Bakının Binə qəsəbəsində, “Sovxoz Binə” kimi tanınan yeni salınmış yaşayış massivində sakinlərin yağışdan sonra bataqlığa çevrilən yollara görə küçələrə çıxmasından sonra yerli hakimiyyət orqanları hərəkətə gəlib.

Virtualaz.org xəbər verir ki, Binə qəsəbə icra nümayəndəliyi Binə qəsəbəsinin mərkəzindən “Sovxoz Binə” massivinə qədər olan 1.5 kilometr yola çınqıl döşəyib. Bu barədə qəsəbə icra nümayəndəsi Tahir Əliyev “Kavkazskiy uzel” portalına bildirib.

Xəbər verildiyi kimi sakinlər noyabrın 8-də qəsəbə yollarının keçilməz vəziyyətinə və yerli icra hakimiyyəti orqanlarının bu problemə laqeydliyinə etiraz olaraq küçəyə çıxıblar və yolu kəsiblər. 2 minə yaxın qəsəbə sakininin qatıldığı etiraz aksiyasının yatırılması zamanı polislə qarşıdurma olub. Əlavə polis qüvvələrinin cəlb olunmasından sonra sakinlərin aksiyası sərt güc tətbiq olunmaqla dağıdılıb, həbslər aparılıb. Həbs olunanlardan 11 nəfəri 10-20 sutka inzibati həbs cəzası alıblar. Üç qəsəbə sakini isə polisə müqavimət ittihamı ilə 2 aylıq həbsə göndərilib. Onları 3 ildən 7 ilədək həbs cəzası gözləyir.

Qəsəbə icra nümayəndəsi deyib ki, yola çınqıl döşəndikdən sonra 160 saylı marşrutun xətti qəsəbənin içərilərinə doğru uzadılıb. “Bu, işlərin birinci mərhələsidir. İndi Nazirlər Kabineti tərəfindən yola asfalt döşənməsi üçün əlavə vəsaitin ayrılması məsələsinə baxılır” Tahir Əliyev bildirib. Onun sözlərinə görə, həmin yaşayış massivi kortəbii salınıb, keçmiş südçülük sovxozunun ərazisinin satılması nəticəsində “kənd rayonlarından gələnlər tərəfindən” qanunsuz olaraq evlər tikilib və qeyri-müəyyən statusa malik yaşayış massivi meydana çıxıb. Qəsəbə icra nümayəndəsinin dediyinə görə əslində həmin massiv Xəzər rayonunun ərazisinə daxildir və Binə qəsəbəsinin tərkibində deyil. “Bizim qəsəbədə 60 minə yaxın əhali var, öz problemlərimiz kifayət qədərdir. “Sovxoz Binə”də 10 minə yaxın adam məskunlaşıb, onların problemini bir saatın içində həll etmək olmaz” nümayəndə deyib.

Bəs həmin 10 min adam yerli icra hakimiyyəti orqanlarından xəbərsiz “Sovxoz Binə”də minlərlə evi necə tikib? Evləri tikmək üçün keçmiş sovxoz ərazilərini kim parça-parça edib onlara satıb? Yoxsa “Sovxoz Binə” adlanan statussuz, rəsmi adsız, küçələri qışda bataqlığa, yayda toz-torpağa bürünən yaşayış massivi “bir saatın içində”, yəni yağışdan sonra göbələk kimi meydana çıxıb? İcra nümayəndəsi bu sualların heç birinə aydınlıq gətirməyib.

İndi belə çıxır ki, həmin massivin sakinləri yola bir neçə maşın çınqıl döşənməsinə nail ola bilmək üçün azı 3 nəfəri 3-7 illik həbsə göndərməli olublar. O zaman sual yaranır: yeri icra hakimiyyəti orqanları yola asfalt döşəməyə pul tapmırdısa heç olmasa bir neçə maşın çınqıl tapıb bataqlığı doldura və beləliklə də toqquşma ilə müşaiyət olunan etirazın baş qaldırmasını önləyə bilməzdimi?

Təəsüf ki, əksər hallarda yerli məmurlar bu cür xırda problemlərin həlli üçün heç vaxt təşəbbüs göstərmirlər və nəticədə lokal sosial narazılıqlar, etirazlar böyüyür. Məsələn, bu günlərdə “Sovxoz Binə”nin aqibətini yaşayan, ancaq yeni deyil, təxminən 20 il əvvəl salınan başqa yaşayış massivinin, Suraxanı rayonu, Bül-Bülə qəsəbəsinin Samir Əliyev küçəsi, “A massivi”nin sakinləri də redaksiyamıza eyni məzmunlu şikayət göndərmişdilər. Onların şikayətlərindən məlum olurdu ki, uzun müddətdir öz vəsaitləri hesabına qismən işlək vəziyyətdə saxladıqları yolları “Azərsu”nun podratçı şirkətləri su boruları basdırmaq üçün darmadağın edib. Həmin vaxtdan dağılmış yolların bərpası üçün sakinlərin şikayət etmədiyi ünvan qalmayıb. Bu ilin yazında sakinlərin bir qrupu etiraz aksiyası da keçirib. Ancaq yerli məmurlar onlara vəd verməklə işlərini bitmiş hesab edirlər. Sakinlər isə etirazın və şikayətin daha hansı formasına əl atmaq barədə düşünürlər.