Hesablama palatası Səhiyyə Nazirliyində müdhiş yeyinti faktları aşkarladı

Nazir vəziyyətdən çıxmaq üçün “günah keçisi” axtarır

Dünən aldığımız məlumatlarda Səhiyyə Nazirliyi ilə bağlı kifayət qədər müdhiş faktlar və rəqəmlər vardı. Rəqəmlər dövlət büdcəsindən səhiyyəyə ayrılan vəsaitlərin talan edilməsini əks etdirirdi.
Hesablama Palatasının auditi zamanı ən ciddi korrupsiya hallarından biri Səhiyyə Nazirliyinin İnnovasiya və Təchizatı Mərkəzində müəyyən olunub. Kiçik bir mərkəzdə büdcə talanının həcmi 100 min manata yaxındır. Əsas mənimsəmə halları isə “Şəkərli diabet üzrə Proqram”ın, “Ana və uşaqların sağlamlığının qorunması üzrə Tədbirlər Proqramı”nın, “Vərəmlə mübarizə üzrə Tədbirlər Proqramı”nın, “Yolxucu xəstəliklərin immunoprofilaktikasına dair Tədbirlər Proqramı”nın, “Xroniki böyrək çatışmazlı üzrə Təbirlər Proqramı”nın icrası zamanı üzə çıxıb. Belə ki, büdcə vəsaitləri hesabına alınan preparatlar xəstələr üçün pulsuz paylanması nəzərdə tutulsa da, bu işlər həyata keçirilməyib. Bir tibb müəssisəsində bir şəkərli diabet xəstəsinə düşən xərc şişirdilmiş, bir sıra müəssisələrdə isə bir xəstəyə düşən xərc müxtəlif olub.
2013-cü ildə HİVAİDS-nin qarşısının alınması və müalicəsi üçün nəzərdə tutulan dərman preparatları və vaksinlərin böyük əksəriyyəti istifadə olunmadığı müəyyən edilib.
Səhiyyə Nazirliyinin Elm Tədqiqat, Mamalıq və Ginekologiya İnstitutunda aparılan yoxlamalar zamanı müəyyən olunub ki, bir nəfərə düşən qida normalarının düzgün tətbiq edilməməsi nəticəsində artıq məhsulların silgisinə yol verilib, işçilərin adına əlavə əmahkaqqı yazılıb. Avtomobillərin cari təmirdə olduğu halda, həmin günlərdə onların yanacaq sərfiyyatı haqqında qanunsuz sənədləşmə aparılıb. Həmçinin, təyinatdankənar dərman, sarğı ləvazimatlarıvə materialları silinib. Audit dövründə institutda təqribən 65 min manatlıq büdcə vəsaitinin mənimsənildiyi üzə çıxıb.
Xəstəxanalarda “xəstə yeməyi”
Hesabat dövründə 3 saylı Şəhər Klinik Xəstəxanasında aşkar olunan mənimsəmə halının həcmi isə 115 min manata yaxın olub. Əsas qanun pozuntusu isə mal və xidmətlərin alışı zamanı tender qaydalarının əməl edilməməsi zamanı baş verib. Bütün dövlət müəssisələrində olduğu kimi, burada da işçilərin adından artıq əməkhaqqları yazılaraq böyük həcmdə pullar silinib. Hesablama Palatasının təqdim etdiyi 115 min manat isə, əlbəttə ki, baş verən korrupsiya hallarının cüzi bir hissəsidir. Sabirabad rayon Xəstəxanasında da balansda olan avtomobillərə normadan artıq ehtiyat hissələri silinib, mal-material qiymətlərinin inventarizasiyası zamanı əskikgəlmə və artıqgəlmə halları müəyyən edilib. Bununla büdcəyə dəyən zərər nə az, nə çox 47 min manat civarında olub. Bu gün digər gəlirli sahələrdə olduğu kimi dərman-aptek biznesində də çox ciddi inhisarlaşma hökm sürür. Son günlər səhiyyə nazirliyi adından guya ki, dərman bazarının kontrola alınması məqsədilə atılan addımların da böyük əksəriyyətinin məhz dərman biznesi monapolistlərinin maraqlarına xidmət etməsi kimsə üçün sirr deyil.
Xatırladaq ki, bu gün dərman bazarında iki əsas favorit güc var: “Avromed” və “RiyadFARM”. Doğrudur, bu gün imkanlarına görə millət vəkili Cavanşir Feyziyevin rəhbərlik etdiyi “Avromed” daha geniş miqyası əhatə edir ki, bu da sırf olaraq səhiyyə nazirliyinin birbaşa olaraq deputatın şirkətinə dəstək verməsi ilə əlaqədardır. Təsadüfi deyil ki, hazırda dərman bazarının az qala yarısından soxu “Avromed”in nəzarəti altındadır. Bu gün səhiyyə nazirliyinin özü başda olmaqla, bu qurumun xətti ilə digər nazirlik və dövlət qurumlarının dərman təchizatı işi də məhz “Avromed” tərəfindən həyata keçirilməkdədir ki, bu da son nəticədə sözügedən şirkətin monapolistə çevrilməsinə gətirib çıxarıb.
Maraqlıdır ki, mərhum Aqil Əliyevin oğlu - İlqar Əliyevə məxsus olan “RiyadFARM”a belə bir şərait yaradılmır. Bu barədə açıqlama verən mötəbər mənbələr məsələni bu şəkildə izahlayırlar ki, əslində İlqari Əliyevin özü də bu məsələdə bir o qədər maraqlı görünmür: “Çünki bir neçə biznes sahəsinə baş vuran İlqar Əliyev üçün “RiyadFARM” başlıca hədəf olmadığından o, səhiyyə nazirliyinin “RiyadFARM”ın əsas rəqibi olan “Avromed”ə dəstək verməsinə göz yumur”.
Bildirək ki, səhiyyə nazirinin müavini Elsevər Ağayev birbaşa olaraq bu işdə maraqlı tərəf kimi çıxış edir və deputat Cavanşir Feyziyevlə həm dostluq və həm də işgüzar əlaqələri bu gün qosqoca nazirliyi bir şirkətin keşikçisinə çevirib. Məlumatlara görə, bu iki şirkətlə yanaşı, “QafurFARM” da dərman bazarında ciddi paya malikdir və səhiyyə nazirliyinin bəzi yetkililəri tərəfindən dəstəklənən bu şirkətin dərman bazarında təxminən 15-20 faizlik imkanlarının olduğu söylənilir.
Oqtay Şirəliyevin baş pulyığanı kimdir?
Bununla bağlı redaksiyamızı bilgiləndirən səhiyyə nazirliyindəki məlumatlı mənbənin iddialarına görə, bu gün adları çəkilən hər üç şirkət əslində səhiyyə nazirliyinə dövlət büdcəsindən dərmanların alınması üçün ayrılan milyonlarla vəsaitin həzm-rabedən keçirilməsi üçün bir vasitədir. Hətta, birbaşa olaraq əsgərlərimizin can təhlükəsizliyi mövzusuna cavabdeh olan Müdafiə Nazirliyinin Tibb İdarəsi də məhz səhiyyə nazirliyindəki dəllal çevrənin təhriki ilə həmin üç şirkətlə çalışmaq zorundadır.
Mənbəmiz bu arada səhiyyə nazirliyindəki dərman dəllalları ilə bağlı maraqlı faktları da açıqladı. Məlumatlardan belə aydın olur ki, sən demə, böyüklüyündən-kiçikliyindən asılı olaraq bu gün nazirlik adından bütün apteklərdən aylıq “dolya” alınırmış: “Bəzi yerlərdə aylıq haqqın qiyməti 2000 manata çatsa da, əksər yerlərdə 200-500 manat arası təşkil edir. Amma elə yerlər də var ki, 1000-1500 manat arası pulu hər ay səhiyyə nazirliyinin pulyığanlarına çatdırmaq zorundadırlar. Əks halda, nazirliyin “qara siyahısı”na düşərlər və sonra da müxtəlif bəhanələr altında həmin apteki bağlayarlar”.
Mənbəmiz bildirir ki, bu işə nazirlikdə birbaşa olaraq səhiyyə nazirinin müavini Elsevər Ağayev nəzarət edir. Bildirək ki, əslində, Elsevər Ağayevin bu gün nazir Oqtay Şirəliyevin kassiri qismində çıxış etməsi heç də təəccüblü deyil. Çünki əksəriyyət onu yaxşı tanıyır və hər kəsə məlumdur ki, hazırda məhbəs həyatı yaşayan keçmiş səhiyyə naziri Əli İnsanovun da zamanında kassirliyini etmiş Elsevər Ağayev neçə-neçə xəstəxana ərazisinin satılıb, pulunun mənimsənilməsi prosesində də ad çıxarıb.
İndi isə onun xidmətlərindən Oqtay Şirəliyev istifadə edir. Bu isə o deməkdir ki, artıq Oqtay Şirəliyevin nədən Elsevər Ağayevə qıymamasının səbəbləri də bəlli olur. Çünki Elsevər Ağayev bu gün nazirlikdə qalan yeganə kadrdır ki, həm də Əli İnsanovla bərabər çalışıb. Deməli, Oqtay müəllimə öz işini yaxşı bilən kadrlarla yanaşı, həm də Elsevər Ağayev kimi pul işini yaxşı bilən kadrlar da lazım imiş.
Onu da bildirək ki, birbaşa olaraq səhiyyə nazirliyində qərarlaşan dərman mafiyası ilə bağlı redaksiyamıza yeni əlavə faktlar da daxil olub. Araşdırmalarımız davam edir. Yaxın vaxtlarda həmin materialları da diqqətinizə çatdıracağıq. Qarşı tərəfin mövqeyini işıqlandırmağa hazırıq. Bizi izləməkdə davam edin...
R.Əlicanlı