Əhməd Əhmədzadə, Qorxmaz Hüseynov və digər məmurların yaxın ətrafı ilə bağlı yeni həbslərin həyata kemiriləcəyi də gözlənilir

Ölkədə geniş miqyaslı struktur islahatlarının aparılacağı haqda xəbərlər yenidən dövriyyəyə buraxılıb. Xususən Prezident İlham Əliyevin ötən ay 2015-ci ilin “Kənd Təsərrüfatı ili” elan etməsi ilə bağlı sərəncam verməsi və bu sahə ilə bağlı məmurlara etdiyi sərt xəbərdarlıqdan sonra, ciddi struktur islahatlarına tezliklə start veriləcəyinə şübhə edilmir.
“Gündəm Xəbər”ə verilən məlumata görə, uzun illərdir ki, eyni funksiyanı icra edən dövlət qurumlarının birləşdirilməsi məsələsi müzakirə mövzusu olsa da, bunlar bu günədək reallaşdırılmayıb. Amma hakimiyyət artıq bu istiqamətdə ciddi qərar vermək niyyətindədir. İddialara görə, iqtidar qarşıdakı aylar ərzində mərkəzi hakimiyyət orqanlarının sayını azaltmaq və fəaliyyət istiqamətləri üst-üstə düşən bir çox qurumları birləşdirmək planını həyata keçirməyə başlayacaq:
«Xatırlayırsınızsa, bu günlərdə deputat Fazil Mustafa da "Meliorasiya və Su Təsərrüfatı” ASC ilə "Azərsu” ASC-nin birləşdiriləcəyinin vacibliyi haqda açıqlama verdi. Bəli, əslində, hər iki qurum eyni funksiyanı yerinə yetirir. Yəni, biri kanalizasiya və içməli su təminatını, digəri isə suvarma işlərinin icarasını reallaşdırır. Bunların eyni «bayraq» altında birləşdirilməsi, su təsərrüfatı sahəsinin mobil idarəetməsinə zəmin yaradacaq. Çünki bu strukturların ayrı-ayrılıqda fəaliyyəti, bir-birini təkrarlaması anlamına gəlir. Lakin bu birləşdirilmə məsələsinin hakimiyyətdəki güc mövqelərinin dəyişməsi anlamında, ortaya bir sıra çətinliklər çıxaracağı da istisna deyil. Artıq bəzi qruplar birləşdirmə prosesində, daha çox pay qazanmaq üçün fəaliyyətə də keçiblər».

Müsahibimiz deyir ki, ötən ilin noyabr ayının 1-də Prezident İlham Əliyevin Əhməd Əhmədzadənin sədri olduğu "Meliorasiya və Su Təsərrüfatı” Açıq Səhmdar Cəmiyyətinin daha bir səlahiyyətinin alınması haqda fərmanı, sözügedən ASC-nin başqa bir qurumla birləşdiriləcəyinə inamı artırıb. Fərmanla "Azərbaycan Respublikası Meşə Məcəlləsinin tətbiq edilməsi barədə” qanununda dəyişiklik olub və bu dəyişikliyə görə ASC-nin Ekologiya və Təbii Sərvətlər Nazirliyi ilə birgə, meşə sahələrinin çay kənarlarındakı yaşıllıq ərazilərinə nüfuz etmək səlahiyyəti alınıb. Və bu günlərdə adıçəkilən Fərmandan irəli gələn məsələlərin həlli ilə bağlı, Nazirlər Kabineti də öz qərarını açıqlayıb. Yeni qərarla çay kənarlarındakı meşə massivi ilə bağlı bütün səlahiyyətlər, bundan sonra tam olaraq Ekologiya və Təbii Sərvətlər Nazirliyinə həvalə olunub:

«Bu fərmandan sonra "Meliorasiya və Su Təsərrüfatı” ASC–nin ləğv ediləcəyi daha aydın görünməyə başladı. Düzdür, bir neçə deputat və ekspertlər bu qurumun «Azərsu» ASC-yə birləşdiriləcəyini deyir. Ancaq əslində, elə deyil. Bu ASC-nin Fövqəladə Hallar Nazirliyi və ya Kənd Təsərrüfatı Nazirliyinin (KTN) tabeliyinə veriləcəyi deyilir. Ancaq daha çox ikincinin, yəni KTN-nin bu mübarizədən qalib ayrılacağı gözlənilir. Bunu bir ay əvvəl, yəni oktyabrın 10-da Prezident İlham Əliyevin sərəncamı ilə, əlavə səlahiyyətlər əldə edən Heydər Əsədovun atdığı addımlar da təsdiqləyir. Məndə olan məlumata görə, hazırda «Meliorasiya və Su Təsərrüfatı» ASC-nin “Azərsu” ASC ilə deyil, Kənd Təsərrüfatı Nazirliyinə birləşdirilməsi məsələsi gündəmə gətirilib. Artıq Heydər Əsədov bununla bağlı, Nazirlər Kabineti və Prezident Administrasiyasının müvafiq şöbələri qarşısında məsələ qaldırıb. Nazir bu il taxıl və digər əkinlərin proqnozlaşdırıldığından aşağı göstərici verməsinin, birbaşa Əhməd Əhmədzadənin sədri olduğu «Meliorasiya və Su Təsərrüfatı» ASC-nin fəaliyyətsizliyi ilə də əlaqələndirib. Nazir təkliflər paketində xüsusi vurğulayıb ki, əkin sahələrinin böyük hissəsinin son 20 ildə erroziyaya uğraması və buna görə ölkənin əkin sahəsinin böyük hissəsində məhsuldarlığın kəskin aşağı düşməsi, sözügedən ASC-in bu istiqamətdə heç bir iş görməməsi ilə bağlıdır. Etiraf etmək gərəkdir ki, KTN bu məsələdə haqlıdır. Əsasən taxılçılıq rayonlarında əkin və həyətyanı sahələr, son illər ciddi şəkildə şoranlaşıb. Və ASC son 20 ildə əkin sahələrini bu təhlükədən qoruya biləcək kollektorlarda əsaslı iş aparmayıb. Bəzi rayonlarda isə, 20 il əvvələ qədər olan kollektorlar zir-zibillə dolub. Bəli, ASC isə ayrılan pullara rəğmən, heç bir təmizlik işləri aparmadığından torpaqların böyük hissəsi şoranlaşıb. Yerli təsərrüfatçılar isə, ciddi xərc tələb edən bu problemi öz vəsaitləri hesabına həll edə bilmirlər. Belə bir halın varlığı faktiki əkin sahələrinin azalmasına, həm də bəzi sahələrdə məhsuldarlığın kəskin aşağı düşməsinə səbəb olub».

Müsahibimiz deyir ki, KTN rəhbəri məhsuldarlığın artırılması məsqsədilə kənd təsərrüfatı sahəsinin stimullaşdırılmasını vacib sayıb və problemləri sistemli həll etmək üçün, ASC-nin nazirliyə birləşdirilməsini məqsədəuyğun hesab edib: "Heydər Əsədov Azərbaycanın yenidən kənd təsərrüfatı ölkəsinə çevirmək və iqtisadiyyatımızda bu sahənin əvvəlki yerini təmin etmək üçün, daha bir təklif verib. O, Dövlət Torpaq və Xəritəçəkmə Komitəsinin də, KTN-ə birləşdirilməsi təklifini verib. Bildirilib ki, bu həm də kənd təsərrüfatı istehsalçılarına verilən subsidiyalara ciddi nəzarət etməkdən tutmuş, həm də bu sahənin vahid mərkəzdən effektli idarəedilməsinə səbəb olacaq. Ancaq «Meliorasiya və Su Təsərrüfatı» ASC-dən fərqli olaraq, komitənin ləğv edilərək, nazirliyin tərkibində fəalliyyət göstərməsinə sıcaq baxılmayıb. Daha dəqiqi, Heydər Əsədovun diqqətinə çatdırılıb ki, qarşıdakı aylarda «Elektron Kənd Təsərrüfatı» sistemi yaradılacaq və buna o zaman baxmaq olar. Amma Əhməd Əhmədzadənin rəhbərlik etdiyi qurumun KTN-ə birləşdirilməsinə ilkin razılıq verilib. Yəni, Heydər Əsədov rəhbərlik etdiyi qurumu, super nazirliyə çevirmək üçün ciddi və rəqib qrupları qabaqlayan addım atıb. Çox güman ki, bu prosesin fonunda «Azərsu» ASC-nin də taleyinə aydınlıq gətiriləcək. İndiki məqamda isə, Əhməd Əhmədzadənin rəhbərlik etdiyi qurumun taleyinin böyük ölçüdə həll edildiyini söyləmək olar».

Struktur islahatlarının yenidən gündəmə gəlməsinin bəzi dövlət müəssisələrinin rəhbərlərinin də, qorxulu röyasına çevrildiyini iddia edən mənbənin sözlərinə görə, başda Əhməd Əhmədzadə, Qorxmaz Hüseynov və komitə sədri Qərib Məmmədov olmaqla, digərlərinə bu prosesin onların yolunun hüquq-mühafizə orqanlarından keçəcəyi ehtimalını da özündə saxlayır: «Elə götürək, «Meliorasiya və Su Təsərrüfatı» ASC ilə «Azərsu» ASC-də son illər, müxtəlif adlar altında mənimsənilən milyonlarla manata müqabil görülən işləri. Bu qurumlarda dövlət layihələrini belə təhlükələr altına ataraq, milyonları mənimsəyiblər. «Azərsu» ASC-də milyon manatlarla mənimsənilən vəsaitlərlə bağlı, dövrü mətbuatda yüzlərlə məqalələr yazılıb. Baxın, bunların hər birində Qorxmaz Hüseynovun, onun qardaşlarının, qaynının, bacısı oğlanlarının, xalası uşaqlarının adları və onlara bağlı olan MMC-lərin saxta tender oyunları və nələrə sahib olduqları haqda dəqiq məlumatlar verilib. Sözsüz ki, Qorxmaz Hüseynov indiki vəzifəsinə arxayın olaraq, hələ ki, yaxınlarını həbslərdən və hesabat verməkdən qoruya bilir. Ancaq birləşdirmə məsələsindən sonra o, bunlara indiki kimi rahat cavab verə bilməyəcək. Ən azından onun qardaşı və bacısı oğlunun Hacıqabul və digər rayonlarda mənimsədikləri və ümumi məbləği 500 milyon manatı keçən vəsaitlərlə bağlı, gec-tez cavab verəcəkləri qaçılmazdır».

Sonda mənbə bir neçə ay bundan əvvəl Baş Prokuror yanında Korrupsiyaya Qarşı Mübarizə Baş İdarəsi tərəfindən «Azərsu» ASC-nin həbs edilən hüquqşünası Babək Həsənovun da, Qorxmaz Hüseynov başda olmaqla «Azərsu» ASC-nin rəhbər şəxslərinin «dalan»a sıxılmasına səbəb verdiyini iddia edir: «Həbs edilən Babək Həsənov «Azərsu» sədrinin 1-ci müavini Teyyub Cabbarovun qardaşının kürəkənidir. O, Qorxmaz Hüseynovun 1-ci müavini Teyyub Cabbarovun qardaşının kürəkəni kimi, ASC-də qeyri-rəsmi status qazandığından, bir sıra iri maliyyə mənimsəmələrinin başında duran əsas şəxslərdən olub. Həbsinə qədər bütün yaşayış və qeyri-yaşayış obyektlərinin su və kanalzasiya sisteminə qoşulmasına rəsmi razılıq sənədi sayılan "Texniki şərt”i də, məhz, onun müəyyən etdiyi məbləğ hesabına hazırlanıb. Bu isə obyektlər üzrə bəzən 150 min manatı aşıb. Maraqlı burasıdır ki, bir sıra yaşayış və qeyri-yaşayış binalarına texniki şərt sənəd verilsə də, alınan pullar ASC-nın rəsmi hesabına ödənilməyib. Mətbuatda yayılanlara görə, Babək Həsənov təkcə texniki şərtlərin verilməsi prosesində, əldə olunan pullardan 650 min manatının qayınatasının qardaşı olan Teyyub Cabbarovun villasına xərcləndiyini etiraf edib. Bu və ya digər rəqəmləri topladıqda isə, deyə bilərəm ki, həm bu, həm də Qorxmaz Hüseynovun yaxın qohumlarının «Azərsu» ASC-nin səlahiyyətlərindən istifadə edərək, bir neçə milyard manat vəsaiti dövriyyədən çıxardıqları istisna deyil. Yəni, bu və ya digər olayların aparılacaq islahatlar zamanı nəzərə alınacağı, iştirakçı məmurların əksəriyyətinin barəsində cinayət işinin açılacağı da istisna deyil. Bəli, budəfəki islahatlar məmurlara təkcə yerdəyişmə deyil, həm də onlara məşəqqətli günlər vəd edir...».

Cəfər MƏRDANOĞLU