Müdafiə Nazirliyində post-Əbiyev dövrü də “qara statistika” və ordunun
morqa çevrilməsi ilə müşahidə olunur; yeni nazirin qruplaşması prezidenti aldadır

Zakir Həsənov müdafiə naziri təyin olunduğu tarixdən ordudan tabutların evlərə göndərilməsi azalmayıb ki, artıb. Yeni nazir sələfinin qoyduğu sistemin idarəçiliyində etdiyi dəyişikliklər yalnız kadrlardan ibarət oldu. O da öz adamlarını yan-yörəsinə toplayıb, tayfa-klan idarəçiliyi yaratmaq təşəbbüsüdür. Səfər Əbiyevdən sonra da orduda qırğınlar dayanmayıb, əsgər qətlləri, səhlənkarlıqdan ölüm halları, intiharlar və s. özbaşınalıqlar davam edir.
Bunu statistika da təsdiqləyir. 2014-cü ilin yanvarından aprelin 14-dək Azərbaycan təhlükəsizlik və müdafiə sektorunun itkiləri 28 nəfər təşkil edib. Ötən müddətdə 35 nəfər yaralanıb və ya xəsarət alıb. Həmin dövrdə vəfat edənlərdən 6-sı döyüş (erməni gülləsi), 3-ü mina partlayışı, 19-u isə qeyri-döyüş itkiləridir.
3 nəfər avtoqəzadan, 1 nəfər naməlum səbəbdən, 3 nəfər qeyri-nizamnamə (qanunazidd) hərəkətlərindən, 3 nəfər xəstəlikdən dünyasını dəyişib. 9 nəfər intihar edib (asma, güllələmə, intihar). Dünyasını dəyişənlərin 25-i Müdafiə Nazirliyinin, 3-ü Ədliyyə Nazirliyinin hərbi qulluqçularıdır.
Müdafiə Nazirliyindəki qaynaqlardan “Gündəm-xəbər”ə sızdırılan xəbərdə qeyd olunur ki, nazir orduda dedovşina hallarının azalması ilə bağlı ilk günlərdə əmr verib. Orduda nizam-intizam yaradılması, qayda-qanun bərqərar olunmasına təlimat verib.
Bir müddət sonra başı kadr dəyişikliklərinə qarışan nazir, artıq ordudakı itkiləri və verdiyi tapşırıqları unudub. Bu da onun əmrinin qüvvədən düşməsinə gətirib çıxarıb ki, hazırkı son statistikada öz əksini tapıb.
Qaynağımız deyir ki, Z.Həsənov dövründə qeydə alınan itkilər post-Əbiyev dönəminin davamıdır. Müdafiə Nazirliyinin rəhbərliyi nazirlikdə bir dostlar klubu yaradıb və bu dostlar klubunda da özlərinə yaxın olan dostları, yoldaşları vəzifələrə təyin etməklə öz işlərini bitmiş hesab edirlər. Azərbaycan ordusu isə tamamilə yaddan çıxıb.
Ordumuzda kifayət qədər sosial yönümlü problemlər var ki, hörmətli generallarımız nədənsə bu problemlərlə məşğul olmaq istəmirlər. Kimisə gətirib vəzifəyə qoymaq onları daha çox maraqlandırır. Bütün bunlar da son nəticədə ordumuzda baş verən ölüm hallarının artmasına gətirib çıxarır. Zakir Həsənovun Azərbaycan ordusuna gətirdiyi yenilik ondan ibarətdir ki, hər hansısa bir hadisə olanda Müdafiə nazirliyinin rəhbərliyi mərhumun ailəsinə dərin hüznlə başsağlığı verir və bununla da işlərini bitmiş hesab edirlər.
Yenilik yalnız bundan ibarətdir. Bu gedişlə də Müdafiə nazirliyi heç bir kardinal dəyişikliyə nail olmayacaq. Hərbi hissələrdə təcili olaraq psixoloq ştatlarının yaradılmasına ehtiyac var. Çünki, bu gün Azərbaycan cəmiyyətində kifayət qədər psixoloji problemləri olan gənclər var. Ona görə ki, orta məktəblərdə gənclərin psixoloji hazırlığına diqqət ayrılmır və son nəticədə də zərbə Azərbaycan adlı dövlətə dəyir.
Ona görə də hərbi hissələrdə psixoloq ştatlarının yaradılmasına ciddi ehtiyac var. Belə psixoloq ştatları və yuxarıda qeyd etdiyimiz problemlər həll olmayana qədər biz əsgərlərimizi, balalarımızı itirə - itirə gedəcəyik. Müdafiə Nazirliyi və aidiyyatı qurumlar azacıq da olsa bu məsələyə vicdanla yanaşsalar baş verən faciələrin xeyli hissəsinin qarşısını almaq olar. Ancaq çox təəssüf ki, onlar bu məsələ ilə maraqlanmırlar.
Zakir Həsənov adı rüşvət və korrupsiyada hallanan şəxsləri nazirlikdə yüksək vəzifələrə çəkməklə məşğuldur. Bacarıqsız generalların yüksək vəzifələrə çəkilməsi isə son nəticədə Azərbaycan ordusunda ölüm hallarının artmasına gətirib çıxarır.
Artıq 2014-cü il girəndən elə bir gün olmayıb ki, orduda bədbəxt hadisə baş verməsin, ölüm halları olmasın. Çünki Müdafiə Nazirliyinin rəhbərliyinin başı tamamilə başqa işlərə qarışıb. Adını da qoyublar ki, prezident orduda islahatlar aparmağı bu şəxslərə tapşırıb. Əgər onlar orduda islahatı belə aparacaqlarsa, heç düşmənə ehtiyac qalmayacaq.
Zakir Həsənov və onun komandası prezidenti yalançı çıxartmağa çalışır.