Ölkədəki azad, müstəqil mətbuat qurumlarının önündə gedən media orqanı kimi tanınan "XURAL.TV"-nin rəhbəri Əvəz bəy Zeynallı və əsasən, siyasi motivli həbslərdə müdafiə missiyasını öz üzərinə götürən məşhur vəkil Elçin bəy Sadıqov barəsində CM-nin 311.3.3-cü maddəsi ilə qondarma cinayət işi qaldırılıb və bu gün gecə saat 4:00 radələrində barələrində həbs-qətimkan tədbiri  seçilməsinə dair qərar qəbul edilib.

Hesab edirəm ki, bu həbslər siyasi motivli və sifarişlidir, ölkədə azad sözə, fikrə mətbuata qarşı dövlət terrorudur, çünki media qurumlarında həm də qorxu, xof yaratmağa hesablanmışdır, həmçinin mövcud qanunvericiliyin tələblərinin pozulması yolu ilə həyata keçirilib və qeyri-qanunidir.

Niyəsi ondan ibarətdir ki;

1. yayılan məlumata görə, cinayət işi hakimiyyətin şər aparatı tərəfindən yayılan və Əvəz Zeynallıya aid bir səs yazısı əsas götürülərək başladılıb,

2. ehtimal olunur ki, bu səs yazısı kiber-cinayətkarlıq yolu ilə əldə edilib,

3. qanunvericilikdə nəzərdə tutulmayan yollarla əldə edilən faktlardan, o cümlədən səs yazısından da sübut materialı kimi istifadə edilə bilməz və qanunla qadağandır,

4. səs yazısında rüşvət alınmasına və ya verilməsinə dair heç bir ifadə yoxdur.

Bəs həbsin əsas səbəbi və məqsədi nələr ola bilər?

1. Mediadan məlumdur ki, hazırda DTX-nin təcridxanasında saxlanılan və məhkəməsi gedən "Baku Steel Company" MMC-nin Müşahidə Şurasının sabiq sədri, milyonlarla pulun mənimsənilməsində ittiham olunan Rasim Məmmədov məhkəmədə  əlində çox tutarlı sənədlər olduğunu, həmçinin hakimiyyətin yuxarı eşelononda olan kimlərlə nə kimi əlaqələrdə olduğunu açıqlayacağını bildirmiş və bu aspektdə ilkin olaraq Prezident Administrasiyasının ozamankı aparat rəhbəri Ramiz Mehdiyevin və prezidentin şəxsi mühafizə xidmətinin rəhbəri general Bəylər Əyyubovun adını çəkmişdi,

2. Əvəz Zeynallı da son yayımlarında bu istiqamətdə onda da ciddi sənədlərin olduğunu və zamanı gəldikcə açıqlayacağını bildirmişdi,

3. Yadınızdadırsa, uzun illər "AKKORD" Şirkətlər Qrupunun rəhbəri olmuş, hazırda ABŞ-da yaşayan İlqar Hacıyev silsilə video-yayımlarda sabiq baş prokuror Zakir Qaralovun təhriki və prezidentin şəxsi mühafizə xidmətinin rəhbəri general Bəylər Əyyubovun vasitəsilə İ.Əliyevə 100 milyon rüşvət ötürməsi barədə məlumatlar açıqlamışdı,

4. Ehtimalıma görə, Əvəz Zeynallının həmin sənədləri açıqlayacağı təqdirdə "Rasim Məmmədov cinayəti"nin ucunun kimlərəsə bağlana biləcəyindən əndişələnən kəslər Əvəz Zeynallı və Elçin Sadıqovu həbs etməklə zərərsizləşdirmək və onlarda olan "qorxulu" sənədləri ələ keçirmək qərarına gəliblər və hadisənin görünən, faktiki səbəb və hədəfi bunlardır. Görünməyən hədəf isə, təbii ki, media camiəsini qorxutmaq və "cızığından çıxan hər kəsi həbs edərik" mesajı verməkdir...

5. Həm də hesab edirəm ki, bu tip həbsləri İlham Əliyevin iradəsi xaricində heç bir qurum həyata keçirə bilməz...

Əvəz Zeynallı və Elçin Sadıqov siyasi sifarişlə həbs ediliblər, siyasi məhbusdurlar, qeyd-şərtsiz azad edilməlidirlər, azadlıqlarını tələb edirəm və ictimai müdafiələri üçün əlimdən gələni edəcəyimi bəyan edirəm!

Əlövsət Sadıqlı

Hüquq müdafiəçisi