Mehdiabad 1 həftədir sussuzdur...
Amma bu Z. Fərəcovu qətiyyən narahat etmir, çünki...

Hazırda yayın qızmar vaxtıdır. Bu dövrdə insanların, ümumiyyətlə bütün canlıların suya olan tələbatı daha da artır. Yəni ilin bu zamanında canlı aləm mayedən daha çox istifadə etmək məcburiyyətindədir. Belə vəziyyət, bölgələrdəki rəhbər məmurları, eyni zamanda, əhalinin su ilə təminatına cavab verən qurumları ilin bu aylarında daha məsuliyyətli olmağa vadar etməlidir. Amma nə edəsən ki, bir sıra yerli məmurlar özlərinin şəxsi varlanmaq ehtirasından xilas ola bilmədiklərindən, onları əhalinin su problemi az qayğılandırır. Bunun nəticəsində də əhalinin su ilə bağlı yaranan problemləri öz həllini aylarla gözləməli olur.
Abşeron rayon Mehdiabad qəsəbəsində bir həftədir ki, su gəlmir. Problem bütün qəsəbəni əhatə edib. Bu isə qəsəbə sakinlərinin narazılığına səbəb olub. Narazılığın yaranması bir tərəfdən suyun olmaması ilə bağlıdırsa, digər tərəfdən də həmin hadisənin orucluq ayına düşməsi ilə bağlıdır. Ölkənin ghər yerində olduğu kimi Mehdiabad qəsəbəsində də əhalinin bir hissəsi oruc tutur. Bu insanlar günün müəyyən hissəsini ac və sussuz qaldığından, onların oruc açılan zaman su və qidaya böyük ehtiyacı yaranır. Amma nə edəsən ki, 1 həftədir, məmurlar su problemini həll etməmələri səbəbindən oruc tutan insanları sussuz qoymaqla çətin duruma salıblar. Hətta düşmən qüvvələr belə tutduqları ərazilərdə yerli əhalini su ilə sınağa çəkmir, xüsusən də, müqəddəs bayram ərəfəsində. Amma görünür, Azərbaycanda vəzifə sahibləri olan bəzi məmurlar əhalinin ramazan bayramını normal keçirmələrini istəmir. Bu səbəbdən də Mehdiabad qəsəbəsinə rəhbərlik edən şəxslər əhalini bir qurtum su ilə sınağa çəkib. Adətən, hər hansı bir yerdə su ilə bağlı problem yarandıqda, əvvəla alternativ məkandan həmin əraziyə su verilməlidir. Yəni proses elə qurulmalıdır ki, əhali su sarıdan korluq çəkməsin. Bu iş isə Mehdiabad qəsəbəsi rəhbərliyi, həmin inzibati ərazinin daxil olduğu Abşeron rayon icra başçısı Zakir Fərəcovun üzərinə düşür. Yəni bu şəxslər yaranmış problemin dərhal aradan qaldırılmasına birbaşa cavabdeh olmalıdırlar. Amma bir həftədir Mehdiabadda su yoxdursa, deməli, Zakir Fərəcov başda olmaqla əraziyə rəhbərlik edən bütün şəxslər yerlərində deyillər. Onlar yerlərində olsaydı, Mehdiabad sakinləri 7 gün sussuz qalmazdılar. Əlimərdan adlı qəsəbə sakini deyir ki, yayın qızmar vaxtında da qəsəbə susuzluqdan yanır: “Mehdiabadda sanki yezid peyda olub. Bu yezid müqəddəs bayram ərəfəsi bizim günümüzü qara etmək istəyir. Məmurlar hər addımbaşı ölkənin, onun rayonlarının inkişafından dəm vururlar. Bu nə inkişafdır ki, bir həftədir suya həsrət qoyublar. Adicə suyumuzu vermirlər. Keçən ayın sonlarından oruc tuturam. Bu zaman insanın lazımi anda suya tələbatı daha çox olur. Amma gəl ki, məmurlar bizi sudan məhrum edib. Görünür, bölgəmizə rəhbər təyin olunan məmurlar ya tapşırılan işin öhdəsindən gələ bilmir, ya da ümumiyyətlə istəmirlər. İcra başçısı Fərəcov başda olmaqla, buradakı məmurların hamısı vəzifəyə gələn kimi ancaq öz maraqlarının təmin edilməsinə çalışırlar. Əhalinin problemləri isə onları qətiyyən narahat etmir. Bu səbəbdən, Mehdiabadda hər hansı bir problem yaranan kimi, onun həlli beləcə uzun çəkir. Bununla məmurlar sanki xalqı sınaqdan çıxarırlar. Dövlət qurumlarına dəfələrlə müraciət etmişik. Gah deyirlər su pulu borcunuz var, gah da su boruları partlayıb. Suyu maşınlarla gətizdiririk. Bir maşın suya ilk günlər 40-45 manat verirdiksə, su problemi uzandıqca, maşın suyunun qiyməti də qalxıb. Yəni işbazlar Mehdiabad sakinlərinin ağır durumundan sui-istifadə edərək,hazırda maşın suyunun qiymətini 50 manatadək qaldırıblar. Belə görünür, qəsəbənin su ilə bağlı yaranmış problemini Abşeron rayon icra başçısı başda olmaqla bəzi məmurlar qəsdən uzadırlar. Ona görə də, problem bu günə qədər öz həllini tapmayıb. Yerli icra nümayəndəliyində işləyən işçilərdən birinin dediyinə görə, yaranmış problemi operativ olaraq həll etmək əvəzinə, onu uzatmaqla məmurlar su biznesindən də qazanmaq eşqinə düşüb. Belə ki, suyun gəlməməsi fonunda qəsəbə sakinləri onu su maşınlarından almağa, habelə ticarət obyektlərində satılan suları tez bir zamanda istehlak etməyə məcbur olurlar. Hansı ki, belə vəziyyət rayon rəhbərliyinin ürəyincədir, şəxsi maraqlarına cavab verir. Çünki, bu biznesdən ona da müəyyən "xeyir" gəlir. Heç şübhəsiz, suyun bir həftə olmamasının kökündə bu amil dayanır. Adı çəkilən məmurlar yaranmış hər hansı problemi özləri üçün fürsət hesab edərək, əhalinin su qıtlığı çəkməsindən də varlanmaq eşqinə düşürlər. Bu müqəddəs bayram ayında Allah bizi su ilə sınağa çəkənləri bağışlamayacaq. Buna əmin ola bilərsiniz. Susuzluğun ucbatında həyətdə əkdiyimiz bütün meyvə-tərəvəz yanır, ağaclar quruyub”.
Vaxtilə Heydər Əliyev Mehdiabad haqqında belə demişdi: "Mənim Mehdiabadlılara böyük hörmətim var". Hazırda isə H.Əliyevin böyük hörmət etdiyi mehdiabadlılar məmurlar tərəfindən su ilə sınağa çəkilir. Deməli, həmin məmurlar mehdiabadlılara H. Əliyevin vaxtilə dediyi kimi, zərrə qədər də olsa hörmətlə yanaşmırlar.

Həsən İslamov