Astara və Beyləqanın icra hakimləri istefaya göndərilə bilər;
Qəzənfər Ağayev və Vaqif Abdullayev təşviş içindədir

Astara və Beyləqanın icra başçıları istefaya göndərilə bilər. Bu barədə “Gündəm xəbər”ə verilən məlumatda qeyd olunur ki, Qəzənfər Ağayev və Vaqif Abdullayevin adı istefaya gedəcək məmurlar siyahısına salınıb.
Qəzənfər Ağayevin pul qazanmaq üçün müxtəlif variantlara əl atması haqda şikayətlərin çoxalması ondan narazılıq yaradıb. Rayonda gəlirli sahələri bütünlüklə ələ keçirən icra başçısının yeni planı isə təhsil işçilərini talamaqdan ibarətdir.
Qəzənfər Ağayevin göstərişinə əsasən, Astara təhsil şöbəsinin müdiri orta məktəblərdə dərs deyən hər bir müəllimdən qəzetlərə abunə olunması adı altında 22 manatdan pul yığılır. Belə ki, hazırda Astarada 2500 nəfər müəllim çalışır və onların hər birindən 22 manat alındıqda, bu təqribən 55 min manat vəsait edir. Müəllimlər isə deyirlər ki, heç kim bu qərara etiraz edə bilmir.
Həmçinin, Astarada Sosial Müdafiə Fondunda müavinətlər yoxsul təbəqəyə çatmır. Rayonda ciddi narazılıq var. Beyləqanın başçısı Vaqif Abdullayevdən də çoxsaylı şikayətlər Prezident Administrasiyasına göndərilir. Hakimiyyətin yuxarı dairələrində yenidən əyalətlərdəki vəziyyət müzakirə olunur. Bu müzakirələrdə istefa, təyinat və yerdəyişmə barədə qərarlar qəbul olunur. PA-dakı analitiklər Astara və Beyləqanın icra başçılarının adlarını siyahıya əlavə ediblər. Çünki bu regionlarda etirazlar gözləniləndir.
Prezidentə çatdırılan dosyedə hər iki başçının rayonlarda əhalini incitdiyi qeyd olunub. Beyləqan rayonunda icra başçısının zülmü davam edir. Vaqif Abdullayev sanki bu rayonun sakinlərini ölkə başçısından narazı salmaq üçün çalışır.
Hətta icra başçısının qəbuluna düşmək üçün icra hakimiyyətinin binasına gələn vətəndaşlar başçının göstərişi ilə qəbula buraxılmırlar. Yerlərdə özlərini külli-ixtiyar sahibi kimi aparan bəzi icra başçılarının qanunsuz əməlləri ilə bağlı çox yazılıb.
Onlarla icra başçısı isə bu kimi əməllərinə görə, sərt şəkildə cəzalandırılıb, vəzifələrini itiriblər və s. Amma deyəsən, görülən bu tədbirlər yerlərdəki qanunsuzluqları tam olaraq aradan qaldırmaqda acizdir. Belə olmasaydı, ayrı-ayrı icra başçılarının qanunsuz əməlləri ilə bağlı yeni faktların şahidi olmazdıq. Məlumat üçün bildirək ki, bundan əvvəl Xızı rayonuna rəhbərlik etmiş Vaqif Abdullayev Beyləqan rayon icra hakimiyyətinin başçısı vəzifəsinə 2012-ci ildə təyinat alıb. Yəni, onun rayona rəhbərlik etməsinin elə də böyük tarixi yoxdur. Amma icra başçısı bu 2 il müddətində də “özünü unutdurmayacaq” şok əməllərə imza atmağa nail olub.
İcra başçısı Vaqif Abdullayevin həyata keçirdiyi “islahat”lar nəticəsində durumu pisləşən Beyləqan camaatının torpaqları da əllərindən çıxır. Belə ki, rayonun icra başçısı yerli bələdiyyə sədrləri ilə əlbir olaraq, torpaq sahələrini satmaqla məşğuldur.
Vəziyyətin dözülməzliyi o həddədir ki, torpaq sahələrinin ayrılma məsələsində rüşvət tələb olunduğundan camaat nə edəcəyini bilmir. Eyni zamanda rayona ayrılmış küllü miqdarda dövlət vəsaitinin xərclənməsində şəffaflığın olmaması da daxil olan məlumatlar arasındadır.
Rafiq Qara