Son günlər "Qarabağın bərpası" adı altında tenderlər vasitəsilə dövlət büdcəsinin talan edilməsi haqda söz-söhbətlərə tez-tez rast gəlirik. GundemXeber.Az bildirir ki, araşdırmaçı jurnalist Cavanşir Həsənli də üç oliqarx məmurlar haqda ciddi mənimsəmə faktları açıqlayıb. Həmin açıqlamanı olduğu kimi çoxsaylı oxucularımıza təqdim edirik:

"Şəkildə gördüyünüz 3 məmur dövlət tikinti layihələrində faktiki ortaqlardır. Namiq Hümmətov Dövlət Şəhərsalma və Arxitektura Komitəsi sədrinin birinci müavinidir. Ortadakı şəxs Mənzil İnşaatı Dövlət Agentliyi yanında "MİDA" MMC-nin rəhbəri Fərhad Təhməzovdur. Üçüncüsü isə belə demək mümkünsə,  Naxçıvanın yeni Namiq Hümmətovudur. Pərvin Nəbiyev London City Universitetinin məzunudur. Təzəlikcə Naxçıvan Muxtar Respublikası Dövlət Şəhərsalma və Arxitektura Komitəsinə sədr müavini təyin olunub. Amma başını çoxdan başlara qoşub, Hümmətovun və Təhməzovun çevrəsində dolaşır.

Bu gün Namiq Hümmətov Xankəndi, Ağdərə və Xocalıda Bərpa, Tikinti və İdarəetmə Xidmətinin Müşahidə Şurasının tərkibinə daxil edilib.

Keçmiş şampanzavod işçisi faktiki tikinti oliqarxına çevrilib. Son 5 il ərzində Hümmətov cənabları öz şirkətləri üçün faktiki ortağı Fərhad Təhməzovun sayəsində Mənzil İnşaatı Dövlət Agentliyinin ümumilikdə 177 milyon manatdan artıq sifarişini əldə edib. İndi Fərhad Təhməzovun oğlu İsrafil Təhməzov Qarabağda dövrəyə girib, irihəcmli dövlət tikinti və bərpa sifarişləri əldə etməyə başlayıb. 

Təhməzovun şirkətləri Namiq Hümmətovun qardaşının adına olan şirkətlərlə partnyorluq əsasında qarşılıqlı fəaliyyət göstərir. Mexanizm belədir, dövlət sifarişlərini alan şirkət tenderin əldə olunmasında yardımçı tərəfin şirkətlərini subpodratçı şirkət kimi layihəyə cəlb edir və bütün tərəflər ayrılan məbləğdən öz payını götürür. İndi Namiq Hümmətovun Xankəndi, Ağdərə və Xocalıda Bərpa, Tikinti və İdarəetmə Xidmətinin Müşahidə Şurasının tərkibinə daxil edilməsi məmur şirkətlərinin Qarabağda yeni dövlət layihələrində iştirakına yeni üfüqlər açır. 

Təəssüf ki, Azərbaycanda vəzifə beşmərtəbəli şəxsi mənafelərin, biznes maraqlarının 6-cı mərtəbəsidir.

Xatırladım ki, Təhməzovların tamahı ucbatından professor Nazim İmanovun oğlu,  Azərbaycan Prezidentinin Qarabağ İqtisadi Regionu üzrə Xüsusi Nümayəndəliyinin baş məsləhətçisi Araz İmanov işini itirib. Araz İmanov 6 ay əvvəl Təhməzovlaın yaxın qohumu kimi azad edilmiş ərazilərdə toqquşan maraqların hədəfinə gəlmişdi. Yeri gəlmişkən,  Fərhad Təhməzov Nazim İmanovun qudasıdır. Nazim İmanovun digər oğlu Cavidan İmanov Fərhad Təhməzovun qardaşı, Qida Təhlükəsizliyi Agentliyinin sədri Qoşqar Təhməzlinin Slovakiya, Ukrayna və Türkiyədəki biznesini idarə edir."

GundemXeber.Az