Ziya Məmmədov özünə və ailəsinə qarşı kampaniyanın gedişində övladının
zədələnmiş reputasiyasını necə bərpa edə və hadisələrdən yayındıra bildi? - təfsilatı

Hər şey bir yana qalsın, bu proseslərin içərisindən ən sağlam çıxan Anar Məmmədov oldu. Söhbət Məmmədovlar klanına qarşı başlanmış piar kampaniyanın gedişində nazir oğlunun özünü hədəfdən yayındıra bilməsindən gedir.
Nəqliyyat naziri Ziya Məmmədov oğlunun hadisələrdən uzaq tutmaq, imicini müsbət xarakterizə etdirmək, zədələnmiş reputasiyasını bərpa etmək planları qismən baş tutub. Bu barədə hadisələri “Gündəm-xəbər”ə şərh edən qaynağımız qeyd edir ki, hələ 1 milyonluq ayı kababı məsələsi ortaya çıxanda nazirin başı uzun müddət ağrıdı. Amma nazir balasını qoruya, nəzərdən saxlaya, medianın və ictimaiyyətin qınağından yayındıra bildi. Əldə etdiyimiz xəbərə görə, nazir balasının ABŞ-da lobbiçilik fəaliyyətinə başlaması onun qara zolaqdan çıxışına yardımçı olub.
Nazir oğlunun Amerikada Azərbaycanla bağlı apardığı işlər, Xocalı soyqırımı və digər təbliğatı işlərdə iştirakı onu ölkə rəhbərliyinin gözündə qaldırıb. Hətta prezident nazirə “bax, mən bütün uşaqları belə görmək istəyirəm” deyib.
Prezidentin məmnunluğunu oğlunun diqqətinə çatdıran nazir həm sevincək olub, həm də prosesdən sağlam çıxmasını təmin edib. Nazir oğlunun nəzərinə çatdırıb ki, davam etsin, köhnə işlərə qayıtmasın və vəziyyət ağırdır deyə indiki məqamda “çp” buraxmasın.
Həqiqətən də Anar Məmmədov artıq özü haqda formalaşdırdığı mənfi obrazı darmadağın etmək üzrədir və Amerikada lobbiçiliklə müsbət imic qazanmağa nisbətən müvəffəq olub.
Qaynağımız qeyd edir ki, Anar Məmmədovla bağlı Ziya Məmmədovun strateji planlarında oğlunun siyasi səhnəyə transferi xüsusi yer tutur. Bu özündən sonra varis anlamında yox, gələcəkdə, ölkənin idarəçiliyində iştirak istəyindən doğan bir hirs kimi başa düşülməlidir. Çünki nəqliyyat naziri ömürlük bu postda oturacaq biri olmadığının fərqindədir və rəqibi kimi onun da oğlunun aparıcı fiqur olması lazımlıdır.
Eyni zamanda, Anar Məmmədovun ABŞ-ın siyasi dairələri ilə tanış edilməsi də həmin gələcək planın reallaşdırılması üçün körpü funksiyasını həyata keçirmək niyyətindən irəli gələ bilər. Amma Ziya Məmmədovun sonunu yaxınlaşdıran bir təhlükə var ki, onu dəf etmək gərəkdir. Bu da son dövrlər mətbuatda geniş yayımlanan “avtoş”luq məsələsidir.
Nazirin deputat qardaşı Elton Məmmədovun oğlu Aynar Məmmədovun bahalı maşınlarda “avtoşluq” etməsi, onun ümumiyyətlə, Azərbaycanda “avtoşlar”a dəstək verən xarici qurumlarla əlaqəsinin üzə çıxması, ən əsası isə bunları əks etdirən videokadrların meydana çıxması nəqliyyat nazirini çıxılmaz vəziyyətə salıb.
Üstəlik, bu əsnada “Yeni Müsavat”ın müxbiri Fərahim İlqaroğlunun məhz Aynar Məmmədovun dostu tərəfindən döyülməsi işləri lap korlayıb. Bu işin ucundan tutub, ucuzluğa gedilməsi isə təkcə Ziya Məmmədovun deyil, həm də qardaşı Elton Quliyevin karyerasının sonu demək olacaq. Məmmədovlara qarşı kampaniyanın ona antaqonist olan qüvvələr tərəfindən körüklənməsi isə işini çətinləşdirib.
Xatırladaq ki, prezident İlham Əliyev dəfələrlə müşavirələrdə etdiyi çıxışları zamanı məmurlara xəbərdarlıqlar edib. İsmayıllı olaylarından sonra daha da intensiv şəkil alan bu xəbərdarlıqların ən başlıcası məmurların övladları və onların bütün sərhədləri aşması ilə bağlı idi. Məsələn, İsmayıllı hadisəsindən sonra icra başçısı işdən çıxarıldı və bir müddət sonra hadisənin günahkarı sayılan nazir oğlu da cəzalandırıldı.
Bunun ardından nazir Fizuli Ələkbərov da işdən çıxarıldı. Eyni aqibəti həmçinin oğlu “avtoşluq” edərkən 2 nəfərin həyatına son qoymuş Xəzər Dəniz Gəmiçiliyi İdarəsinin rəis müavini də yaşadı. Analoji durum faktiki olaraq Ziya Məmmədov üçün də yaşanır.
Sadəcə, Ziya Məmmədovun tutduğu mövqe və hələ ki gücünün yerində olması bu prosesi yubatmaqdadır. Amma bunun nə qədər vaxt aparacağını demək çətindir. Çünki tezliklə eyni vəziyyət nəqliyyat naziri üçün də yaşana bilər.
Rafiq Qara