Cavanşir Yusifov nə üçün büdcə vəsaitlərinin talan edilməsinə göz yumur?

gundemxeber.az Ölkədə azad sahibkarlığın inkişafı, eləcə də qeyri-neft sektoruna müxtəlif yatırımların qoyulması, həmçinin büdcədən maliyyələşən orqanlarda çalışan məmurların vəzifələrini lazımi səviyyədə icra etmələri üçün dövlət öz üzərinə düşən işi layiqincə yerinə yetirsə də, bəzi qurumlar və onların rəhbər şəxsləri əllərində olan imkanlardan istifadə edərək iş adamlarına, kiçik və orta ranqlı məmurlara divan tutmaqda davam edirlər. Misal üçün Maliyyə Nazirliyinin Dövlət Maliyyə Nəzarəti Xidməti (DMNX) və onun rəhbəri Cavanşir Əmiralı oğlu Yusifovu göstərmək olar.

Hamıya bəllidir ki, Maliyyə Nazirliyi ölkə büdcəsinə nəzarət edir. Büdcənin necə tərtib edilməsi, onun xərclərinin forması isə nazirlik və onun yerli qurumları tərəfindən həyatk keçirilir. Söz yox ki, bütün bunlar göründüyü qədər də asan məsələ deyil və prosesin bu qədər çətin, mürəkkəb olması ən çox da Dövlət Maliyyə Nəzarəti Xidmətinin rəhbəri Cavanşir Yusifovun işinə yarayır. Çünki büdcə tətbiq edilən zaman istənilən şəkildə məbləği şişirtmək və ya kiçiltmək mümkündür. Qüvvədə olan müvafiq qanuna görə, yeni ilin büdcəsi cari ilin avqust ayının sonuna qədər qismən də olsa hazır formaya gətirilməlidir. Yəni yerli maliyyə idarələri qeyd olunan müddətə kimi təhkim olunduqları rayonların yeni il üçün xərcləri və gəlirləri barədə məlumat verərək, işlərini yekunlaşdırmalıdırlar. Məhz bundan sonrakı mərhələ isə birbaşa Maliyyə Nazirliyinə həvalə olunur. Cavanşir Yusifovun əsas gəlir qaynağı da məhz bu andan sonra başlayır. Belə ki, onun rəhbərlik etdiyi Dövlət Maliyyə Nəzarəti Xidməti yerli maliyyə qurumları ilə "razılığa" gəldikdən sonra xeyli miqdarda əlavə qazanca sahiblənir. Bununla bağlı məlumatlı şəxslərdən əldə etdiyimiz informasiyada qeyd olunur ki, yerli maliyyə qurumlarının rəhbərləri hər il avqust ayına qədər Cavanşir Yusifovun qəbulunda olur, onunla müvafiq anlaşma əldə edirlər. Bu isə sonda hər iki tərəfin maraqlarını kifayət qədər təmin etdiyindən, alan da, verən də prosesdən razı qalır. Bu isə özlüyündə birbaşa dövlət büdcəsinin talanması kimi dəyərləndirilməlidir. Məsələn, hər il ayrı-ayrı dövlət xəstəxanalarının təmiri, xəstələrin qida ilə təmini, dərman pereparatlarının alınması məqsədilə büdcədən külli miqdarda pullar ayrılır. Lakin çox nadir hallarda hansısa bir vətəndaş dövlət nəzarətində olan xəstəxanada pulsuz dərmanla təmin edilir.

Buna baxmayaraq, yerli maliyyə idarələrilə əlbir olan Cavanşir Yusifov bu kimi işləri çox böyük ustalıqla həyata keçirə bilir. Halduki Dövlət Maliyyə Nəzarəti Xidmətinin birbaşa vəzifə borcudur ki, büdcə təşkilatlarında yoxlamalar həyata keçirsin və aşkarlanmış neqativ hallar barədə rəhbərliyi məlumatlandırsın. Cavanşir Yusifov isə maraqlarını təhlükə altına qoymamaq naminə rəhbərlik etdiyi qurumun yoxlama apardığı rayonlarda guya hər şeyin normal olduğunu, ancaq cüzi pozuntuların aşkarlandığını bəyan edir...

Maliyyə Nazirliyinin Dövlət Maliyyə Nəzarəti Xidmətinin rəisi Cavanşir Yusifovun böyük kapitala sahib olduğunu deyən məlumatlı şəxsin sözlərinə görə, onun özünün və yaxın qohumların çoxsaylı daşınmaz əmlaklarının olması barədə ayrı-ayrı vaxtlarda mətbuatda müxtəlif səpkili araşdırma xarakterli yazılar dərc olunub.

Məlumatda həmçinin bildirilir ki, Cavanşir Yusifovun özündən başqa, qohumları Rüfət Yusifov, Sevinc və Könül Yusifovaların Bakının ən sayılıb-seçilən yerlərində villaları, mənzilləri var: "Bilirsiniz ki, Dövlət Maliyyə Nəzarəti Xidməti büdcə təşkilatlarında yoxlama aparmaq səlahiyyəti olan orqandır.

Lakin aparılan yoxlamaların heç də hamısı şəffaf deyil. Bu isə birbaşa Dövlət Maliyyə Nəzarəti Xidmətinin fəaliyyətində müəyyən qaranlıq məqamların olmasından xəbər verir. Adıçəkilən qurumun yol verdiyi ciddi nöqsanlar həmçinin, Maliyyə Nazirliyi kimi mötəbər bir qurumun Həmçinin Samir Şərifovun məqsədyönlü fəaliyyətinə kölgə salır, nazirliyin nüfuzuna xələl gətirir".

Məsələ ilə bağlı qarşı tərəfin də mövqeyini dərc etməyə hazırıq.