Eks-nazirin qohumunun qətlində müdhiş iddialar

Əvəz Ələkbərovun məmur xalası oğlunu öldürən cani hələ də ələ keçməyib, yarım ildə istintaqdan xəbər yoxdur; Arif Qaraşovun müavini olmuş Füzuli İsgəndərovun qatili niyə tapılmır?- təfərrüat

Azərbaycanda səs-küylü bir qətlin sirri açılmamış olaraq qalır. Artıq hadisədən 6 ay keçir və bu yarım il ərzində nə qatil ələ keçib, nə də istintaqdan bir rəsmi xəbər var. Söhbət keçmiş maliyyə naziri Əvəz Ələkbərovun xalası oğlunun öldürülməsindən gedir.

Bu haqda “Gündəm-xəbər”ə mötəbər qaynaqdan verilən məlumata görə, eks-nazirin qohumunu öldürən qatil hələ də istintaqa cəlb olunmayıb. Hüquq-mühafizə orqanları Füzuli İsgəndərovun qatilinin izinə düşüb, onun fotorobotunu da hazırlayıb.

Onun gənc olduğu ehtimal edilir. Amma bu vaxta qədər qatilin ələ keçməməsi sabiq nazirin özünü də narahat edib. Hazırda Çexiyada olan Ə.Ələkbərov F.İsgəndərovun qətli ilə bağlı çırmanıb və əlaqələrini işə salıb. Amma bu müəmmalı cinayətin sirr pərdəsi qalxmır.

Mənbənin iddialarına görə, Ə.Ələkbərov özü də bu işin açılmasında maraqlıdır. Çünki qətldə şübhəli bilinən şəxsin

mərhuma yaxın bir adam olduğu ehtimal edilir. Hətta onların tanışlığı da istisna olunmur.

Amma sentyabrda baş verən hadisədən yarım il ötür və istintaq heç bir nəticəyə gəlməyib. O da iddia edilir ki, qətli törədən şəxs Azərbaycanı tərk edib.

Bununla belə, rəsmi xəbərlərdə qatilin İnterpol tərəfindən axtarışa verilməsi də yer almayıb. Belə güman olunur ki, cinayətin pərdəarxası nüansları var və hansısa mərhələdə tərəddüd olunur.

Mənbədən aldığımız xəbərdə iddia olunur ki, qatilin ölkə xaricində olması şübhələri artıb. Güman olunur ki, qatil öldürdüyü şəxsi lap əvvəldən tanıyırmış. Məlumata görə, bu məsələdə qarət məqsədindən əlavə qisas niyyəti də ola bilər.

Keçmiş nazir F.İsgəndərovun düşməninin harada ola biləcəyi istiqamətində ehtimalları ilə istintaqa fəal şəkildə yardım edir. İstintaqın ehtimalına görə, cinayətkar (və yaxud cinayətkarlar) avqustun 29-da qızına toy edən sabiq məmurun toyuna külli miqdarda pul yığıldığı düşüncəsində olublar.

Güman olunur ki, cani də onun evinə məhz qarət niyyəti ilə daxil olub, maneə ilə üzləşdiyini gördükdə isə başqa seçimi olmayıb. Odur ki, əlbəyaxa olub və 19 bıçaq zərbəsi ilə sabiq nazirin qohumu öldürülüb.

Polisin bu ehtimalı onu deməyə əsas verir ki, qatil qurbanının yaxın ətrafındakı biri olub. Hər halda, sıradan bir cinayətkar vaxtilə məmur olmuş şəxsin övladına toy etdiyini qabaqcadan öyrənə bilməzdi.

F.İsgəndərov Babək prospektində yerləşən evinin həyətində, qarajının yanında qətlə yetirilib. Hadisə səhər saatlarında baş verib. Qatil onun boğazını kəsərək öldürüb və maskada olub. Sonra cinayətkar İsgəndərovun mənzilinə daxil olub. Evdə qətlə yetirilənin həyat yoldaşı olub. Qatil ona hücum edərək boğmağa çalışıb.

Süpürləşmədə qatilin maskası üzündən çıxıb. Qadın bütün qızılları və pulları verəcəyini deyib və onu öldürməməsi üçün yalvarıb. Nəticədə qadını sağ buraxan cani hadisə yerindən qaçıb. Bu da daha bir faktdır ki, qatilin maskası düşübsə, qadın onun üzünü görüb və tanıyıb.

Bütün bu detallar kifayətdir ki, istintaqın qatili tapsın. Hüquq-mühafizə orqanlarının peşəkarlığına da şək-şübhə yoxdur. Üstəlik, qətlə yetirilən şəxs özü də məmur olub, qohumu də vaxtilə nazir. Bu, Azərbaycan reallığında imtiyaz yaradır ki, cani daha tez zamanda müəyyən olunsun. Bu halda sabiq nazirin qohumunu öldürən(lər) nə üçün ələ keçməyib?

Qaynağımız qeyd edir ki, ortada istintaqa və ailəyə məlum olan səbəblər var. Əks halda tamah məqsədi ilə törədilən

cinayətin üstü açılardı. Görünür, işin daha da bilinməyən tərəfləri var. Buna baxmayaraq, istintaq hərəkətləri davam etdirilir.

Çexiyada olan sabiq nazirin isə vətənə qayıdarkən istintaqın gedişi ilə maraqlanacağı da bildirilir. Onun istintaqdan narazı qaldığı da iddia olunur. Məlumata görə, məsələnin bu vaxta qədər uzanması Ə.Ələkbərovu sinirləndirib.

Xatırladaq ki, sentyabrın 1-i Bakıda xüsusi amansızlıqla qətlə yetirilən şəhər sakini Füzuli Haqverdi oğlu İsgəndərov uzun müddət Daşınmaz Əmlakın Dövlət Reyesteri Xidmətinin sabiq rəisi Arif Qaraşovun müavini vəzifəsində çalışıb.

Daha sonrakı dövrdə biznes fəaliyyəti ilə məşğul olub. Əldə etdiyimiz son xəbərdə bildirilir ki, qatil ölkədən qaçıb və oğurladığı pulları da xaricə çıxara bilib. Məhz bu fakt da istintaqı çətinliyə salır: nə qatil, nə də dəlil ələ keçir.

Məhkəmə tibb ekspertləri onun bədəni üzərində 20-yə yaxın bıçaq xəsarəti müəyyən ediblər. İstintaqçılar belə qənaətə gəliblər ki, F.İsgəndərov qatilinə güclü müqavimət göstərdiyindən ona çoxsaylı bıçaq xəsarətləri yetirilib. Qatil onun boğazını kəsməklə müqavimətini qıra bilib. Qatilin 20-25 yaşlarında olduğu ehtimal edilir. Onu da deyək ki, Ə.Ələkbərov 1991-ci ilin yanvarından dekabr ayına kimi yeni yaradılan SSRİ Pensiya Fondu Azərbaycan SSRİ bölməsinin müdiri olub. 1991-ci ildən 1992-ci ilə kimi Azərbaycan Respublikası Pensiya Fondu idarə heyətinin sədri işləyib. Oktyabr 1992-ci ildən iyul 1999-cu ilə kimi Azərbaycan Respublikası Dövlət Sosial Müdafiə Fondunun sədri vəzifəsində çalışıb. İlk sosial sığorta haqqında qanunun müəlliflərindən biridir. 1999-cu ildən 2006-cı ilin aprelinə qədər maliyyə naziri vəzifəsində çalışıb.

Respublikada iqtisadi siyasətin formalaşmasında, büdcə-vergi, pul-kredit və sosial siyasətin təşəkkül tapmasında böyük səylər göstərib. O, çoxsaylı dövlət və hökumət komissiyalarının üzvü olub.