Sabiq nazirin restoranları əl dəyişdi, başqa məmurun istifadəsinə keçdi, onun
biznesi əlindən tamamilə alınır; Ələkbərov qardaşları arasında soyuqluq yaranıb

Sabiq nazir Füzuli Ələkbərovun daha iki obyekti əlindən alınıb. Əmək və əhalinin sosial müdafiəsinə uzun müddət rəhbərlik etmiş Füzuli Ələkbərovun biznesi çökdürülür. Nazir postundan uzaqlaşdırılandan sonra F.Ələkbərovun obyektləri ilə də haqq-hesab çürüdülməyə başlayıb.
Onun İsmayıllıdakı mal-mülkü əlindən alınıb. Ardınca bu günlərdə Bakıda daha iki restoranı əl dəyişib. Etika və reklam olmasın deyə həmin restoranların adlarını çəkmirik. Amma bəllidir ki, restoranlar sabiq nazirə məxsus olub.
Mötəbər mənbədən “Gündəm-xəbər”ə verilən məlumatda deyilir ki, sabiq nazir tamamilə öz hücrəsinə çəkilib, vəzifəsindən kənarlaşdırılması onu məyus edib və son aylar heç özünü yaxşı hiss etmir. Sabiq nazir vaxtının çoxunu bağ evində və ailəsi ilə keçirir. Nazir vəzifəsindən kənarlaşdırılmasını gözləməyən F.Ələkbərov indi başına gələnlərə görə çox bədbindir. Bu günlərdə isə daha iki obyektinin pay-puş edilməsi əhvalını lap korlayıb.
Mənbə iddia edir ki, F.Ələkbərovun restoranları vəzifədə olan başqa bir məmurun nəzarətinə keçib: “Füzuli Ələkbərov özünü təqsirkar bilmir. O, bütün bəlaların baiskarı kimi qardaşı Nizami Ələkbərov və oğlunu görür. Çünki İsmayıllıda məlum hadisələrin baş verməsində onların günahı olub. Amma özünün rolu olmayıb. Nazir gözləməyib ki, prezident onu işdən çıxarar”.
Qaynağımız iddia edir ki, F.Ələkbərov qardaşı ilə əlaqələri kəsib: “Sabiq nazir icra başçısı olmuş qardaşı ilə danışmır. Bu hadisələrdən sonra iki qardaş arasında soyuqluq yaranıb. Füzuli Nizami ilə münasibət saxlamır. O, vəzifədən getməsinin və hakimiyyətdən alınmasının günahını qardaşında görüb. Bu da iki qardaş arasında mübahisəyə səbəb olub.
Nizamiyə deyib ki, sən prosesi bu dərəcə böyüməyə qoymazdın. Bu, bizim iqtidardan getməyimizin sonu oldu. Hadisələri yatıra və işi bağlamaq olardı. Ona görə də uzun müddətdir ki, iki qardaş arasında soyuqluq var. Nizami qardaşı ilə danışmaq istəsə də, sabiq nazir möhkəm qəzəblidir”.
Mənbə deyir ki, Ələkbərovlar klanı hakimiyyətdən getməklə bütün dayaqları itirilib. Bununla da iqtisadi rıçaqlar da əldən gedib.
Xatırladaq ki, Füzuli Ələkbərovun rəhbərliyi ilə “İmprotex” şirkəti 1991-ci ildə yaranıb. Hazırda bu holdinq daha çox “İmprotex Group” kimi tanınır. İlk vaxtlar şirkət Azərbaycanda və keçmiş sovet respublikalarında yalnız ölkə daxilinə turizm turları təşkil edib.
Maraqlıdır ki, bu fəaliyyət az müddət davam edib, sonradan şirkət biznesin müxtəlif sahələrində işə başlayıb. Şirkət sadə turların təşkilatçılığından baş ofisi Bakıda yerləşən, BƏƏ və Çində nümayəndəliyi olan çoxşaxəli bir korporasiyaya qədər inkişaf yolu keçdi.
Hazırda “İmprotex Group” ölkəmizdə ciddi holdinqlərdən biridir. Azərbaycanda ilk özəl avia şirkətin - “İmair”in yaradılması da məhz “İmprotex”in adı ilə bağlıdır. Hazırda “İmprotex” Şirkətlər Qrupu Azərbaycanın özəl sektorunda aparıcı mövqeyə sahibdir. Şirkət dünyanın ən məşhur şirkətləri ilə əməkdaşlıq edir, bir sıra xarici dövlətlərdə nümayəndəliyini yaradır, tanınmış brendlərin Azərbaycan bazarına gətirilməsinə nail olub.
Daha bir şirkət - “İmprotex Distribution Center” isə 2000-ci ildə yaradılıb. Şirkət əsasən istehlak mallarının, eləcə də xırda və iri məişət texnikasının satışı və yayılması ilə məşğuldur. “Brook Bond” çaylarının yayılması ilə öz fəaliyyətinə başlayan şirkət əhatə dairəsini genişləndirə bilib. Onun əməkdaşlıq etdiyi biznes qurumları içərisində Gillette Group kimi iri şirkətin adı daxil idi. Hazırda Unilever, Vestel, Scarlet, Philips kimi şirkətlərlə əməkdaşlıq mövcuddur.
Şirkət əsasən Kosmetika - “Rexona”, “Dove”, “Axe” dezodorantları; “Lux”, “Dove” maye və quru sabunları, saça baxım vasitələri - “Sunsilk”, “Dove”, “Timotei” şampun və kremləri, məişət kimyası - “Domestos”, “OMO”, ağız boşluğuna baxım vasitələri - “Pepsodent”, “Signal” diş məsunları və diş fırçalarının satışı ilə məşğul olur.
Rafiq Qara