Bakı şəhər Baş Səhiyyə İdarəsinin rəis müavininin qanunsuz əməllərinə “dur” deyən tapılmır

Azərbaycan səhiyyəsinin acınacaqlı durumu, bu sistemdə hökm sürən rüşvət və korrupsiya halları barədə çox deyilib, çox danışılıb. Dövlət büdcəsindən hər il külli miqdarda vəsaitin ayrılmasına baxmayaraq, səhiyyə sistemi ən problemli sahə olaraq qalmaqdadır. Elə bu günlərdə Hesablama Palatasının açıqladığı hesabatda aparılmış auditin nəticəsində üzə çıxarılmış korrupsiya faktları öz əksini tapmışdı. Acınacaqlısı odur ki, dövlətin milyonlarla vəsaiti hesabına alınan və bir çox xəstələrə pulsuz paylanmalı olan dərman preparatları məsuliyyətsizlik ucbatından ünvanlarına çatdırılmayıb, ambarlarda yığılıb qalıb. Dərmanların paylanıldığı xəstəxanalarda isə balans gözlənilməyib, bəzilərinə lazım olduğundan çox, bəzilərinə isə az miqdarda göndərilib. Təbii ki, bunun adı təkcə məsuliyyətsizlik yox, həm də insan talelərinə biganəlikdir. Səhiyyə sistemində rəhbər postlarda oturan bir çox məmurlar isə daha çox şəxsi mənafelərini təmin etmək, əllərinə düşən fürsətdən yararlanmaq niyyətindədirlər. Belə məmurlar səhiyyə sistemində özbaşınalığın yaranmasına, rüşvət və korrupsiyanın çiçəklənməsinə şərait yaradırlar. Az-çox uğurlar qazanan özəl klinikalara belə “işbaz” səhiyyə məmurları tərəfindən elə divan tutulur ki, onlar ya bağlanmaq təhlükəsi ilə üz-üzə qalır, ya da qoyulan şərtlərlə razılaşmalı olurlar. Lisenziya almaq üçün edilən müraciətlərə müxtəlif süni maneələr yaradılır, yüksək məbləğdə rüşvət tələb olunur. Təsadüfi deyil ki, belə total rüşvət və korrupsiyanın əsarətində boğulan Azərbaycan səhiyyəsi dünyada ən bahalı səhiyyə sistemlərindən hesab olunur. Səhiyyə Nazirliyinin lisenziyaların verilməsi üzrə komissiyası özəl tibbi müəssisələr üçün keçilməz səddə çevrilib. Özəl klinikaların qarşısında elə şərtlər qoyulur ki, həmin şərtlərə heç dövlət xəstəxanalarında belə riayət olunmur. Komisiyyanın rəhbəri Rəşad müəllimin isə qəbuluna düşmək müşkül məsələdir. Çünki, Rəşad müəllim hər “xırda-para” işlərə vaxt ayırmır. Elə dəfələrlə onun qəbuluna düşmək istəsək də, nədənsə məqsədimizə nail ola bilmədik.
Səhiyyənin ümumi problemlərinin daha dərin kök saldığı Bakı şəhər səhiyyə sisteminin vəziyyəti də ürəkaçan deyil. Paytaxtın səhiyyə infrostrukturunun təşkilinə, bu sahəyə rəhbərliyə cavabdeh olan Bakı şəhər Baş Səhiyyə İdarəsi isə daha çox şəxsi maraqların təmin olunduğu, konkret şəxslərin mənafelərinin qorunduğu bir təşkilata çevrilib. Baş Səhiyyə İdarəsinin rəis müavini Rauf Nağıyev burada özünə məxsus idarəetmə sistemi formalaşdıraraq səhiyyəmizin inkişafına öz “töhfələrini” verir. 2011-ci ilə qədər Bakı şəhər Təcili və Təxirəsalınmaz Tibbi yardım Stansiyasında baş həkimin müavini olan Rauf Nağıyev sonradan “xidmətlərinə” görə mükafatlandırılaraq paytaxtın baş səhiyyə idarəsinə rəis müavini gətirilir. Onun Bakı şəhər TTTYS-da baş həkimin müavini olduğu dövr fəaliyyətinin “xüsusi mərhələsini” təşkil edir. Bu dövr rüşvətxorluğun pik həddə çatdığı, tibbi yardım stansiyalarında dərin kök saldığı illərdir. Bu “çiçəklənmə mərhələsində” Rauf Nağıyevin xüsusi “əməyi” var. Lakin, belə “səmərəli” fəaliyyətdən sonra o, hansısa vasitələrlə iş yerini daha yüksək posta dəyişməyə müvəffəq olur.
Rəis müavini təyin olunan Rauf Nağıyev işə başlar-başlamaz öz qanunlarını diqtə etməyə başlayır. Ətrafına yaxınlarını toplayaraq Bakının səhiyyə sistemində monopoliya yaradan rəis müavini yeni idarəetmə strukturu formalaşdırmağa nail olub. Onun daha çox hədə-qorxu, təhdid dili ilə danışmasını tabeliyində olanlar çox gözəl bilirlər. İradlarını bildirənlərə “hara istəyirsən, kimə istəyirsən şikayət edə bilərsən” deməsi isə onun artıq ölkə qanunlarını bir heç sanması, onlara məhəl qoymaması anlamına gəlir. Ötən il bir qrup həkimin ölkə prezidentinə ünvanladığı müraciətdə Rauf Ağayevin hansı metodlarla idarəçilik həyata keçirdiyini tam aydın görmək olar. Həmin müraciətdə bir qrup həkimin Rauf Nağıyevin qəbulunda üzləşdikləri təhqirlər, hədələr göstərilmişdi. Hətta qadınları belə təhqir etməkdən çəkinməyən bir məmurdan hansı humanizmi, xalqa məhəbbəti gözləmək olar? Paytaxtın səhiyyə müəssisələrində hökm sürən rüşvətxorluq və korrupsiya hallarına biganəlik göstərən, bəlkə də bu hallara rəvac verən Rauf Nağıyev özünü bu qədər toxunulmaz hesab etməyə gücü haradan və kimdən alır görəsən? Hər halda onun Bakı şəhər Baş Səhiyyə İdarəsinə rəis müavini gəldiyi gündən burada hansısa uğurdan danışmaq bulanıq suda balıq axtarmağa bərabərdir. Və yaxud onun apardığı kadr “islahatları”ndan biri haqqında elə Səhiyyə Nazirliyinin rəsmi Facebook səhifəsində informasiya yerləşdirilib. Məlumatda göstərilib Bakı şəhəri Təcili Tibbi Yardımın 19 saylı stansiyasının müdiri olan Arzu Qurbanova 2005-ci ildə 4 saylı köməkçi stansiyadan “saxta sənəd düzəltmə” ittihamı ilə işdən azad olunub. Bir ilə yaxın işsiz qaldıqdan sonra Rauf Nağıyevin köməkliyi ilə 19 saylı Təcili Tibbi Yardım stansiyasına müdir vəzifəsinə keçirilib. Görəsən, əvvəlki iş yerindən saxta sənəd düzəltmə maddəsi ilə azad olunan bir şəxsi Rauf Nağıyev hansı meyarlara əsaslanaraq rəhbər vəzifəyə gətirib? Bu onun tutduğu vəzifədən hansı məqsədlərlə istifadə etdiyini göstərir. Paytaxtın ayrı-ayrı səhiyyə ocaqlarında onun himayə etdiyi imtiyazlı kadrlar ordusu fəaliyyət göstərir. Belə kadrlar üçün heç bir qanun, göstəriş mövcud deyil. Onlar yalnız Rauf Nağıyevin əmrlərinə tabedirlər. Vəzifə səlahiyyətlərindən istifadə edən R.Nağıyev öz doğma bacısını da unutmayıb. Qardaşının köməkliyi ilə paytaxtın səhiyyə müəssisələrindən birində rəhbər vəzifəyə təyin olunan İradə Musayeva da Azərbaycan səhiyyəsinə öz “əvəzsiz xidmətlərini” göstərir.
Hesablama Palatasının apardığı auditin nəticəsində paytaxtın səhiyyə müəssisələrində xeyli sayda “ölü ştatların” olduğu üzə çıxarılıb. Maraqlıdır ki, bütün şəhər səhiyyəsini nəzarətdə saxlayan Rauf Nağıyev belə faktları görmürmü?
Ölkə başçısının sərəncamı ilə bu il fevralın 17-dən Azərbaycanda əhalinin icbari müayinəsi həyata keçirildi. Lakin, daha çox pul almağa öyrənmiş həkimlər belə pulsuz müayinələrə o qədər də həvəs göstərmədilər. Müayinələrin başdansovdu, tezbazar həyata keçirilməsi, daha çox statistika xatirinə aparıldığı barədə çoxsaylı məlumatlar yayıldı. Bu işdə Bakı şəhər Baş Səhiyyə İdarəsinin də nəzarətsizliyi özünü büruzə verdi. Dəfələrlə rəis müavini Rauf Nağıyevə bu barədə məlumatlar verilsə də konkret addımlar atılmadı. Tez-tez mətbuat səhifələrində kompaniyanın uğurla aparılmasına dair hesabatlar verən R.Nağıyev baş verən neqativliklərə göz yumaraq əslində hər şeyin “plan doldurmaq” xatirinə olduğunu göstərdi.
Vəzifə pillələrində sürətlə irəliləyən Rauf Nağıyevin ambisiyaları hələ də bitmək bilmir. Əldə etdiyimiz məlumatlara görə, daha yüksək postları hədəfləyən rəis müavinini indiki statusu artıq qane etmir. Nazirlikdə mühüm bir kresloya iddia edən R.Nağıyev məqsədinə çatmaq üçün gərgin iş aparır.
Bu gün səhiyyə sistemi daha çox məmurların şəxsi maraqlarına qurban verilərək acınacaqlı duruma düşüb. Rauf Nağıyev kimi “səhiyyə xadimləri” öz sahələrində yol verdikləri qanunsuzluqlarla Azərbaycan tibbini məhv olmaq təhlükəsi ilə üz-üzə qoyublar. Qeyd etdiyimiz kimi, daha böyük kürsülərə iddia edən Nağıyevin gələcək fəaliyyətinin səhiyyəmizə nələrə başa gələcəyini düşünmək belə qorxuludur. Bu barədə lazımi şəxslər və qurumlar əməli addımlar atmasalar sonra gec ola bilər. Özü də çox gec!
Nicat Mahmudov