Dövlətin pulunu havaya sovuran icra hakimləri yola salınır,
Bakı meri də cərgədədir, mərkəzi hökumət onların “qara siyahısı”nı tutub;
Siyavuş Novruzov iqtidarın sensasion əməliyyatının mesajını verdi

Novruz bayramından sonra icra başçılarının çoxu istefaya göndəriləcək. Hazırda Prezident Administrasiyasında siyahı hazırlanır. PA-da bu prosesə nəzarət edənlər hansı bölgələrdə daha çox narazılıq, şikayət olmasının monitorinqini aparır, büdcədən ayrılan vəsaitlərin xərclənməsində hansı merin korrupsiyaya daha çox yol verməsi təftiş edilir.
İqtidar daxilində gedən müzakirələrdə rektor-deputatların universitetlərdən uzaqlaşdırılmasının davamı kimi icra hakimiyyətlərində də ciddi kadr islahatları həyata keçiriləcək. Əldə etdiyimiz məlumata görə, dövlətin pulunu havaya sovuranların siyahısı tutulur və onların işdən çıxarılıb, başqa regionlara icra başçısı bir daha təyin olunmayacağı proqnozlaşdırılır.
Bu mesajın qaranquşu olaraq YAP-çı deputat Siyavuş Novruzov hökumətdən icra başçılarının dövlət vəsaitinin havaya sovrulmasının qarşısını almağa çağırıb.
Deputatın həmişə bir mövzuya toxunmasının arxasında hökumətin bir əməliyyat planı dayanır.
Əvvəlcə onun dilindən tirajlanır, mediaya buraxılır, ardınca icrasına başlanır. S.Novruzovun da çıxışı icra başçılarının istefasına hesablanmış addımdır.
Mötəbər mənbədən “Gündəm-xəbər”ə daxil olan məlumatda bildirilir ki, ara-sıra icra başçılarının istefaya gedəcəyi barədə xəbərlər yayılır. Amma, təsdiqini tapmır. Bu dəfə məsələ ciddiləşib. Hökumət 2014 siyasətində böyük dəyişikliklər etməsə də, bəzi nazirlərin də postundan uzaqlaşacağı nəzərdə tutulub.
O cümlədən, icra hakimlərinin “qara siyahısı” hazırlanır və ölkə rəhbərliyinin masasına qoyulacaq.
Mənbə bildirir ki, hələ seçkidən əvvəl hakimiyyət ölkəni risk qruplarına bölündüyünü bilirdi. İqtidarın daha çox narahat olduğu rayonların icra başçılarının qarşısına seçki ilə bağlı mühüm vəzifələr qoyulmuşdu.
Onlar bunun öhdəsindən gəlsələr də, tez-tez boşluqlara yol verir, əhalinin fəallaşması, ayağa qalxması, mərkəzi hökumət üçün baş ağrıya çevrilməsi üçün zəmin yaradırlar. Artıq siyahıda Bakıdan - Binəqədi, Nəsimi, Səbayel rayonlarının adları çəkilir.
Əyalətlərdə isə siyahı daha böyükdür - Xaçmaz, Xızı, Siyəzən. Xeyli vaxtdır ki, bu rayonların barəsində ard-arda şikayətlər gəlir. Sabirabad-Saatlı, Lənkəran-Astaranın da siyahıda olduğu deyilir. Taleh Qaraşov və Qəzənfər Ağayev postunu itirə bilər.
Mənbə qeyd edir ki, Ağcabədi, Beyləqan, Bərdənin şefləri də taxtdan salınır. Ən əsası isə Bakı və Sumqayıtın icra başçıları - Hacıbala Abutalıbov və Eldar Əzizovla vidalaşmağın zamanı çatıb. Kürdəmirin icra başçısı İrşad Əliyev, İmişli Rayon İcra Hakimiyyətinin başçısı Vilyam Hacıyev, Salyanın icra başçısı Tahir Kərimov, Bərdənin başçısı Vidadi İsayev, Şəmkir rayon icra başçısı Nazim Veysov, Gədəbəyin başçısı Ramiz Yediyarovun istefası iddia olunur.
Elə Siyavuş Novruzov da bildirib ki, icra başçıları yerlərə təyin olunan kimi mövcud parkları sökür, insanların istirahətinə maneçilik törədirlər: “Əgər icra başçıları bu parkları bəyənmirlərsə, onda bundan daha yaxşılarını tiksinlər.
Bir icra başçısını yenisi əvəz edəndə o köhnə icra başçısının gördüyü işlərin üstündən xətt çəkmək üçün onun bütün gördüklərini sökməyə başlayır. Məsələn, yeni icra başçısı köhnə icra başçısının təmir etdiyi yolu sökür. Gördüyü abadlıq işlərini məhv edir.
Orda yenidən bu işləri görməyə başlayır. Amma həmin təmir olunmuş yol və ya qonşu küçə isə bərbad vəziyyətdədir. Amma buna diqqət yetirmir. İcra başçıları bu işi o görülən işlərdən bir neçə dəfə bahasına görür.
Dövlət vəsaitini lazımsız yerə havaya sovurur. Ona görə də hökumət, Maliyyə Nazirliyi rayonlara ayrılan bu dövlət vəsaitlərinə nəzarəti gücləndirməlidir və bu halların qarşısının alınmasına çalışmalıdır”.
Qaynağımız qeyd edir ki, bu günə qədər hakimiyyətə ən çox narahatlıq yaradan rayonlardakı başçılar olub.
Onların yersiz hərəkətləri, özbaşına addımları və büdcə talançılığına görə üsyanlar baş qaldırıb. Hökumətin illik planına görə icra başçıları yenilənməli, onları tanınmayan kadrlar, problemsiz məmurlar əvəz etməlidir.
Hakimiyyət bəzi icra başçılarına cinayət işi açmaq, onların korrupsiya dosyesini hazırlamaq planlarını da qüvvədə saxlayıb. Qarşıdakı aylarda, xüsusilə bayramdan sonra yeni proseslər cərəyan edəcək. Hətta bayramdan sonra prezident müşavirəsində hay-küylü bəyanatlar olacağı da istisna olunmur. Beləliklə, icra hakimiyyətlərində büdcə pullarını külə sovuran, daş-divara xərcləyən başçılar üçün həyəcan təbili çalınıb.
Təşviş içərisində olan icralar hərəkətə keçib, özlərini müdafiə yollarını axtarmaqda davam edirlər. Mənbənin iddiasına görə, nazirlərin rayonlarda keçirdiyi qəbulların və daxil istifadə üçün keçirilən sorğuların nəticələri analiz edilib və arzuolunmaz nəticələr ortaya çıxıb. Məlum olub ki, narazılıqların kökündə icra başçılarının yarıtmaz fəaliyyəti durur.
Siyasi hakimiyyətə etimadsızlıq mühitinin yaranması da buradan qaynaqlanır. İcra başçılarının rayonda “öz qaydaları”nı yaratması sosial narazılıqların siyasi hakimiyyətə qarşı yönəlməsinə səbəb olur ki, bu da Quba və İsmayıllı olaylarında çılpaq şəkildə ortaya çıxdı.
Prezident Administrasiyasının sosioloji sorğu xidmətinin daxili istifadə üçün keçirdiyi sorğunun nəticələri analiz edilib. Bəlli olub ki, əhalinin hakimiyyətdən narazılığının kökündə korrupsiyadan sonra ikinci yerdə məmur özbaşınalığı durur. Respondentlərin 80 faizi məmur özbaşınalığından əziyyət çəkir.
Rafiq Qara