Bir təşkilatın 9 layihəsi qalib elan olunub

Azərbaycan Respublikasının Prezidenti yanında Gənclər Fondu gənclər təşkilatları üçün elan etdiyi müsabiqənin nəticələrini ötən həftənin sonunda açıqladı. “Qafqazinfo” xəbər verir ki, müsabiqənin nəticələri ilə bağlı fondun açıqlamasında bildirilirdi ki, qeyri-hökumət təşkilatları və yaradıcı gənclərdən cəmi 387 layihə təklifi daxil olub, onlardan 132-si gənclər təşkilatı olmadığına görə müsabiqədən kənarlaşdırılıb. A kateqoriyası üzrə 147, B kateqoriyası üzrə 34, C kateqoriyası üzrə 74 layihə (cəmi 255 layihə) Müşahidə Şurasının müzakirəsinə təqdim olunub. Onlardan da A kateqoriyası üzrə 117, B kateqoriyası üzrə 18, C kateqoriyası üzrə 35 layihənin (cəmi 170 layihə) maliyyələşdirilməsi barədə qərar qəbul edib.
Fondun qalib hesab etdiyi 170 layihənin siyahısı açıqlananda isə maraqlı müzakirələr başlayıb. Siyahıdan bəlli olur ki, Gənclər Fondu bir təşkilata və eyni şəxsin adına 9 layihə verib. Bu isə facebook sosial şəbəkəsində ciddi müzakirələrə səbəb olub. Belə ki A kateqoriyası üzrə 9 layihə alan şəxs Azərbaycan Tələbə Gənclər Təşkilatları İttifaqının sədri İsmayılov Şahin Əmir oğludur. Bu təşkilat “Gənc təfəkkür və siyasət ", “Tələbə Gənclər Təşkilatları (TGT) sədrlərinin II Liderlik Məktəbi, “Musiqimizdə gənc nəfəs”, “Ekologikal” ekologiya sahəsində I İntellektual Yarış, “Tələbələrarası ingilis dili Olimpiadası”, Regionlarda İKT-yə olan marağın yüksəldilməsi, “Qərb regionu gəncləri arasında intellektual yarış”, “I’m a young businessman” Economic School, “Səyyar hüquqşünas” layihələri üzrə qalib elan olunub. Həmin layihələrin icrasına birlikdə 81400 manat qrant ayrılıb.
Maraqlı məqamlardan biri isə odur ki, prezidenti İlham Əliyev 04 mart 2013-cü ildə imzaladığı sərəncama əsasən Azərbaycan Respublikasının Prezidenti yanında Gənclər Fondunun Müşahidə Şurasına yeni üzvlər təyin edib. Onlardan biri də məhz yazıda adıçəkilən Azərbaycan Tələbə Gənclər Təşkilatları İttifaqının sədri İsmayılov Şahin Əmir oğludur.
Qeyd edək ki, Azərbaycanda donor təşkilatların qaydalarına əsasən elan olunmuş qrant müsabiqələrində hər müsabiqə zamanı hər bir təşkilat yalnız bir layihə təqdim edə bilər. Gənclər Fondunun saytında yerləşdirilən təlimatda da qayda təxminən buna bənzərdir: “AZGF-na bir təşkilat ya da individual şəxs qrant elanı zamanı müxtəlif kateqoriyalara eyni zamanda müraciət edə bilər. Lakin gənclər təşkilatının və yaxud individual şəxsin layihəsi növbəti qrant elanı zamanı yekunlaşmayıbsa, layihə davam edirsə və həmçinin gənclər təşkilatı və individual şəxs layihənin nəqli və maliyyə hesabatını təqdim etməyibsə, o zaman növbəti qrant müsabiqəsində iştirak edə bilməz”. İzah edək ki, Gənclər Fondu bir neçə (A, B, C, D, E) kateqoriya üzrə qrant layihəsi maliyyələşdirir. Hər hansı təşkilat bu kateqoriyaların hər biri üzrə yalnız bir layihə təqdim edə bilər. Amma adıçəkilən təşkilat yalnız bir – A kateqoriyası üzrə 9 layihə təqdim edib ki, onun 9-u da qalib gəlib.
Azərbaycan Tələbə Gənclər Təşkilatları İttifaqının sədri Şahin İsmayılov məsələ ilə bağlı mövqeyini “Qafqazinfo” ya açıqlayıb. Şahin İsmayılov bildirib ki, burada qeyri-adi heç nə yoxdur: “Azərbaycan Tələbə Gənclər Təşkilatları İttifaqı 87 tələbə gənclər təşkilatını özündə birləşdirir Bu o deməkdir ki, bizim 87 layihə ilə çıxış etmək imkanımız var. Çünki həmin təşkilatlar hüquqi status daşımadığına görə onlar bizim vasitəmizlə Gənclər Fonduna layihə təqdim edirlər. Bu onların İttifaqın hüquqi statusu adı altında Gənclər Fonduna müraciətidir. Həmin cədvəldə də ayrı- ayrı universitetlerin adı qeyd olunub”.

Günel