Mehman Əliyev:
“Artıq cəmiyyətdə indiki iqtidardan bezmək sindromu yaşanır və cəmyyətdə gərginlik güclənir”

İsa Qəmbər:
“20 ildir ki, iqtidarda olan Əliyevlər rejimi ölkəni yalan, zor və korrupsiya ilə idarə edir”

Əli Kərimli:
“Xalq birləşərək ölkəni bu kriminal iqtidardan xilas etməlidir və buna nail olmaq lazımdır”


Dünən Müsavat Partiyasının ofisində “Seçkiöncəsi durum və aqressiv iqtidar” mövzusunda dinləmələr keçirilib. Mövzu bu il yanvarın 13-də Müsavat Partiyası başqanı İsqa Qəmbər başda olmaqla, Lənkərana gedən nümayəndə heyətinə qarşı bur qrup insanın cinayət əməlindən sonra aktuallaşıb. Bu addım ölkədə və dünyada rezonans doğurub, iqtidarın əleyhinə işləyib. Bu addım həm də iqtidarın 2013-cü il prezident seçkilərini necə keçirəcəyinin anonsu sayılıb.
“Turan”ın direktoru Mehman Əliyev adı çəkilən hadisə ilə 2003-cü ilin prezident seçkiləri zamanı baş vermiş hadisələr arasında paralellər apararaq, törədilən hadisələrdə iqtidarın əli olmasının sübut olunduğunu deyib. Sadəcə 2003-cü ildə iqtidar bu zorakılıqları polisin əli ilə edirdi, 2013-cü il hadisəsində isə şərti “narazı vətəndaşlar”ın əli ilə edir. Amma dəst-xətt, mahiyyət eynidir. Həm də bu cinayət əməllərinin seçki ilində törədilməsi aparıcı siyasi müxalifəti və müxalifəti dəstəkləyəcək elektoratı seçkidə fəal iştirakdan çəkindirməkdir. Natiq bu təzyiqləri müxalifətin hakimiyyət iddialarını zəiflətmək istəyi kimi şərh edib. M.Əliyev baş vermiş cinayət əməlini sərbəst hərəkət, sərbəst toplaşmaq, ifadə azadlığı kimi hüquqların kobud şəkildə pozulması adlandırıb. Bir də fərq budur ki, 2003-cü ildə iqtidar zorakılıqlara seçkilərə 3 ay qalmış başalmışdısa, bu il 10 ay qalmış başlayıb.
2003-cü il seçkilərində İlham Əliyevin hakimiyyətə gəlməsində ABŞ, Türkiyə və Rusiyanın maraqlarının üst-üstə düşdüyü, indi isə tam fərqli beynəlxalq situasiya olduğu vurğulanıb. “Artıq cəmiyyətdə indiki iqtidardan bezmək sindromu yaşanır və cəmyyətdə gərginlik güclənir”, - deyə M.Əliyev cəmiyyətdaxili proseslərə toxunub. “Gülərgeyt”, BP ilə yaşanan problemlər, əsgər ölümlərinə etiraz aksiyası, 13 yanvar Müsavat başqanına sui-qəsd cəhdi, 19 yanvar “Binə olayları”, Avropa ilə yaşanan problemlər bu gərginliyin aşkarlanması kimi dəyərləndirilib. Eyni zamanda, iqtidar daxilində də gərgin vəziyyət yaşandığı nəzərə çatdırılıb. Vəziyyətin get-gedə daha da ciddiləşəcəyi xəbərdarlığı edilib. İqtidarın cəmiyyətə təzyiqlərinin, eləcə də cəmiyyətin iqtidarın təzyiqlərinə müqavimətinin artacağı xüsusi vuğulanıb. Hazırda sessiyası gedən AŞPA-nın Azərbaycana münasibətdə ortaya sərt mövqe sərgiləyəcəyi deyilib.
Müsavat başqanı İsa Qəmbər 20 ildir ki, iqtidarda olan Əliyevlər rejiminin ölkəni yalan, zor və korrupsiya ilə idarə etdiyini deyib. İqtidarın siyasi fəallığın qarşısını repressiyalarla aldığı, siyasi məhbusluğun bu iqtidarın atributuna döndüyü qeyd olunub. Məhz iqtidarın vətəndaşa belə münasibətinə görə ölkəni etiraz dalğasının bürüdüyü deyilib. Müsavat başqanı 19 yanvar “Binə olayları”nı xalq üsyanı modeli adlandırıb. Daha sonra Müsavat lideri yanvarın 27-də Lənkərana təkrar səfərə gedəcəyini deyib. Bu səfərə Lənkəran ziyalılarının, dindarların, cəmiyyət fəallarının dəvətilə getməyə hazırlaşdığını bildirib. İ.Qəmbər bir qrup insanın Lənkəran sakini adından bu səfərə etiraz müraciəti yaymasına baxmayaraq, bu səfərə gedəcəyini bəyan edib.
AXCP sədri Əli Kərimli iqtidarın fəal vətəndaş mövqeyi sərgiləyənlərə aqressivlik göstərməsinə “aqressiv iqtidar” mövqeyi ifadə edib. Onun fikrincə, iqtidar bilir ki, xalq içində dəstəyi yoxdur və hakimiyyətdə xof yaratmaqla qalmaq istəyir. AXCP sədri mövcud iqtidarı “qeyri-siyasi, kriminal ünsürlər” adlandırdı. Ölkənin bütün problemlərinin kökü olan bu iqtidardan xilas olması üçün bütün qüvvələrin birliyinin təmin olunması zərurəti nəzərə çatdırılıb. Xalq birləşərək ölkəni bu kriminal iqtidardan xilas etməlidir və buna nail olmaq lazımdır.
“Siyasət şöbəsi”