Direktor təyinatında rayon rəhbərlərinin təqdimatı nəzərə alınmır; İcra başçıları sosial etirazları nazirin atdığı addımlara bağlayırlar

Səlim Müslümov Əmək və Əhalinin Sosial Müdafiəsi naziri təyin olunduqdan sonra bu nazirliyin tabeliyindəki qurumların rəhbər şəxsləri ilə bağlı rayon icra hakimiyyətləri başçılarının münasibətlərində narazılıq yaranıb. Bu narazılıq isə daha çox Səlim Müslümovun atdığı radikal addımlardan qaynaqlanır.

Bu barədə «Gündəm-Xəbər»ə daxil olan məlumatda bildirilir ki, Səlim Müslümov nazir təyin olunduğu gündən bir sıra müəssisələrdə «seytnot» vəziyyət yaranıb: «Mərkəzlərdə qeyri-müəyyənlik yaranıb. Nazir ərizəsini alıb, işdən çıxardıqlarının yerlərinə təyinat apara bilmir. Bu isə yerlərdə bəzən çox ciddi problemlərə yol açır. Hətta elə rayonlar oldu ki, Səlim Müslümov gələn kimi, sələfi Füzuli Ələkbərovun rayon Əhalinin Sosial Müdafiəsi Mərkəzinin təyin etdiyi direktorları dərhal işdən qovdu. Amma aylarla onların yerinə təyinat apara bilmədii. Daha dəqiqi, həmin vəzifələrə başqa birilərini müvəqqəti rəis qoymaqla, daha böyük provlemlərə yol aşdı. Çünki Səlim Müslümov təyinatlar zamanı icra başçılarının rəylərini də nəzərə almır. O, hətta bir neçə icra başçısının direktor təyinatı ilə bağlı təqdimatlarını da cavabsız buraxıb. Bu isə nazirin təqdimatsız təyin ettdiyi mərkəz direktorları ilə icra başçılarını üz-üzə qoymaqdır. Yəni icra başçıları Səlim Müslümovun təyin etdiyi şəxsləri «gözüm-çıxdı»ya salırlar».

Müsahibimiz deyir ki, həddən artıq «qazlı davranan» Səlim Müslümov yerli icra başçıları ilə də «dil» tapa bilmir. Nazirin ötkəm davranışları bir sıra icra başçılarının sərt etirazları ilə üzləşib. Başçılar bu səbəbdən nazirin direktor kimi görmək istədikləri şəxsləri qəbul etməkdən imtina edirlər. Səlim Müslümov da icra başçılarının direktor görmək istədiklərini isə təsdiqləmək istəmir. Bu vəziyyət isə rayonlarda qeyri-müəyyənliyə yol açır. Lakin Səlim Müslümovun nazir təyinatı zamanı üzərinə qoyulan bəzi vəzifələri Prezident Administrasiyasının tapşırıqlarına uyğun olaraq uğurla icra etməsi, onun mövqeyini gücləndirən əsas faktordur. Yəni bu səbəbdən icra başçılarının əmək və əhalinin sosial müdafiəsi nazirinin müstəqil qərar və təyinatlarından narazılığı yuxarı dairələrdən dəstəklənmir».

Məlumatlı şəxs deyir ki, Səlim Müslümov nazir təyinatı zamanı «Ünvanlı Sosial Yardımlar (ÜSY), işsizlik müavinətləri və digər sahələrlə bağlı qarşısında qoyulan cidi tapşırıqlara nöqtə-vergülünə qədər əməl edib: «Ona nazirliklə bağlı bir sıra ciddi məsələllərin həlli ilə yanaşı, yardım və müavinətlərin verilməsində baş verən korrupsiya və rüşvət hallarının yığışdırılması, büdcə vəsaitlərinə qənaət, yerlərdən edilən çoxsaylı şikayətlərlə bağlı tədbirlər görmək də tapşırılmışdı. Səlim Müslümov rüşvət və korrupsiyanın qarşısını almaq üçün «mərkəzləşdirilmiş sistem» tətbiq etməklə, cəmiyyətdə bu neqativ halların parakəndələşməsinin, yəni ən aşağı təbəqəyə qədər yayılmasını xeyli əngəllədi. Nazir şikayətlərin azalması və büdcənin korrupsiya ilə talan edilməsinin qarşısını isə özünəməxsus şəkildə aldı. Bilirsiniz ki, Səlim Müslümov çox güclü maliyyəçi olmaqla yanaşı, «qara mühasibat»lığın peşəkarlarındandır. O, hakim dairədən verilən tapşırığı uğurla həll etmək üçün yeganə yolun ünvanlı sosial yardım, əlilliyə görə pensiya alanların siyahısını ciddi şəkildə ixtisar elədi. Etiraf edək ki, yoxlama ilə bu sahədə ciddi problemlər ortaya çıxdı. Aydın oldu ki, TSEK rəisləri xeyli adama saxta əlilik dərəcəsi verib. Mərkəz rəhbərləri isə imkanları adamlara yardım ayırıb. Səlim Müslümov isə bunların bir hissəsinin barəsində qərarı ləğv elədi. Amma o, bu zaman həqiqətən yardıma ehtiyacı olan ailələri, hətta əlil olanları da «ixtisar dalğası»nın ağuşuna atdı. Yəni haqsız olaraq, onların hüquqlarını pozdular, yardımsız və pensiyasız buraxmaqla, dövlətin qayğısından məhrum olundular. Səlim Müslümov isə bununla xeyli vəsaitə qənaət etmiş oldu və bunu hakimiyyətə «korrupsiyanın qarşısını almışam» kimi təqdim etdi. Bu isə yerlərdə kəskin narazılıq yaratmaqla, icra başçılarının əlinə əlverişli fürsət verdi. Yəni icra hakimiyyəti başçıları sosial etirazları Səlim Müslümovun «ayağı»na bağlamaqla özlərini sığortalamağa çalışırlar. Bu faktor isə həm də onların təqdimatlarını qəbul etməyən nazirə qarşı yeni və tutarlı həmlə sayıla bilər».

Cəfər

------------------------------------

Elmar Vəliyevə qarşı inanılmaz dosye iddiası

Gəncənin icra başçısı haqqında materiallar toplandığı, orada özünün və oğluna aid məqamların da olduğu xəbəri yayılıb

Gəncə Şəhər İcra Hakimiyyətinin başçısı Elmar Vəliyevin yaxın günlərdə vəzifəsindən kənarlaşdırılacağı haqda xəbər yayılıb. Xəbərdə bildirilir ki, Elmar Vəliyev Gəncədə xeyli işlərə imza atsa da, onun yaratdığı problemlər daha “dərininliyə” gedir. Məhz bu da ölkə rəhbərliyinin əsaslı narazılığına rəvac verir. İddialara görə, bir neçə il ərzində dövlət büdcəsindən və Prezidentin Ehtiyat Fondundan Gəncənin abadlaşdırılmasına ayrılan vəsaitlər təyinatı üzrə xərclənməyib. Nəticədə şəhərin sökülərək dağıdılan küçələrinin böyük bir hissəsini təmir etmək, yenidən qurmaq mümkün olmayıb. Yəni şəhərin mərkəzi işlərində müəyyən abadlıq işləri həyata keçirilsə də, kənar məhəllələrdə vəziyyət ürəkaçan deyil.

“Gündəm-Xəbər”ə verilən məlumata görə, Elmar Vəliyevin Gəncədəki yerli istehsalat obyektlərinə, xüsusən tikinti materialları istehsal edən müəssisələrə külli miqdarda borcu var. İcra başçısı yerli sahibkarlardan məhsulların alınmasına göstəriş verib. Vəsaitin dövlət büdcəsindən ayrıldıqdan sonra ödənəcəyini vəd edib. Amma ölkənin ikinci şəhəri üçün büdcədən və prezident fondundan əlavə vəsait ayrılmayıb. Nəticədə sahibkarlarla icra başçısı arasında gərginlik kulminasiya həddinə çatıb.

Bizi məlumatlandıran şəxsin iddiasına görə, Gəncənin icra başçı Elmar Vəliyev haqda yayılan bu son xəbərlər hakimiyyət düşərgəsində ciddi araşdırılır: «Elmar Vəliyevin Gəncədə etdiyi bütün rəsmi və qeyri-rəsmi hərəkətlərlə bağlı məxfi dosye hazırlanıb. Maraqlıdır ki, həmin dosyedə başçının tabeliyindəki şəxslərin bəzilərini ən ağır şəkildə təhqir etməsindən tutmuş, İcra Hakimiyyətində yaşanan olaylara qədər öz əksini tapıb. Hətta onun oğlu Elmir Vəliyevin adına Bakıda aldığı ərazilər və orada yaşanan mübahisələr də icra başçısı Elmar Vəliyevin başına dərd aça bilər. Bundan əlavə, Gəncədə Elmar Vəliyevlə bağlı dolaşan daha bir «mübhəm xəbər» də həmin dosyedə öz əksini tapdığı iddia olunur”.

Həmin «mübhəm xəbər»ə aydınlıq gətirən müsahibimiz deyir ki, bu, Elmar Vəliyevin şəxsi ilə bağlıdır: «Şəhərdə dolaşan şayiələrə görə, başçı xoşagəlməz vərdişlərə aludədir. Əlimdə o şaiyələri təsdiqləyəcək fakt yoxdur.

Lakin iddialara görə, Elmar Vəliyevin bu “vərdiş”i isə bəzən idarəetmədə problemlərə yol açır, vəzifəli şəxslərin başçıya inamsızlığına səbəb verir».

Məlumatlı şəxs deyir ki, Elmar Vəliyevlə bağlı yayılan xəbərlərdə həqiqət yükü çoxdur: «Siz aldadıcı görüntülərə baxmayın, son bir ildən etibarən ölkə rəhbərliyinin Elmar Vəliyevə etimadsızlığı artıb. Elmar Vəliyev isə son bir ildir ki, bu etimadsızlığı aradan qaldırmaq üçün ciddi fəaliyyətə başlayıb. O, eyni zamanda, Gəncədə Heydər Əliyev Park Kompleksinin, Gəncə şəhərinin girəcəyində olan Böyük Qala Kompleksinin, Nizami Gəncəvi Mərkəzi və Məhsəti Gəncəvi Mərkəzinin daha təmtəraqla açılışlarının olmasına çalışması da, bu etimadsızlıqla bağlıdır. Elmar Vəliyev bununla «laxlayan kreslo»sunu möhkəmlədəcəyini düşünür».

Elmar Vəliyevin Gəncədə həqiqətən çox böyük problemlər yaratdığını deyən müsahibimiz onun barəsində dolaşan bir şok məlumatı da bizimlə bölüşüb. Lakin həmin məlumatı dəqiqləşdirmək imkanı məhdud olduğundan hələlik yazmırıq. Çalışacağıq ki, bu və ya digər məqamlarla bərabər, onun üzərində «qlaznoy kapli»ni nədən gəzdirməsi ilə bağlı məlumatı növbəti saylarımızda dəqiqləşdirək...

Cəfər