Şahdağ"da iş görən şirkətin 720 min manatı məhkəməlik oldu

Bakı Apellyasiya Məhkəməsində "DİA Holdinq Fzko" şirkəti ilə "Ezgim İnşaat" MMC-nin rəhbəri, türk iş adamı Ali Koşar arasında məhkəmə çəkişməsi haqqında ölkə mətbuatında xəbər verilib.

Xatırladaq ki, həmin məlumatlarda bildirilib ki, şikayət cavabdeh "DİA Holdinq Fzko" tərəfindən verilib. Belə ki, “Şahdağ" qış turizm kompleksində suvaq-oboy işlərinin görülməsi ilə əlaqədar, subpodratçı şirkət kimi DİA Holdinqlə müqavilə bağlayan “Ezgim İnşaat" ın rəhbəri Ali Koşar sifarişlə əlaqədar gördüyü iş müqabilində pul ala bilmədiyinə görə, 1 saylı İnzibati İqtisadi Məhkəməsində iddia qaldırıb. Məhkəmə iddianı təmin edib və DİA Holdinq şirkətinin Ali Koşara 720 min manat ödəməsi barədə qərar çıxarıb. Bu qərarla razılaşmayan DİA Holdinq şirkəti apellyasiya şikayəti verib.

Məhkəmə mübahisəsi ilə bağlı açıqlama verən “Ezgim İnşaat" MMC-nin rəhbəri Ali Koşar bildirib ki, məhkəmədə «DİA Holdinq»in nümayəndəsi şirkətin ona borcu olduğunu təsdiqləsə də, bu məbləğin 720 min manat olmadığını bildirib:

«Qarşı tərəf deyir ki, mənə işin əvvəlində 70 min manat pul verilib. Mən isə həmin məbləği sonradan şirkətə qaytardığımı sübut edən qəbzi məhkəməyə təqdim etdim. «DİA Holdinq»in nümayəndəsi isə bildirdi ki, guya həmin sənəd saxtadır. Hakimin sualına cavab olaraq «DİA Holdinq»in nümayəndəsi mənə olan borcun bir hissəsini qaytarmağa razı olduğunu deyir. Ancaq mən olan məbləğin hamısını almalıyam. Çünki o müqavilələr üzrə görülmüş işə görə mən ƏDV ödəmişəm. Mən pulun ödəniləcəyi təqdirdə barışığa hazır olduğumu bildirdim. «DİA Holdinq»in nümayəndəsi də əvvəl razılaşsa da, sonradan bildirdi ki, şirkətin rəhbərliyi barışığa razılaşmır və məhkəmənin davam etməsini istəyir».

«Gündəmxəbər»in əldə etdiyi məlumata görə, fevral ayının 3-də keçirilən məhkəmə fevralın 10-na təxirə salınıb: «Həmin günü Bakı Apellyasiya Məhkəməsiinin hakimi Vidadi Məmmədovun sədrliyi ilə proses davam etdiriləcək. Çox böyük ehtimala həmin günü hakim öz qərarını elan edəcək».

Məhkəmə prosesi və digər məsələlərlə bağlı tərəflərin fikirlərinə yer ayırmağa hazırıq. Mövzu ilə bağlı araşdırmalarımız davam etdiriləcək.

Cəfər