Onun intiharının səbəbləri də bəlli oldu

Bərdə Rayon İcra Hakimiyyətinin binası qarşısında özünü yandıran Maarif Vəliyev II qrup Qarabağ əlilidir.

Bunu virtualaz.org saytına açıqlamasında Vətən Müharibəsi Əlilləri İctimai Birliyinin sədri Firudun Məmmədov deyib.

Təşkilat rəhbəri bildirdi ki, M.Vəliyev acınacaqlı vəziyyətdə yaşayır: “Maarifin nə evi yoxdur. O, ailəsi ilə birgə acınacaqlı vəziyyətdə yaşayır. Maarif Vəliyev ya ev, ya da torpaq sahəsi ilə təmin olunmaq üçün dəfələrlə Bərdə Rayon İcra Hakimiyyətinə müraciət edib. Lakin onun şikayətlərinə baxan olmayıb. Buna görə də üstünə benzin tökərək özünü öldürməyə cəhd edib. Xoşbəxtlikdən yanğını söndürmək mümkün olub. Lakin ayağının aşağı ətraflarında ciddi yanıq xəsarətləri var”.

Qarabağ əlilləri hazırda M.Vəliyev olayı ilə bağlı toplantı keçirirlər. Əlavə məlumatlar verəcəyik.

* * * 13:07

Xəstəxananın travmatologiya şöbəsindən virtualaz.org-a bildirdilər ki, özünü yandıran Maarif Vəliyevin vəziyyəti yaxşıdır: “Xəstə birinci dərəcəli yanıq xəsarətləri alıb. Onun əsasən ayaqları yanıb. Danışır, hər şeyi anlayır”.

M.Vəliyevin özünü yandırarkən affekt, yaxud sərxoş vəziyyətdə olub-olmaması ilə bağlı sualımıza xəstəxanadan belə cavab verdilər ki, o, xəstəxanaya gətirilərkən sərxoş və anlaqsız vəziyyətdə olmayıb. Amma xəstəxanadan hadisənin necə, hansı səbəbdən baş verməsi barədə danışmaq, ümumiyyətlə, olay barədə əlavə məlumat vermək istəmədilər: “Daha heç nə deyə bilmərik”.

Səhiyyə Nazirliyi mətbuat xiddmətinin rəhbəri Anar Qədirli isə virtualaz.org saytına bildirdi ki, özünü yandıran Maarif Vəliyev Bərdə mərkəzi rayon xəstəxanasının reanimasiya şöbəsinə yerləşdirilib: “Hazırda onu həyatı üçün təhlükə yoxdur”.

* * * 12:23

Bərdənin icra başçısının köməkçisi Zaur Bəylərov virtualaz.org-a verdiyi açıqlamasında bildirdi ki, bu hadisədən xəbərsizdirlər: “Bu xəbəri indi eşidirik. Belə bir hadisə baş verməyib”.

Z.Bəylərov hadisənin icra hakimiyyətinin binasının qarşısında olmamasının əminliklə bildirsə də hadisənin başqa bir yerdə ola biləcəyini istisna etmədi.

Bərdə Rayon Mərkəzi Xəstəxanasının qəbul şöbəsindən virtualaz.org-a bildirdilər ki, özünü yandıran şəxs 1970-ci il təvəllüdlü Maarif Vəliyevdir. O, hazırda xəstəxananın travmatologiya şöbəsində müalicə alır: “Onun müalicəsi ilə həkim Xalid Məmmədov məşğul olur. Buna görə də Xalid Məmmədovdan başqa heç kim xəstənin vəziyyəti haqda açıqlama verə bilməz”.

Xəstəxanadan X.Məmmədovun hazırda xəstənin yanında olduğunu əsas gətirərək indi heç bir məlumat verə bilməyəcəyini söylədilər.

* * * 12:01

Bərdə rayon Alpoud kənd sakini ötən gün axşam saatlarında özünü yandırıb.

Hadisə şahidlərinin ANS PRESS-ə verdikləri məlumata görə, kənd sakini özünə Bərdə Rayon İcra Hakimiyyətinin binası qarşısında qəsd edib.

Kənd sakininin özünü yandırma səbəbi hələ ki, bilinmir. Yanan şəxsin xəstəxanaya yerləşdirildiyi və onun vəziyyətinin ağır olduğu bildirilir.

Bərdə Rayon İcra Hakimiyyətindən isə hadisənin ümumiyyətlə baş vermədiyini bildiriblər. Bərdə Rayon Polis Şöbəsi isə hadisənin baş verməsini təsdiqləyib. Bərdə Rayon Mərkəzi Xəstəxanasının travmatologiya şöbəsindən ANS PRESS-ə verilən məlumta görə, özünü yandıran Alpoud kənd sakini yanıq xəsarətləri ötən gün xəstəxanaya yerləşdirilib. Onun vəziyyətinin normal olduğu bildirilir.

Hadisə ilə bağlı əlavə məlumat verəcəyik.