Azərbaycan kommunistləri Putinin Krımı işğal etməsinə dəstək verdilər

Bütün dünya Rusiyanın Ukraynanı işğal etməsinə etiraz səsini ucaltdığı bir vaxtda Azərbaycanda bir qrup özünü kommunist adlandıran şəxs Putinə dəstək məktubu göndərib. Hələ də dahi Leninin kommunizm ideyalarının xülyasından ayılmayan bolşevik həmvətənlərimiz Rusiyanın Ukrayna və Suriyada sərgilədiyi mövqeyi cani-dildən bəyəndiklərini bildirib, daha sonra uzun sürən gurultulu, sürəkli alqışlarla Putin yoldaşı on yeddi dəqiqə əlli doqquz saniyə ayaq üstə alqışlayıblar. Bu barədə Azadlıq radiosuna müsahibə verən Azərbaycan Kommunist Partiyası Mərkəzi Komutəsinin 1-ci katibi (dağılasan, ay dünya) yoldaş Telman Nurullayev bildirib ki, müraciəti yaxşı ziyalılar, sovet alimləri, sovet vətəndaşları birlikdə imzalayıblar. Amma kommunistlərin lideri nədənsə bu yaxşı insanların adını çəkməyib. Düz də eləyib, yoxsa Lenin babanın ləyaqətli nəvələrinə xırda burjuaziyanın gözü dəyər.Yoldaş Nurullayev dərin məzmunlu çıxışında vurğulayıb ki, artıq Avropa ölkələrinin əksəriyyəti sosializm yolunu tutmaq üzrədir. Dahi kommunist dünyada demokrtiyanın ən inkişaf etdiyi ölkələrin adlarını da açıqlayıb. Leninin mövzoleydəki nigaran ruhuna and içən Telman müəllim deyib ki, Çin, Kuba, Korya, Vyetnam kimi ölkələr demokratiyanın simvoludur. Sən demə, Qərbin qocaman demokratiyaları artıq buksovat eləyirlər və Putin müəllimə minnət eləyirlər ki, bir-iki dənə samalsvat ZİL, ya da KAMAZ göndərsin ki, bu ölkələr də çuxurdan çıxıb inkişaf yoluna qədəm qoysunlar.
Nərimanovun, Həmid Sultanovun, Ruhulla Axundovun layiqli davamçısı olan çağdaş kommunistlərimiz Vladimir Vladimir oğlunu dürtmələyiblər ki,( Evin yıxılsın Facebook) daha bəsdir müstəqil olduğumuz, tez özünü yetirib bir SSRİ fason birlik yaradaraq biz yetimləri öz qanadının altına al. Qorbaçovun nəsil-əcabətini kommunistsayağı yad eləyən yoldaş Nurullayev SSRİ-nin dağılmasını 3 nəfər əksinqilabçının ( Belovej sazişini imzalayan Rusiya, Ukrayna və Belorus prezidentlərini nəzərdə tutur) tarixi səhvi və demokratiyaya vurulan böyük zərbə adlandırıb. Milli hisləri fontan vuran inqilabçı rəhbər bildirib ki, əgər SSRİ bərpa olunsa, Qarabağ problemi də tezliklə həll olunacaq, çünki ittifaq dağılarkən bu münaqişənin açarı səhvən yaddan çıxıb Kremldə qalıb. Düzdür, kommunistlərin yaddaşlarında bəzi qüsurların hər zaman olduğunu nəzərə alsaq, bolşevik həmvətənimizə haqq qazandırmaq olar. Çünki, Nurullayev yoldaş Qarabağ probleminin elə Rusiya tərəfindən yaradıldığını unudub.Neyləmək olar, sevginin gözləri kor olur, dahi Lenin və Putin yolunda bir Qarabağ nə olan şeydir ki, onun da razborkasını aparaq. Məgər Telman müəllimin kommunist babaları XX əsrin iyirminci illərində iyirmi min kvadrat kilometrdən çox torpaqlarımızı qardaş erməni xalqına güzəştə getmədilərmi? 37-ci ildə on minlərlə ziyalılarımız, şair və yazıçılarımız əksinqilabçı kimi güllələnmədimi? Milli kimliyimiz, dilimiz, tariximiz dəyişdirilərək kommunistləşdirilmədimi? Bütün bunların hamısı demokratiya uğrunda edilirdi, amma təəssüf ki, müstəqillik əldə etməyimiz bu parlaq əməlləri yarımçıq qoydu. Yoldaş Nurullayev uzaqgörənliklə bildirib ki, biz yalvar-yaxar mütləq Rusiyanın tərkibinə daxil olmalıyıq. Yoxsa neftimiz tükənəndən sonra Qərb ölkələri bizdən üz çevirəcək, onda iməkləyə-iməkləyə Kremlin qarşısında zar-zar ağlayacağıq.
Axşam-sabah yeni ittifaqın planlarını çızan Telman yoldaş (adamın yadına Ernest Telman düşür) deyib ki, bu birlikdə ikinci katib rus olmamalıdır. Məsləhətdir ki, bu vəzifədə mirzoyanların, mikoyanların, beriyaların nəvələrindən biri otursun ki, qardaşlıq ölkəsinin şanlı adına xələl gəlməsin.Krımda keçirilən referendumdan ruhlanan bolşevik həmvətənimiz ərz edib ki, bizdə də referendum keçirilsə, əksəriyyət Rusiya ilə birləşməyə səs verər. Kolxozçuların, zərbəçilərin, fəhlələrin, sosialist əməyi qəhrəmanlarının canına and içən KP MK-nin 1-ci katibi oliqarxlarımızı günahlandırıb ki, onlar bu ittifaqa girməyimizə mane olurlar. Yoxsa 100-150 manat müavinət alan hansı vətəndaş müstəqillik tərəfdarı olar. Uzaq qohumdan yaxın qonşu yaxşıdır deyərək Avropaya yıxılmaqdansa, Rusiyaya yıxılmağın üstünlüyünü əsaslandıran bolşevik Telman bütün oktyabryatları, pionerləri, komsomolçuları bir olmağa, yoldaş Putinin cahanşümal əməllərinə dəstək verməyə çağırıb.
Cümlə cahan proletarları birləşin! Yoldaş Nurullayevin qırmızı bayrağı altında birləşərək böyük rus xalqının qarşısında günahlarımızı etiraf edərək yeni ittifaqın yaranmasına “HƏ” deyək! Yaşasın Azərbaycan kommunistlərinin dahi rəhbəri Telman müəllim Nurullayev yoldaş!
SƏRDAR MUSA