Bu sektorda idxal edilən avadanlığın və texnologiyanın
ƏDV-dən, mənfəət vergisindən azad edilib

Bu il yanvarın 1-dən qüvvəyə minmiş Vergi Məcəlləsinə əlavələrə uyğun olaraq Azərbaycanda sənaye və texnoloji parkların yaradılması ilə bağlı investisiya və istehsalat fəaliyyəti 7 il müddətinə bütün vergilərin (fiziki şəxslərdən tutulan gəlir vergisindən başqa) ödənilməsindən azad edilib. Ekspertlər qeyri-neft sektorunun inkişafına dövlət dəstəyi baxımından dövlətin bu qərarını müsbət qiymətləndirirlər, lakin hesab edirlər ki, bu, özəl sektorun “yaxşı” şəraitdə fəaliyyət göstərməsi üçün yetərli olmaya bilər.
Parlamentin İqtisadi siyasət komitəsinin üzvü Əli Məsimli Turan-a bildirib ki, xüsusi iqtisadi zonaların yaradılması üzrə Çin və Hind-Çin təcrübəsindən fərqli olaraq, MDB məkanında hələlik azad iqtisadi zonaların uğurlu fəaliyyətinə dair parlaq nümunə yoxdur. Müsbət nəticənin olmaması Azərbaycan üçün buraxılmış səhvlərdən ibrət götürmək baxımından nümunə ola bilər. Azərbaycan üçün 7 il müddətində vergi “tətilləri” müəyyən nəticə əldə etmək üçün kifayət qədər normal dövrdür. Lakin deputat hesab edir ki, idxal edilən avadanlığın və texnologiyanın ƏDV-dən, mənfəət vergisindən və s. azad edilməsi həmin sənaye parklarında istehsalat fəaliyyəti üçün investorların stimullaşdırılması yolunda yalnız ilk addımdır. Onun fikrincə, investorlar bu ideyadan öz “payını” almaq istəyən dövlət məmurlarından qorunmalıdır. Ə.Məsimli sənaye və texnoloji parkların fəaliyyətinin yaxın gələcəkdə ÜDM artımına çox təsir göstərəcəyi barədə fikirlərə skeptik yanaşır.
“İqtisadi və Sosial İnkişaf Mərkəzi” QHT-nin rəhbəri Vüqar Bayramov hesab edir ki, 2020-ci ilədək ÜDM-in ikiqat artırılması üzrə məqsədə nail olmaq üçün ÜDM-in səviyyəsi hər il ən azı 5,6% səviyyəsində artmalıdır. Neft hasilatının həcminin azalması şəraitində buna nail olmaq çətin olacaq. İqtisadçının fikrincə, hökumət əlverişli vergi rejimli sənaye və texnoloji parkların vasitəsilə özəl sektorun inkişafına yol açaraq problemlərin həlli üçün daha optimal yolu seçib. “Hesab edirəm ki, onların fəaliyyətinin birinci mərhələsində daxili investisiyalar da kifayət qədər olacaq. Lakin yüksək texnologiyaların cəlb olunması üçün xarici kapitalın da iştirakı tələb olunur”, - o qeyd edib.
Xatırladaq ki, vergi “tətilləri”nin fəaliyyəti ölkə prezidentinin fərmanı ilə yaradılan sənaye və texnoloji parklara şamil edilir. Hazırda Azərbaycanda bunların sayı üçdür: Sumqayıt kimya sənayesi parkı, Balaxanı sənaye parkı və Yüksək texnologiyalar parkı.
Sənaye və Energetika Nazirliyinin Alternativ və Bərpa Olunan Enerji Mənbələri Agentliyi yanında da alternativ enerji üzrə yüksək texnologiyalar parkı fəaliyyət göstərir. Sumqayıtda özəl texnoloji park fəaliyyət göstərir.
“İqtisadiyyat şöbəsi”