Xəstənin oğlu: “1 ildir atamın kartını qaytarmır” Baş həkim: “Ona siqaret və kolbasa alıram”


“Atam Əhmədov Canpolad Ağali oğlu bir ildir 1 saylı Maştağa Ruhi Əsəb Dispanserinin Narkologiya şöbəsində müalicə olunur. Özü də 1-ci qrup əlildir. Həmin şöbənin Şəhanə adlı baş həkimi atamın balansında 141 manat olan pensiya kartını götürüb. İndiyə qədər pensiyasını alıb mənimsəyir. Bundan başqa? biz hər ay Şəhanə həkimə 50 manat pul vermişik ki, atamı yaxşı müalicə etsin. Biz elə bilmişik ki, belə də olmalıdır, xəstənin təqaüdünü müalicə həkimi almalıdır. Bizə məlum olanda ki, bu qanunsuzdur, avqustun 20-də həkimdən atamın pensiya kartını istədik. O, dedi ki, bu qanunidur. Ruhi xəstənin pensiyasını baş həkim almalıdır”.

Bunu Lent.az-a C. Əhmədovun oğlu Hüseyn Əhmədov deyir. Onun sözlərinə görə, 1 ildir ki, atasının pensiya kartını mənimsəyən Şəhanə həkimdən aidiyyəti üzrə orqanlara da şikayət edib, amma şikayətinə baxan yodur.

H. Əhmədov atasının həyatının təhlükədə olduğunu düşünür: “Bilirəm ki, şikayətlərimdən sonra atamın həyatı təhlükədə olacaq. Buna görə də, mətbuat vasitəsi ilə baş prokuror Zakir Qaralova, səhiyyə naziri Oqtay Şirəliyevə, Baş Prokurorluq yanında Korrupsiyaya Qarşı Mübarizə İdarəsinin rəisinə, ombudsman Elmira Süleymanovaya müraciət edib xahiş edirəm ki, bizə kömək etsinlər. Bu həkim barədə qanunu tədbirlər görəsiniz”.

Əhmədovun şikayəti ilə bağlı xəstəxananın baş həkimi ilə əlaqə saxladıq. Baş həkim Şəhanə Süleymanova C. Əhmədovun pensiya kartının həqiqətən onda olduğunu söylədi: “Bir aydı pensiya kartı məndədir. Oğlu özü verib ki, atasına siqaret və nə istəsə onu alaq. Hökumət siqaret vermir. Mən nə ilə almalıyam? Digər xəstələrin yiyələri gətirir. Hökumət ancaq yiyəsi olmayanlara siqaret verir. Xəstənin oğlu var. Yaxşı yerdə də işləyir. Sadəcə rayonda olduğundan gələ bilmir. Canpolad Əhmədova bir ay ərzində gündə 60 qəpikdən siqaret alıb vermişəm. Qalan pula isə xəstəyə kolbasa almışam. Xəstəxananın verdiyi, dolma və dovğanı yeyəndə qarnının ağrıdığını deyir. Mən də ona kolbasa, sosiska alıb vermişəm. Əlavə pula gəlincə, mənə pul verilməyib. Gəlsin, sabah qaytarım kartı. Pulunu qaytaracam”.