xidmət haqqında” Azərbaycan Respublikası Qanununun 41.0.6-cı maddəsinə (xidməti uyğunsuzluğa görə) müvafiq olaraq vəzifədən azad etmişlər. 

Haqsızlıqla barışmayan Alim Cənnətov Bakı İnzibati Məhkəməsinə müraciət edərək, Dövlət Sərhəd Xidməti rəisinin onun vəzifədən azad olunması və ehtiyata buraxılması barədə 11.03.2021-ci il tarixli 549Ş/H saylı əmrinin ləğv edilməsi, əvvəlki işinə bərpa olunmaqla məcburi iş buraxma dövründə ödənilməli olan əmək haqqının hesablanılaraq ona verilməsinin Dövlət Sərhəd Xidmətinə həvalə olunması barədə qərar çıxarılmasını xahiş etmişdir. 

İşin halları Bakı İnzibati Məhkəməsində, daha əvvəl isə istintasq orqanında Rövşən Bayramov adlı müstəntiq tərəfindən araşdırılmış, Alim Cənnətovun xidməti uyğunsuzluq kimi dəyərləndirilə biləcək heç bir nöqsanının olmadığı qənaətinə gəlinmiş və hakim Mehriban Qarayevanın sədrliyi ilə Alim Cənnətovun iddiasının təmin olunması barədə qərar çıxarılmışdır.

Qarşı tərəf qərardan narazı qaldığı üçün Bakı İnzibati Məhkəməsi vasitəsilə Bakı Apellyasiya Məhkəməsinin İnzibati Kollegiyasına apellyasiya şikayəti vermişdir.

Rəqsanə Cənnətova bildirir: “Apellyasiya məhkəməsi ilk əvvəl iyulun 20-nə təyin olunmuşdu. Sonra qəfildən iki gün geri çəkilməsi barədə bizə mesaj göndərildi. İyulun 18-də keçirilən iclasda apellyasiya şikayəti verən tərəfin nümayəndəsi məhkəməyə gəlmədi. Hakim Azər Hüseynov yekun prosesi avqustun 31-nə təyin etdi. Alim Cənnətovu məhkəmədə atası və qanuni nümayəndəsi kimi Cənnətov Cənnət Lətif oğlu təmsil edirdi. Alimə vəkillik xidməti göstərən şəxsə məlum olmuşdur ki, əslində Alimdən şikayət edən Şahin Mirzəyev özü deyil, atası Sahib Mirzəyev olmuşdur. Məsələnin vaxtında deyil, iki il sonra qabardılması da müəmmalıdır və Alimə qarşı qərəzli mövqeyin göstəricisidir. Bizim tərəfdən məhkəmədə iştirak edən şəxslərin müşahidələrindən təəssüratları belə olmuşdu ki, sanki hakim və köməkçiləri birinci instansiya məhkəməsinin çıxardığı qərarı dəstəkləyəcəklər. Həmin məhkəmə iclasında hakim köməkçiləri hətta qarşı tərəfə qınayıcı suallar da vermiş, əsaslandırılmış cavab almadıqlarına görə başlarını məyusluqla yelləyərək təəssüflərini bildirmişlər. Lakin apellyasiya məhkəməsinin qərarının məhz həmin gün elan olunmaması, sentyabrın 2-nə saat 16:45-ə kimi təxirə salınması bizdə müəyyən şübhə və narahatlıqlar doğurmuşdu. Odur ki, “qaynar xəttə” zəng vurub öyrəndik ki, əslində qərarın elanı sentyabrın 21-nə təxirə salınıb. Ancaq yenə də gözləmədiyimiz halda qərar qəfil sentyabrın 5-də elan olundu və dərhal da sistemə oturduldu. Sən demə, şübhələrimiz heç də əsassız deyilmiş. Bu təxirəsalmalar da hakim Azər Hüseynovun oyunları imiş. Apellyasiya məhkəməsinin qərarı ilə Bakı İnzibati Məhkəməsinin ədalətli qərarı əsassız elan olundu. Hakim Azər Hüseynovun bunca ədalətsiz olacağını gözləmirdik. Alimin atası Cənnət Cənnətov deyir ki, proses zamanı Alimin xidmət dövründə davranışının heç də xidmətə uyğunsuz olmadığı barədə hakim Azər Hüseynovla fikir mübadiləsi aparıb, söhbət əsnasında Dövlət Sərhəd Xidməti rəisi general-polkovnik Elçin Quliyevin əsgərə “cənab” deyə müraciət etməsi kimi təqdirəlayiq nüanslar xatırlanıb. Onun hakimə verdiyi: “Alimə “küçük” deyib təhqir edən, təzyiq göstərən zabit Namiq Cəmilovun davranışı xidmətə uyğundurmu” sualına Azər Hüseynov: “Yox, yüksək vəzifəli şəxsin məsuliyyəti daha böyükdür” cavabını verib. Hamımız elə bilirdik ki, Bakı Apellyasiya Məhkəməsinin məlum qərarının elan olunmasının təxirə salınması yəqin reqlamentin gərginliyi ilə əlaqədardır. Rövşən Bayramovun işin əvvəlində sərgilədiyi obyektivlik mövqeyini sonradan dəyişməsi haradasa başa düşüləndir - xidmət etdiyi nüfuzlu qurumun məhkəməni uduzmasını istəmir, yəqin, o da təzyiqlə üzləşib. Amma qərar verməkdə müstəqil olan məhkəmə hakimi Azər Hüseynovun nəyə görə 180 dərəcə mövqe dəyişməsi anlaşılan deyil. Bəlkə, hakim Azər Hüseynovun simasından küskünlük hiss edən Cənnət Cənnətovun sezdiyi kimi, nəsə minnətdarlıq umurmuş? – deyə bilmərik. Onu da qeyd edim ki, Cənnət Cənnətov bizi məyus edən məlum qərardan sonra dəfələrlə Bakı Apellyasiya Məhkəməsinin “qaynar xətti”nə zəng vuraraq hakimin özü, köməkçiləri, məhkəmə katibi ilə əlaqə qurmağa çalışmış, lakin telefonu qaldıran “qaynar xətt” operatoru Günel adlı xanım təəssüf hissi ilə onları əlaqələndirmək cəhdlərinin uğursuz olduğunu bildirmişdir. Alimin atası həmçinin dəqiqləşdirib ki, Azər Hüseynov daha əvvəl Azərbaycan Respublikası Ali Məhkəməsində hakim işləyib, onun Bakı Apellyasiya Məhkəməsinə hakim təyin edilməsi karyera nöqteyi-nəzərdən endirilmə kimi qəimətləndirilə bilər. Bu da yəqin bir növ “xidməti uyğunsuzluğunun” nəticəsidir. Görünür, Azər Hüseynov bu tənbehdən nəticə çıxarmayıb, öz əvvəlki ampluasındadır.

Zərərçəkmiş Alim Cənnətov və yaxınları Bakı Apellyasiya Məhkəməsinin qərarından Ali Məhkəməyə şikayət verməyə hazırlaşır. Eyni zamanda məsələni, Məhkəmə-Hüquq Şurasının sədri, Ədliyyə naziri çox hörmətli cənab Fikrət Məmmədovun yüksək diqqətinə çatdırmaq niyyətindədirlər. Ümid edirlər ki, Ali Məhkəmədə Alim Cənnətovun təqsirsizliyi, eləcə də əmisinin I Qarabağ müharibəsi şəhidi, qaynatasının I Qarabağ müharibəsi iştirakçısı və II qrup əlil, anasının II qrup əlil olduğunu, başçılıq etdiyi gənc ailənin ehtiyaclı durumu nəzərə alınacaq.

Redaksiya olaraq mövzunu diqqət mərkəzində saxlayacağıq və Cənnətovların Azər Hüseynovla Namiq Cəlilovu bağlayan “incə tellər” barədə şübhələrindən yazacağıq.  

GundemXeber.Az