Göyçay rayon bazarında satışa çıxarılan kənd təsərrüfatı məhsullarının qiymətləri kəllə-çarxa çıxıb

Azərbaycan Paytaxt bazarları ilə yanaşı rayon bazarlarında satışa çıxarılan kənd təsərrüfatı məhsullarının əksəriyyətini xarici ölkələrdən gətirilən meyvə-tərəvəzlər üstünlük təşkil edir. Göyçay rayon bazarında da fermerlər vaxtında əkib becərdikləri meyvə-tərəvəz məhsullarının rayonda soyuducu anbarlarının azlığı və məhsulun çürüməsi üzündən bu vaxta qalmadığını, qalanlarını isə mövsümündə dəyər-dəyməzə satdığı bildirirlər.

Bayram qabağı olmasına baxmayaraq qiymətlər kəllə-çarxa çıxmaqla isə əsl “qış möcüzəsi” yaradıb. Alıcı qiymətlərin bahalığından, satıcı isə alıcıların bu səbəbdən dolayı azlığından gileylənir. Satıcılar səbəbi isə yanacağın qiymətinin qalxması ilə əlaqləndirirlər.

Ən çox rayon bazarlarına meyvə-tərəvəz İran, Türkiyə,Gürcüstan kimi ölkələrdən gətirildiyi və yerli məhsulla müqayisədə baha satıldığı bildirilir. Sakinlər meyvələrdən alma, portağal, feyxo, banan, üzüm, qoz və fındığda artımın 50 qəpikdən 1 manata qədər olduğunu qeyd edərək, almanın, portağalın bir kq-nı 1-3 manata, fındığ və qozun isə 6- 9 manat arası satıldığını bildirdilər. Gürcüstan və Qəbələdən gətirilən şabalıdın qiyməti isə 4- 7 manat təşkil edir. Tərəvəz məhsullarından isə kartof və soğanda qiymət ən yüksək həddə çatıb. Məkanında ərşə çəkilən kartof əsasən Gürcüstandan gətirilir. Bir ay əvvəl ikinci çörək sayılan kartofun 1 kq-ı 60-70 qəpiyə satılırdısa, indi 1,50 qəpiyə, soğanın 1 kq-ı isə 1 manata satılır.

Göyçayda pomidor və xiyar yetişdirmək mümkün olsada bu mövsümdə və yanacağın qiyməti qalxandan sonra fermerlər çəkilən vəsaitin çoxluğundan dolayı əkib becərməkdə maraqlı olmur və Bakı şəhərindən, İran və Türkiyə kimi ölkələrdən gətirməyə üstünlük verirlər. Bu isə qiymətin artmasına səbəb olur. Pomidorun 1 kq-ı hazırda 1-2 manata, xiyarın 1 kq-ı isə 2-2,50 qəpiyə satılır.

Yerli məhsul isə tək nardır ki, onun da qiyməti bir ayla müqayisədə ikiqat artaraq kq-ı 3-8 manata çatıb. Ətin isə qiyməti stabil olaraq 8-9 manat təşkil edir. Ərzaqlarda da qiymət artımı 20-50 qəpik arası müşahidə olunur. Müşahidlərdən bəlli oldu ki, yeni il heç də sakinlərin ürəyincə keçməyəcək, ona görə ki, məhsulların qiyməti ciblərinə tərs mütənasibdir.