Azər Allahverənov: Yağış yağan zaman sürücünün görmə məsafəsi azalır, bu fonda o aşağı sürətlə sürməklə, tıxacın yaranmasına səbəb olur"
Məzahir Rüstəmov: "Bunun yaranmasının başlıca səbəbi yollarımızın istismara tam yararlı olmamasından qaynaqlanır"


Paytaxtda yağan yağış hər dəfə olduğu kimi yenə də şəhərdə bir sıra probemlərə rəvac verdi. Belə ki, şəhər kənarında bəzi yollar yenə də sakinlər və avtomobillər üçün keçilməz hala düşdü. Bundan başqa, ən vacib məqamlardan biri də odur ki, yağışın yağması ilə sanki tıxac problemi də özünü daha kəskin formada göstərməyə başlayır. Dünən yağışdan sonra şəhərin az qala hər bir istiqamətində ciddi tıxac problemi hökm sürür. Paytaxtın Heydər Əliyev prospekti və digər mərkəzi əraziləri anoloji hala təslim olub. Həmçinin, Bakı-Sumqayıt yolu, Badamdar, Bayıl qəsəbəsində də vəziyyət eynidir. Düzdür, əvvəlki günlərdə də tıxac özünü göstərirdi. Amma nədənsə, yağış yağandan sonra, bu hal daha qabarıq şəkildə üzə çıxır. Görəsən, hər dəfə yağan yağış niyə tıxaca səbəb olur? Bu məsələ necə həllini tapmalıdır?
Ekspert Azər Allahverənov düşünür k, yağışın yağmasının hər dəfə tıxaca gətirib çıxarması bir çox amillərlə bağlıdır. Onlardan biri həmsöhbətimizə görə, yağış yağan zaman sürücünün görmə məsafəsinin azalması və belədə avtomobili aşağı sürətlə idarə etməyə məcbur olmasından qaynaqlanır: "Təbii ki, yağış yağan zaman sürücünün görmə məsafəsi də azalır. Bunu sürücülər gözəl dərk edir. Amma həmin sürücülər arasında elələri də var ki, onlar yağışlı havaya da əhəmiyyət verməyərək, avtomobili sürətlə idarə edir, gözlənilməz halda hansısa bir manevr, dönmə əməliyyatı həyata keçirirlər. Bu da qəza vəziyyəti yaradır. Ona görə də, yağışın yağması ilə sükan arxasında əyləşənlərin əksəriyyəti avtomobili nisbətən aşağı sürətlə sürmək qərarına gəlir. Nəticə etibarı ilə maşını sürətlə idarə etmək üçün nəzərdə tutulan yollarda belə aşağı sürətlə idarı olunan nəqliyyat vasitələrinə rast gəlirik". Digər bir tərəfdən, ekspertə görə, yaşanan bu problem yağışlı havada yol örtüyünün tam olaraq görünməməsi ilə bağlıdır: "Ola bilsin yolun bəzi yerlərində çala-çuxur, bəzi yerlərdə isə kanalizasiya qapaqlarının açıq olması halları olsun, hansı ki, bunlar da nəticə etibarı ilə qəzalara rəvac verə bilər. Sürücülərin əksəriyyəti bu amili gözəl başa düşdüklərindən onlar gölməçələrlə dolu olan, asvalt örtüyü görünməyən yerlərdə nəqliyyat vasitələrini aşağı sürətlə idarə etmək niyyətində olurlar. Bu da nəticə etibarı ilə, onsuz da tıxacdan əziyyət çəkən paytaxt küçələrində nəqliyyat vasitələrinin intensivliyinin daha da artması və tıxaca düşən maşınların sayının çoxalmasına səbəb olur".
A. Allahverənov bildirdi ki, yaşanan bu problemin qismən həlli mümkündür: "Bununla bağlı yaranan problemi qismən həll etmək olar. Belə ki, yeni salınan yollarda axar sular üçün irriqasiya xətlərinin çəkilməsi faktiki olaraq suyun üzərində asvaltın qalmaması üçün əlavə ötürücü və xətlərin çəkilməsi məsələsi ilə həll oluna bilər ki, asvalt su ilə bağlanmasın. Təbii ki, bunu hər yerdə etmək mümkün deyil. Çökəklik kimi yerlərdə suyun qalma ehtimalı yenə də yüksəkdir. Amma istər-istəməz bu səbəbi qismən həll etmək mümkündür. Amma yağışdan irəli gələrək, görmə məsafəsini yaxşı görməyən sürücülərin yenə də sürətlə sürməsi kimi məsələnin qarşısı isə dövlət yol polis əməkdaşlarının reydləri ilə alına bilər. Bu da ümumi profilaktik tədbirlərin həyata keçirilməsi, maarifləndirmə işlərinin icra olunmasını tələb edən bir məsələdir".
Nəqliyyat eksperti Məzahir Rüstəmov isə problemin kökünü yolların istismara tam yararlı olmamasında görür: "Yağışın yağması, bir balaca sərnişin sıxlığı ilə yollarda problemlər də artır. Hansısa bir təbiət və yaxud başqa hadisələr baş verən kimi paytaxt yollarında tıxaclar özünü daha kəskin sürətdə göstərir. Bunun yaranmasının başlıca səbəbi yollarımızın istismara tam yararlı olmamasından qaynaqlanır. Yararsızlıq özünü hır zaman göstərir. Bu hal yağış və digər təbii hadisə zamanı əmələ gələndə isə, vəziyyət daha pis xarakter alır. Bir sıra yollarda hərəkət havanın normal vəziyyətində yaxşı halda olsa da, dediyimiz kimi yağışın yağması ilə məsələ qəlizləşir. Nəticədə belə yollarda hərəkətin sürəti, intensivliyi aşağı düşür. İntensivliyin aşağı düşməsi də digər yolların üzərinə əlavə yük salır. Belədə, tıxac amili daha qabarıq olaraq özünü göstərir. Problemin əsas səbəblərindən biri də Bakıda kanalizasiya sisteminin normal işləməməsi, yollarda yağış və qurunt sularının axıdılması üçün drenaj xətlərinin yetərincə olmamasıdır. Düşən yağıntı qısa zaman kəsiyində yollarda gölməçələr əmələ gətirir. Təbii ki, belə gölməçələri keçərkən, avtomobilin sürətini azaltmaq tələb olunur, nəticədə tıxaclar baş verir".
Həsən İslamov