Türk Lirəsi sürətlə ucuzlaşır. Bu günə olan məzənnəyə görə, 1 dollar 14,83 TL olmaqla tarixi zirvəni yeniləyib.

Qardaş Türkiyədə lirənin günbəgün dəyərdən düşməsi Azərbaycana necə təsir edəcək? Azərbaycan manatını lirənin taleyi gözləyirmi? DİA.AZ xəbər verir ki, iqtisadçı Nemət Əliyev Bizimyol.info-nun suallarını cavablandıran zaman bildirib ki, lirənin dəyərdən düşməsinin Azərbaycana təsiri var
“Belə ki, Azərbaycan dövləti orada böyük layihələr həyata keçirib. Məsələn, Petkim, “Star” neft emalı zavodu və s. zavodlar var. Ona görə də orada lirənin dəyərdən düşməsi birinci növbədə Dövlət Neft Şirkətinin həmin aktivlərinin dəyərdən düşməsi anlamına gəlir. Digər tərəfdən isə həmin neftayırma zavodunun istehsal etdiyi məhsullar da məhz Türkiyə bazarlarında satmaq üçün nəzərdə tutulub. Əgər xatırlayırsınızsa, həmin zavod orada istifadəyə veriləndə rəsmilər açıq şəkildə ifadə etmişdilər ki, Türkiyədə dizel yanacağına olan tələbatın 70 faizi həmin zavodun hesabına ödənilir. SOCAR-a məxsus olan həmin “Star” neftayırma zavodunun istehsal etdiyi məhsul Türkiyə daxili bazarlarında satılır. Ona görə də, orada lirənin ucuzlaşması heç şübhəsiz ki, Dövlət Neft Şirkətinin məhsul satışına da təsir göstərəcək.
Bundan əlavə DNF-nun bir milyard aktivi türk lirəsinə investisiya olunub. Həmin o aktivlərin dəyərdən düşməsi də Azərbaycana təsir göstərir”.
İqtisadçının sözlərinə görə, türk lirəsinin dəyərdən düşməsinin üstün tərəfi də var. “Türk lirəsinin düşməsi Türkiyədə istehsal olunnan bütün məhsulların, aktivlərin dəyərdən düşməsi deməkdir və bu baxımdan Türkiyədən ixracı stimullaşdırır. Türk mallarını Azərbaycana ixrac edən şirkətlər, müəssisələr var. Həmin müəssisə və şirkətlər belə vəziyyətdə bir xeyli irəli düşə bilirlər”.
İqtisadçı qeyd edib ki, Türkiyədə, Azərbaycanın öz daxilində, dünya bazarında baş verən dəyişikliklər istər-istəməz Azərbaycan manatının dəyərdən düşməsinə təsir göstərir.
“Bizim Məkrəzi Bank çox yarıtmaz idarəçilik sayəsində Azərbaycan manatını çox bərbad bir vəziyyətə gətirib çıxarıb. Hazırda 1 dollar 1 manat 70 qəpikdir və əksəriyyət də bu göstəriciyə baxır, aldadıcı təəssürat yaranır ki, guya manat xarici valyuta qarşısında möhkəmdir. Amma bu belə deyil.
Mən sizə başqa bir göstərici deyim. Bu göstərici Azərbaycan manatına olan münasibəti ifadə edir. Bildiyiniz kimi valyutaların özləri də əmtəədir və alınıb-satılır. Əgər Azərbaycanın idxalına baxsanız, o zaman məlum olacaq ki, 2020-ci il ərzində 2019-cu ilə nəzərən idxal olunnan malların dəyərində 23 faiz bahalaşma yaşanıb. Siz təsəvvür edin ki, Azərbaycan gətirilən mallar bu il 21-22 faiz, keçən il isə 23 faiz bahalaşıb. Bu o deməkdir ki, Azərbaycan manatı xarici valyutalar, məhsulların qarşısında çox əhəmiyyətli dərəcədə dəyərini itirib”.

GundemXeber.Az