Ramiz Novruzov 1 saylı Xəzinədarlıq İdarəsi və onun rəhbərliyi haqqında dediklərini təkzib etdi

«Gündəm Xəbər» qəzetinin ötən sayında 1saylı Xəzinədarlıq İdarəsinin Azərbaycan ordusunu çörək və kənd təsərrüfatı məhsulları ilə təmin edən şirkətlərə qarşı ciddi sıxıntı yaratması haqqında məlumat vermişdik.

Həmin yazıda adının çəkilməsini istəməyən sahibkarlarla yanaşı, «Yusif-2011» MMC-nin təsisçisi və baş direktoru Ramiz Yunus oğlu Novruzovun da açıqlamasına yer verilib.

Qəzetdə bu açıqlamalar dərc olunduqdan sonra Müdafiə Nazirliyinin Gədəbəy istiqamətində yerləşən N saylı Hərbi Hissəsini çörəklə təmin etdiyini bildirən Ramiz Novruzov yenidən redaksiyamıza telefon açıb. Adıçəkilən sahibkar qəzetin ötən sayında Maliyyə Nazirliyinin 1 saylı Xəzinədarlıq İdarəsinin ünvanına dediklərini təkzib edib: «Mən 1995-ci ildən bu sahədə işləyirəm. Çox təəssüf edirəm ki, hisslərimə və emosiyaya qapılaraq, qəzetinizə Maliyyə Nazirliyinin 1 saylı Xəzinədarlıq İdarəsi haqqında xoşagəlməz açıqlama vermişəm. Əslində, hissə qapılaraq verdiyim bu açıqlama həqiqəti əks etdirmir. Bəli, ötən sayınızda dərc olunan yazıda qeyd etdiyim kimi, sahibi olduğum MMC Müdafiə Nazirliynin şəffaf keçirilən tenderlərində iştirak edərək, müqavilə əsasında N saylı Hərbi hissəni çörəklə təmin edir. Və təkrar edirəm, hər zaman mən və digər sahibkarlar Müdafiə Nazirliyi və onun rəhbərliyindən yüksək diqqət görmüşük. Hörmətli müdafiə naziri Zakir Həsənov gecə-gündüz cəbhə bölgələrində olur, ordunun təminatını gücləndirmək üçün var gücü ilə yorulmadan çalışır. Biz də Azərbaycan ordusunun güclənməsinə var gücü ilə çalışan cənab nazirimizin yorulmaz fəaliyyətinə dəstək verməkdən qürur duyuruq.

Qəzetinizin ötən sayında Maliyyə Nazirliyinin 1 saylı Xəzinədarlıq İdarəsi və onun rəhbərliyi haqqında dediklərimə gəlincə isə, mənim Maliyyə Nazirliyi və onun 1 saylı Xəzinədarlıq İdarəsinə qarşı hər hansı bir şikayətim və iddiam yoxdur. Odur ki, xahiş edirəm, ötən sayınızda mənə aid olan fikirləri adımdan təkzib edərək, bu sözlərimi dərc edəsiniz».

Son olaraq onu da qeyd edək ki, ötən sayımızda dərc olunan məqaləyə 1 saylı Xəzinədarlıq İdarəsindən mövqe öyrənə bilməmişik. Onların mövqeyini də dinləməyə hazır olduğumuzu bildirməklə yanaşı, bu sahədə baş verənlərlə bağlı ətraflı araşdırmamızı davam etdirəcəyik.

Cəfər