Müsavat Partiyası Başqanlığına namizədlərin Seçki Platformalarını müsavatçılara və cəmiyyətə təqdim etməsi tarixi hadisədir. İlk olaraq Başqanlığa namizəd Arif Hacılı Seçki Platformasını təqdim edib. Musavat.com mövzuya marağı nəzərə alaraq, Facebookda yayımlanan həmin sənədi oxucuların diqqətinə çatdırır.
Arif Hacılı yazır:

" Seçki platformamı,üzərimə götürdüyüm ohdəlikləri təqdim edirəm.
M.Ə.Rəsulzadə və Müsavat Partiyası qurucularının ruhu, Müsavatı, müsavatçılığı üçrəngli bayrağımız, himnimiz kimi qoruyub saxlayaraq bizə ötürən Azərbaycan Milli Mərkəzi üzvləri, Azərbaycan Kültür dərnəyi genel başqan Cəmil Ünal və silahdaşları, İsa Qəmbər başda olmaqla Müsavat Partiyasını bərpa edərək yenidən ölkənin əsas partiyasına çevirən mübarizə yoldaşlarım, hər bir müsavatçı və hər bir Azərbaycan vətəndaşı qarşısında Müsavat başqanı seçiləcəyim təqdirdə aşağıdakı öhdəlikləri üzərimə götürdüyümü bəyan edirəm:
1. Azərbaycanın müstəqilliyinin dönməzliyi, demokratik inkişafı, ərazi bütövlüyü, vahidliyi və firavanlığı uğrunda mübarizə aparmaq.
2. Müsavatçılığın təməl prinsiplərinə daim əməl etmək.
3. Müsavat Partiyasının qəbul etdiyi ideoloji-siyasi xətti davam etdirmək və dövrün tələblərinə uyğun olaraq inkişaf etdirmək.
4. Liberal-demokratik milli məfkurəni əks etdirən Rəsulzadə-Elçibəy yoluna sadiq qalmaq.
5. Azərbaycanın Avroatlantik məkana inteqrasiyası üçün səyləri artirmaq.
6. Demokratik cəmiyyət quruculuğu, o cümlədən söz, vicdan azadlığı, azad seçki, bərabərhüquqlu siyasi rəqabət şəraiti və digər hüquq və azadlıqlar uğrunda mübarizəni gücləndirmək.
7. Partiyanın milli təsanüd prinsipinə əsasən fərqli sosial qruplar, konfessiyalar, ideoloji-siyasi dünyagörüşlər arasında uzlaşmaya nail olmağa çalışmaq.
8. Azərbaycanın demokratik inkişafı uğrunda fəaliyət göstərən siyasi partiyalarla, ictimai birliklərlə müttəfiqlik münasibətlərinin qurulmasına daim səy göstərmək.
9. Bütün ictimai və siyasi təşkilatlarla müsavtçılığın təməl prinsiplərinə zidd olmayan məsələlərdə funksional əməkdaşlığa açıq olmaq.
10. Azərbaycanın milli mənafelərinə, o cümlədən Qarabağ probleminin həllinə aid məsələlərdə bütün siyasi qüvvələrlə əməkdaşlıq etmək.
11. Dövlət quruculuğu sahəsində partiyanın proqram və layihələrini təkmilləşdirmək, yeni layihələrin hazırlanmasını təmin etmək.
12. Partiya quruculuğu məsələlərində demokratik prinsiplərə əməl etməklə yanaşı, azlığın hüququnun tanınmasnı təmin etməyin zəruriliyini qəbul etmək.
13. Plüralizmin və şəxsi təşəbbüsün inkişafina şərait yaratmaq.
14. Partiyadaxili nizam-intizam qaydalarına əməl olunmasını təmin etmək.
15. Partiyanın resurslarınin artırılması, maddi texniki bazasının möhkəmləndirilməsinə nail olmaq.
16. Partiyanın dinamik fəaliyyətini təmin etmək üçün çevik icra strukturları və icra mexanizmləri yaratmaq.
17. Partiyanın ictimai əlaqələrini təkmilləşdirmək, mətbuat, xarici əlaqələr və digər sahələrdə fəaliyyətinin səmərəliliyini artırmaq məqsədilə yeni siyasi, innovativ metod və texnologiyalardan istifadə etmək.
18. Partiya sıralarına gənclərin, ziyalıların cəlb olunması üçün fəaliyyət proqramı hazırlayaraq həyata keçirmək.
19. Partiyanın xarici əlaqələrini genişləndirmək, o cümlədən Türkiyə, Gürcüstan, Ukrayna və s. ölkələrdə olan müttəfiqlərlə, Müsavatın üzv olduğu LDR-a daxil olan müttəfiq partiyalarla, beynəlxalq təşkilatlarla münasibətlərin səmərəliliyini artırmaq üçün səyləri artırmaq.
20. 2015-ci il parlament seçkilərində partiyanın əvvəlki təsir imkanlarının bərpa olunmasına nail olmaq.
21. 2018-ci prezident seçkilərində partiyanın hakimiyyətə gəlməsini təmin etmək üçün “xalqla bütünləşmə” siyasətini həyata keçirmək.
22. Başqan seçkilərinin nəticələrindən asılı olmayaraq Müsavat Partiyası sıralarında siyasi fəaliyyəti sonadək davam etdirmək".