“Bir insanı uzun müddət aldatmaq olar, bir neçə adamı bir müddət aldatmaq olar, amma bütöv bir xalqı aldatmaq hələ heç kəsə nəsib olmayıb”                            

                                                                         Avraam Linkoln

Təxminən iki əsr öncə Azərbaycanın Abşeron bölgəsində tapılan neft iqtisadiyyatın inkişafına təkan verdi. Bu səbəbdən, ərazidə neft emalı müəssisələri tikildi. Lakin əvvəl Çar Rusiyasının, sonra isə Sovet İttifaqının müstəmləkəsi olan Azərbaycanda neft çıxarılan və emal edilən ərazilərdə ekoloji durum bərbad vəziyyətə düşdü.

Yalnız müstəqillik əldə edəndən sonra bu ərazilərin təmizlənməsi məsələsi gündəmə gəldi. Prezident İlham Əliyevin təşəbbüsü ilə Bakının “Qaraşəhər” adlanan ərazidə yeni “Ağ Şəhər” layihəsi həyata keçirilməyə başlanıldı. Prezidentin və dövlət qurumlarının müvafiq sərəncamlarına görə, bu ərazidə yerləşən yaşayış və qeyri-yaşayış sahələri köçürülməli, torpaq qatı təmizlənməli, yeni yaşayış massivi salınandan sonra, sakinlər mənzillərlə təmin edilməli və ya müvafiq qanunlara görə onlara kompensasiya ödənilməli idi. Lakin son illər ərzində redaksiyamıza daxil olan çoxsaylı şikayətlər belə deməyə əsas verir ki, bir çox layihələr kimi, “Ağ Şəhər” layihəsi də korrupsioner məmurlar “iştahına qurban verildi”. Söhbət ondan gedir ki, prezidentin xoşməramlı təşəbbüsünə baxmayaraq, bir sıra məmurlar öz ciblərinin doldurmaq üçün sakinləri narazı saldılar, onların malına-mülkünə göz dikdilər. Aşağda adları sadalanan Xətai rayon sakinləri tərəfindən “Hürriyyət”in redaksiyasına ünvanlanan məktub da dediyimizin bariz nümunəsi hesab oluna bilər.

Belə ki, Xətai rayonunda vaxtilə “Qaraşəhər” adlanan ərazinin sakinləri - Cəbrayılov Tahir, Qasımov Kərim, Qaibxanov Cəlaləddin, Paşayev Vahid, Əhmədova Dilarə, Babayev Nizami, Məmmədov İlyas, Əliyev Fərhad, Tahirov Uluğbəy, Əhmədov Elçin, Sadıxov Allahverən, Nağıyev Zahid, Həbiyev Əhli, Əsgərov Zahid, Quliyev Şakir, Əhmədova Svetlana və s. şikayətçilər ədalətsizliklə üzləşdiklərini qeyd edərək, ölkə başçısından kömək istəyirlər. Onlar qeyd edirlər ki, Bakı şəhər İcra Hakimiyyəti başçısının 262 saylı, 11.06.2007-ci tarixli sərəncamında bu işlərin yerinə yetirilməsi “ADEC” Azərbaycan İnkişaf Şirkətinə həvalə edilib. Lakin sözügedən qurum bu işin “nəzərdə tutulan müddət ərzində öhdəsindən gəlmədiyinə” gərə, bu tədbirlərin görülməsi Bakı şəhəri İcra Hakimiyyəti başçısının 225 saylı, 10.06.2013-ci tarixli, heç bir hüquqi əsası olmayan sərəncamı ilə şəxsən Xətainin icra başçısı Razim Məmmədova həvalə edilir. O gündən bu yana qəsəbə sakinlərinin qara günləri başlayır:

...Bu qiymətləndirmə ilə razı olmayan sakinlər “ƏQD” MMC-yə müraciət edib. Onların müraciətindən sonra, 18 may 2022-ci il tarixli cavab məktubunda bildirilib ki, 24 fevral 2017-ci il tarixli Qiymətləndirmə rəyi yalnız 6 (altı) ay müddətində qüvvədə olduğundan, artıq öz təsir qüvvəsini itirmiş olduğu qeyd olunub. Bu səbəbdən, sakinlər “Daşınar və Daşınmaz Əmlakların Qiymətləndirilməsi Xidməti” MMC-yə müraciət edərək, mövcud ərazidə yerləşən daşınmaz əmlakın orta bazar qiymətinə uyğun evlərini dəyərləndiriblər. Bu zaman “Ağ Şəhər”də yerləşən təmirsiz mənzillərin hər kv.m-nin qiymətinin 1750-2800 manat civarında olduğu sənədlərdə öz əksini tapıb: “25.04.2022-ci il və 10.05.2022-ci il tarixlərində Fuad Ələsgərovun qəbulunda, qonşularımız Zahid Nağıyevin və Həbiyev Əhlinin Xətai RİH tərəfindən onların razılığı olmadan, onlara məxsus olan evlərin sökülməsi, AR Konstitusiyasının maddə 13 və 29, AR Mənzil Məcəlləsinin maddə 5 kobudcasına pozulması, söküntü zamanı Xətai RPİ-nin və 37-ci Polis Bölməsinin polis əməkdaşlarının hərəkətləri və hərəkətsizliyi, Xətai RİH rəsmilərinin və Xətai Mənzil Kommunal idarəsi əməkdaşlarının qanunsuz hərəkətlərinə Prokurorluq orqanlarının biganə yanaşması barədə sakinlərin şikayətləri diqqətlə dinlənilmiş və iradları qəbul edilmişdir. Görüş zamanı müvafiq sənədlər sakinlər tərəfindən təqdim edilmişdir. Qəbulda iştirak edən AR Baş Prokurorunun Birinci müavini Elçin Məmmədova, Prokurorluq orqanlarına bu qanunsuz tədbirlərin yenidən araşdırılması, AR DİN-nin nümayəndəsinə isə polis əməkdaşlarının belə mübahisəli tədbirlərə qatılmaması barədə göstəriş verilmişdir.

05.05.2022-ci il, 13.05.2022-ci il və 14.05. 2022-ci il tarixlərində şikayətçi sakinlər Bakı Baş Polis İdarəsində vəzifəli şəxslər tərfindən qəbul edilmişdir. Nəticədə əvvəl Xətai RİH-nin hərəkətlərində cinayət tərkibi olamadığı səbəbindən, rədd cavabı verilmiş qərarlar ləğv edilmiş və istintaq materialları Bakı Şəhər Prokurorluğuna göndərilmişdir. Həmin qurumun İctimai Təhlükəsizlik şöbəsi polis əməkdaşlarına belə qanunsuz tədbirlərə qatılmayacağı barədə göstəriş verəcəyini bildirdi. Hal-hazırda Xətai Rayon Prokurorluğunda bu tədqiqat davam edir.

11.04.2022-ci il və 20.05.2022-ci il tarixlərində Zeynal Nağdəliyevin qəbulunda, qonşularımız Zahid Nağıyevin və Həbiyev Əhlinin Xətai RİH tərəfindən onların razılığı olmadan, onlara məxsus evlərin sökülməsi, AR Konstitusiyasının maddə 13 və 29, AR Mənzil Məcəlləsinin maddə 5 kobudcasına pozulması, “ƏQD” MMC-nin 53/M saylı 24 fevral 2017-ci il tarixli məktubunda qeyd edilən qiymətləndirmə rəyinin 6 ay müddətində təsiri olması barədə sakinlərin şikayətləri diqqətlə dinlənilmiş və iradları qəbul edilmişdir. Görüş zamanı müvafiq sənədlər sakinlər tərəfindən təqdim edilmişdir. Zeynal müəllim şikayətlərimizi dinləyib və sənədlərlə tanış olandan sonra aşağıdakı göstərişləri vermişdir:

1. Ev sahiblərinin razılığı olmadan bir ev də sökülməsin;

2. Mübahisələr qanuni, yəni məhkəmə yolu ilə həll edilsin;

3. Bu günə qədər olan qiymətləndirmə və razılaşmalar ləğv edilsin;

4. Əgər vəsait yoxdursa, “ADEC” Azərbaycan İnkişaf Şirkətinin direktoru Ruslan Sadıxova müraciət edilsin. Səlahiyyətindədirsə, sakinlər mənzillərlə təmin edilsin;

5. Əgər bu da mümkün deyilsə, vəsait olana qədər heç kim narahat edilməsin və yaşayış üçün normal şərait təmin edilsin.

Zeynal müəllimin bu göstərişlərinin nəticəsi kimi 27.05.2022-ci il tarixində Xətai RİH-də sakinlərin Teymur Əzizov və Anar Tağızadə ilə görüşü oldu. Lakin Xətai RİH 01.06.2022-ci il tarixli cavab məktubunda 2013-ci ildən bəri öz dəyişməz mövqeyini bildirməklə kifayətlənmişdir. Əksinə, heç nə olmamış kimi, Xətai RİH başçısının birinci müavini Etibar Əhmədov sakinlərə zəng edərək, “ADEC” Azərbaycan İnkişaf Şirkətinin əməkdaşı Teymur Quliyevin vəsitəsilə sakinlərə köhnə hesablanmış qiymətlərlə evin sökülməsinə razılıq verilməsini israrla təklif edirlər.

08.06.2022-ci il tarixində Şahmar Mövsümovun qəbulunda “ƏQD” MMC-nin 53/M saylı 24 fevral 2017-ci il tarixli məktubunda təqdim edilən qiymətləndirmə rəyinin 6 aylıq təsir müddəti keçsə də, fərdi yaşayış evlərimizin hələ də bu rəy əsasında hesablandığını ərz etdik. Xətai RİH başçısının birinci müavini Etibar Əhmədovun və digər məmurların bu məsələnin Maliyyə Nazirliyinə aid olduğunu və vəsaitin məhz bu qurum tərəfindən ayrıldığını dedikləri səbəbindən, Şahmar müəllimə bu məsələnin araşdırılması barədə göstəriş verməsini xahiş etdik. Görüş zamanı müvafiq sənədlər sakinlər tərəfindən təqdim edilmişdir. Nəticədə, 28.06.2022-ci il tarixində maliyyə naziri Samir Şərifov sakinlərin nümayəndəsini qəbul etmişdir. Qəbul zamanı müəyyən edilmişdir ki, Maliyyə Nazirliyi “Bakı Ağ Şəhər” layihəsinə əvvəlki dövrdə maliyyə vəsaiti ayırsa da, son dövrlər üçün nə fərdi yaşayış evlərinin qiymətləndirməsinə, nə də sökülən evlərə görə verilən kompensasiyaya dövlət xəzinəsindən bir qara qəpik ödəməmişdir. Xətai RİH başçısına və sakinlərə ünvanlanan cavab məktubunda Maliyyə Nazirliyi Xətai RİH-nin başçısı Rafiq Quliyevdən bu məsələdə bu qurumun adının bir daha hallanmamasını xahiş etmişdir. Samir Şərifov bu tədbirin yalnız investorlar tərəfindən maliyyəşməsini bildirərək, sakinlərə qrup şəklində bunu tələb etməyi tövsiyə etmişdir.

Yüksək səviyyəli məmurlarla görüşlərdən və əldə etdiyimiz sənədlərdən belə nəticə çıxartmaq olar ki, Xətai RİH tərəfindən sakinlərin razılığı olmadan evlərinin sökülməsi və qanunsuz tədbirlərə polis əməkdaşlarının cəlb edilməsi, bu məsələ ilə əlaqəli Məhkəmə və Prokurorluq orqanlarına təzyiq göstərməsi, artıq təsir qüvvəsini itirmiş qiymətləndirmə rəyi əsasında sökülən evlərə verilən kompensasiyanın hesablanması, beş il əvvəl sakinlərlə bağlanmış müqavilələrin ləğv edilməməsi, investorlardan alınan vəsaiti dövlət vəsaiti kimi təqdim edərək, sakinləri aldadlb dövlət layihəsi adı ilə onların təhdid edilməsi, sakinlərin mülklərini alıb digərlərinə satması, bu ölkənin vətəndaşlarına qarşı böyük qanunsuzluqdur. Xətai RİH rəhbərliyinin sakinlərə qarşı davranışları onlarda dövlətçiliyimizə qarşı inamsızlıq yaradır”.

Sakinlər hesab edir ki, Bakı şəhəri İcra Hakimiyyəti başçısının 225 saylı, 10.06.2013-ci tarixli sərəncamının da heç bir hüquqi əsası olmayıb. Onlar sərəncamın qeyri-legitim olduğunu sübut edən fakt və dəlilləri aşağıdakı kimi təqdim ediblər:

(Ardı var)

GUNDEMXEBER.AZ