Samir Şərifov, Abid Şərifov və İbrahim Mehdiyev əlbir olaraq
maxinasiyalar həyata keçirməyə, dövlət vəsaitini mənimsəməyə başlayıb

“Sovetski” məhəlləsinin söküntüsü kütləvi xarakter almasa da, köçhaköç davam edir. Əhalinin etirazlarına baxmayaraq, onlara kvadratına 1500 manatdan təzminat dəyişməz olaraq qalıb. Bu məhəllənin plana düşməsinin ajiotajı kimi sükutu də sirli oldu.
Hökumətin üzərinə yeriyən camaat qəflətən hücrəsinə çəkildi. Nə etirazlar var, nə tələblər. Ancaq ayrı-ayrı separat danışıqlar yolu ilə problemini həll edənlərin olduğu da istisna olunmur. Kollektiv mübarizədən imtina edənlər təklikdə işini həll etmək istəyirlər. İqtidarın isə üç məsuliyyətli məmuru “Sovetski”də “Qış bulvarı” kimi yeyintiyə yol vermək üçün plan cızıb.
Maliyyə naziri Samir Şərifov, baş nazirin müavini Abid Şərifov və Yasamalın icra başçısı İbrahim Mehdiyev əlbir olaraq maxinasiyalar həyata keçirməyə başlayıb.
Bu sensasion xəbəri verən mənbənin sözlərinə görə, üç məmur arasında gedən danışıqlarda “Sovetski” korrupsiyaya start verilib. “Qış bulvarı” layihəsi zamanı da Bakı meri Hacıbala Abutalıbov milyonlar mənimsəmişdi.
İndi eyni tendensiya bu məhəllədə yaşanır. Qaynağımız iddia edir ki, əməliyyat nəticəsində büdcədən ayrılan xərclər şişirdilib və vətəndaşlara çatacaq təzminat mənimsənilib. Vətəndaşlara isə 1500 manatdan verilməyə başlanıb.
Bakının “Sovetski” adlanan ərazisində 10 min evin sökülməsi nəzərdə tutulub. Milli Dram Teatrının yanından Hüseyn Cavid prospektinə qədər olan ərazidə köhnə tikililərin sökülməsi və böyük bir parkın salınması nəzərdə tutulur. Bu layihə əslində Respublika Sarayının arxasından Milli Dram Teatrının yanınadək inşa edilən Qış Bulvarı layihəsinin davamıdır, öncədən planlanmışdı.
Qış Bulvarı ərazisində söküntü işləri aparılan zaman baş verənlər yaddaşlardan hələ də silinməyib və eyni qanunsuzluqların yenidən təkrarlanacağı qorxusu yaşanır. “Sovetski” kimi tanınan ərazisində söküləcək tikililər Çingiz Mustafayev küçəsindən başlanacaq.
Ç.Mustafayev küçəsindən Süleyman Rəhimov küçəsinə qədər ərazini əhatə edəcək ilkin söküntü bumu hissə-hissə başqa küçələrə də çatacaq. Bəşir Səfəroğlu küçəsindəki tək nömrəli evlər, Çingiz Mustafayev küçəsində hamısı, Vidadi, Mirzağa Əliyev küçələrində cüt nömrəli evlər, Murtuza Muxtarov, Abdulla Şaiq, Zərgərpalan və “Sovetski”də bütün evlər yerlə-yeksan olunacaq.
Söküntü işlərinə hələ start verilməmiş korrupsiya maşını indidən işə düşüb. Artıq indidən sökülən evlərin hər kvadratmetrinə görə 1500 manat təzminat veriləcəyi bəllidir. Bu məsələdə istisnalar olmasaydı, korrupsiya risklərinin minimuma enəcəyini söyləmək olardı. Ancaq təəssüf ki, Bakı şəhər İcra Hakimiyyətinin müəyyən etdiyi qaydalar bu prosesdə də korrupsiya elementlərinin zəngin olacağından xəbər verir.
Ümumiyyətlə isə, korrupsiyada İbrahim Mediyevin qanundankənar əməllərindən, rüşvətxorluğundan, bizneslə məşğul olmasından, rayon ərazisində olan torpaqların tamamilə satılıb mənimsənilməsindən, rayonun bir neçə yerində şadlıq sarayları tikib ondan külli miqdarda qazanc əldə etməsindən, rayonun bütün idarə, müəssisə və təşkilatlarında rüşvətxorluğu və korrupsiyanı şişirtməklə pul qazanmasından, öz qohum - əqrəbasını rayonun müxtəlif təşkilatlarına rəhbər və digər vəzifələrə cəlb etməsindən geniş bəhs etməyə ehtiyac yoxdur.
İbrahim Mehdiyevə asan və çox qazanc gətirən sahələrdən birinin rayon ərazisində fəaliyyət göstərən küçə ticarəti obyektlərinin olduğu məktubda xüsusi olaraq göstərilir. Rayon ərazisindəki bütün küçə və xiyabanlarda, prospekt və parklarda fəaliyyət göstərən ticarət obyektlərində hökm sürən anarxiya, anti - sanitariya, özbaşınalıq və qayda - qanunsuzluq məhz İbrahim Mehdiyevin maddi marağının və ehtirasının təmin olunmasının nəticəsinin eybəcər məhsuludur.
Rayonun ərazisində özbaşınalıq hədd və sərhəd tanımır. Ona görə də “Sovetski” də təxmini hesablamalara görə, söküntü işlərinə və sakinlərin köçürülməsinə 1 milyard manatdan çox vəsait xərclənəcək.
10 min sakinin hər birinə orta hesabla 100 min manat təzminat verilsə, deməli, təkcə təzminat xərcləri 1 milyard manatdan az olmayacaq. Görünür, zəngin korrupsiya təcrübəsinə sahib olan məmurlar “Sovetski”də fərqli yeyinti texnologiyası tətbiq etmək niyyətindədirlər.
Bakının “Sovetski” məhəlləsində ticarət-iaşə obyektlərinin sahiblərinə 1 kv.m üçün hansı miqdarda vəsait ödəniləcəyi hələ müəyyənləşməyib.
Bunu Bakının “Sovetski” məhəlləsinin köçürülməsi ilə bağlı yaradılmış Köçürmə Komissiyasının üzvü, Yasamal rayon İcra Hakimiyyəti başçısının müavini Səməd İslamov deyib. S.İslamov 1 kv.m üçün 1500 manat vəsaitin mənzillər üçün müəyyənləşdirilərək Nazirlər Kabinetində təsdiqləndiyini bildirib.
ƏDALƏT