Çünki, “Kapital bank” ın Şirvan şəhər filialının rəhbərliyi dəyişib, yeni rəhbər Elşən Yusifov da bildirir ki, “baş verənlər mənim rəhbər olduğum vaxtlarda olmayıb ki, mən də cavabdehlik daşıyam” deyir

Şirvan şəhəri Vidadi küçəsi ev-35 ünvanında yaşayan şəhər sakini Məmmədov Qəzənfər Əhməd oğlu, “Gündəm Xəbər”ə şikayət ərizəsi ünvanlayaraq yazır ki, “adı çəkilən filialda əməlli-başlıca dərəbəylikdir. Çünki, mən 2013-cü ildə adı çəkilən filialdan kreditə pul götürmək istəsəm də, filial rəhbərliyi buna razı olmadı və əsas da, yaşımın çox olduğunu göstərdilər. Belə olan halda krediti həyat yoldaşım Məmmədova Məleykə Xancan qızının adına götürməyə məcbur oldum. Əslində bu belə də oldu və lazımi sənədləri qaydasına salaraq, 26 avqust 2013-cü il tarixdə “Kapital bank” ın Şirvan filialından 1900 manat kreditə pul götürdük. Elə ki, həyat yoldaşım götürdüyü pulları saydı, o zaman bəlli oldu ki, bankın verdiyi pul 1900 manat deyil, 1760 manatdır. Belə olan halda həmin pulları təkrar mən də saydım və gördüm ki, 1760 manatdır. O halda xəzinədara sual etdim ki, bizə niyə 1900 deyil, 1760 manat pul vermisiniz? Cavab olaraq o, bildirdi ki, “sizin puldan 140 manat xidmət haqqı çıxmışıq, indi bu haqda sizə qəbz də verəcəyik. Düzdür, çox keçmədi ki, xidmət haqqına görə 140 manatlıq qəbzlə bərabər, banka ödəyəcəyimiz kredit faizləri ilə bağlı ödəniş cədvəlini də bizə verdilər”.
Onu da qeyd edək ki, Qəzənfər Məmmədov rəsmi sənədlər əsasında iki il müddətinə kreditə götürdüyü 1900 manat pulu 131 gün vaxtından əvvəl ödədiyini və borcunun olmaması barədə bankdan arayış aldığını da bildirir. O onu da qeyd edir ki, “götürdüyüm kredit pulunu vaxtlı-vaxtında və təqribən 4 ay 10 gün əvvəl ödəsəm də, bank tərəfi məndən 24 ayın faizini aldı. İndi başa düşürəm ki, onlar böyük bir qanunsuzluğa qol qoyublar. Eyni zamanda 17 sentyabr 2015-ci il tarixdə ödədiyim 106 man 82 qəpik pulu, bankın reyestrindən çıxarış cədvəlində də qeyd etməyiblər və məndən xeyli miqdarda artıq pul alıblar. Bu gün tələb etdikdə isə, bank tərəfi artıq aldığı pulları mənə qaytarmır. Çünki, “Kapital bank” ın Şirvan şəhər filialının rəhbərliyi dəyişib, yeni rəhbər Elşən Yusifov da bildirir ki, “baş verənlər mənim rəhbər olduğum vaxtlarda olmayıb ki, mən də cavabdehlik daşıyam” deyir.
Çox maraqlı və diqqəti cəlb edən addımlardır ki, bu gün belə bir olaylar “Kapital Bank”ın yerli şöbələrində baş verir. Yaşanan olaylarda qazanan bank tərəfi, zülm çəkən, getgələ salınan isə, daha çox sadə vətəndaşlar olurlar.

Tariyel Bayramov