Qanlı hadisəyə imza atan komitə sədrinin bacanağı Nazim Məlikov çıxılmaz vəziyyətdə qalıb

Xəbər verildiyi kimi, ötən ilin avqust ayının 7-də Şəmkirdə Düyərli kənd bələdiyyə sədrinin müavinini bıçaqlayan rayon Maliyyə idarəsinin rəisi Nazim Məlikov yenidən öz vəzifəsinə bərpa edilib. Bu təyinat ortaya yeni şübhəli məqamlar çıxarmaqla yanaşı, həm də maliyyə naziri Samir Şərifovun imicini ciddi zəddələyib.

Bu barədə «Gündəm Xəbər»ə verilən məlumata görə, nazir Samir Şərifovun Nazim Məlikovun yenidən rəis təyin edilməsi haqqında əmri peşəkar maliyyəçiləri və prokurorluq işçilərini də təəccübləndirməklə yanaşı, rayonun yeni icra başçısı Alimpaşa Məmmədovun əlinə əlverişli fürsət verib: «Bildiyiniz kimi, Nazim Məlikov bələdiyyə sədrini qanına qəltan edib, xəstəxanalıq etdikdən sonra istintaq bəhanəsilə nazir Samir Şərifov onu vəzifəsindən çıxarmışdı. O zaman nazirlik bunu baş vermiş hadisənin obyektiv araşdırılması ilə əlaqələndirirdi. Lakin hadisədən bir neçə ay sonra, daha dəqiqi, ötən ilin oktyabrın 29-da nazir Samir Şərifovun müvafiq əmri ilə Nazim Məlikovun yenidən vəzifəsinə bərpa edilməsi, həm hüquq-mühafizə orqanlarının, həm də Maliyyə Nazirliyinin imicinə ciddi ləkə vurdu. Diqqət etdinizsə, Maliyyə Nazirliyindən Nazim Məlikovun vəzifəsinə yenidən təyin edilməsi ilə bağlı açıqlamada bildirildi ki, Şəmkir rayon Prokurorluğunun həyata keçirdiyi araşdırmalar nəticəsində sözügedən işdə cinayət tərkibi müəyyən edilməyib. Bununla polis və prokurorluğun qanlı bir hadisəni necə ört-basdır etməsi təsdiqləndi. Eyni zamanda, nazirliyin «beləliklə də Nazim Məlikovun vəzifəsindən azad edilməsi üçün səbəb qalmayıb” ifadəsinin isə birbaşa Samir Şərifovun adına rüsvayçılıq gətirdiyini söyləmək olar. Ən azından ona görə ki, bir adamı üç nahiyədən bıçaqlayanın əməlində cinayət tərkibi olmaması və bunu nazirlik səviyyəsində bəyan edilməsi, razılaşaq ki, birbaşa dövlətin imicini də zərbə altında qoyan hadisədir . Elə rayonda da hamı bundan danışır. Bəli, Samir Şərifovun bu anlamsız əmri nə qədər təəccüb və heyrət yaratsa da, Şəmkirin yeni icra başçısı Alimpaşa Məmmədov üçün əlverişli «mühit» yaradıb. O, elə bu məqamdan istifadə edərək, Nazim Məlikovu özündən tamamilə aslı şəkilə salıb».

Müsahibimiz deyir ki, Şəmkirin yeni icra başçısı rayonda təmir-tikinti proseslərində istifadə etdiyi qondarma MMC-lərin vasitəsi ilə istədiyi məbləği dövriyyədən rahat çıxarsa da, Nazim Məlikov həmin MMC-lərin adıyla mənimsənilən vəsaitlərə nəzarəti həyata keçirə bilmir: «Bəzən elə anlar olur ki, Nazim Məlikov büdcə təşkilatlarının əmək haqları, o cümlədən qarşıya qoyulan digər dövlət əhəmiyyətli hesabların açılmasını ləngidir. Amma Alimpaşa Məmmədovun tapşırıq verdiyi MMC-lərin pulunun vaxtında hesablarına köçürülməsini təmin edir. Əks halda, icra başçısı ona vəzifəsindən uzaqlaşdırmaq üçün təqdimat verəcəyini billdirib. Yəni Alimpaşa Məmmədov təyinatının ilk həftəsində Nazim Məmmədovla «hesablaşsa» da, onunla «bağları» tam qoparmayıb. İstənilən zaman Nazim Məlikovu elə yuxarıda qeyd edilən cinayət işini yenidən qaldırıb, təhdid etməklə hədələyir»,

Sonda xatırladaq ki, avqustun 7-də baş vermiş hadisə haqda rəsmi məlumat belə idi: “Şəmkirin Düyərli kəndində rayon Maliyyə İdarəsinin müdiri Nazim Məlikovun Düyərli kənd Bələdiyyəsinin sədr müavini Zakir Tağıyevi bel, kürək və baş

nahiyyəsindən bıçaqlayıb.Yaralı ağır vəziyyətdə Şəmkir Mərkəzi rayon Xəstəxanasına yerləşdirilib. Qanlı cinayət törədən Nazim Məlikov polis bölməsinə aparılıb…”.

Yeri gəlmişkən, onu da qeyd edək ki, Nazim Məlikovla Dövlət Statistika Komitəsi sədrinin 1-ci müavini Həmid Bağırovun həyat yoldaşları xalaqızıdır. N.Məlikovun rayon Maliyyə İdarəsinə rəis təyinatının da Həmid Bağırovun Tovuzun icra başçısı işlədiyi dönəmlərə təsadüf etdiyi də deyilir...

Cəfər