Xəbər verildiyi kimi, Hesablama Palatası mart ayı ərzində növbəti yoxlama hədəfini açıqlayıb.

Palatadan verilən məlumata görə, bu dəfə dövlət büdcəsinin dövlət xidmətləri, dövlət əsaslı vəsait qoyuluşu və ehtiyat fondlarından Bakı şəhəri Xətai rayon İcra Hakimiyyətinə ayrılan vəsaitlərin istifadəsinə, dövlət büdcəsinin dövlət əsaslı vəsait qoyuluşundan Xızı rayon İcra Hakimiyyətinə ayrılan vəsaitlərin istifadəsinə və Əmək və Əhalinin Sosial Müdafiəsi Nazirliyi yanında Dövlət Sosial Təminat Xidmətinin Qaradağ rayon Əhalinin Sosial Müdafiəsi Mərkəzi tərəfindən dövlət büdcəsindən ayrılan vəsaitlərin istifadəsinə dair nəzarət tədbirləri üzrə proqramlar təsdiq olunub.

Eyni zamanda Naxçıvan Muxtar Respublikasının büdcəsindən Naxçıvan şəhər MR Mədəniyyət və Turizm Nazirliyinin aparatının və Nazirliyin mərkəzləşdirilmiş hesabatlığından maliyyələşən təşkilatların saxlanılmasına ayrılan vəsaitlərin istifadəsinin və büdcədənkənar vəsaitlərin icrasına dair də nəzarət tədbirləri üzrə proqram təsdiq olunub.

Bizi məlumatlandıran mənbənin sözlərinə görə, Hesablama Palatasının son bir ildə bu istiqamətdə apardığı yoxlamalar və onların nəticələri ilə bağlı Milli Məclis vasitəsiylə Prezident Administrasiyasına hesabat göndərməsi,vəzifəli şəxsləri ciddi təhllükələrlə üz-üzə qoyur.

Mənbənin sözlərinə görə, Hesablama Palatasının Xızı və Xətai rayon İcra hakmiyyətlərində yoxlama qərarı hər iki icra başçısının yol verdikləri ciddi səhvlərdən qaynaqlanır: «Xüsusiylə Xızı rayon icra hakimiyyətinin başçısı Xəzər Aslanovun adının qardaşının dələduzluq olayında hallanması və bu yöndə şikayətlərin dövrü mətbuatda geniş yayılmasından sonra başlanan yoxlama, düşünürəm ki, onun karyerasına nöqtə qoyacaq əsas faktor olacaq. Mənim bildiyimə görə, onun vaxtı ilə Fövqəladə Hallar Nazirliyinin Gəncə Regional Mərkəzinə rəhbərlik etmiş qardaşı Rövşən Aslanovun Əbülfəz Cəlal oğlu Əliyevə kələk gəlməsi hakim dairələrdə də ciddi müzakirəyə səbəb olub. Və Xəzər Aslanovun doğma qardaşı, Neftçala Rayon İcra Hakimiyyətinin başcısı İsmayıl Vəliyevin isə qaynı olan Rövşənin bu hərəkəti adıçəkilən hər iki başçısı üçün ciddi baş ağrısına çevrilib. Bir sözlə, hakim dairələr icra başçılarının xarici ölkələrdə bizneslərini nəzarətə götürməklə yanaşı, həm də onların fəaliyyətlərini təftiş etdirməkdə maraqlı duruma gəliblər. Ona görə hesab edirəm, adları “qara siyahı”da olan Xızı və Neftçalanın icra başçılarının vəziyəti yaxşı deyil. Belə bir məqamda Xızıda təkcə bir əməliyyatla 950 min manat büdcə vəsaitinin təyinatından yayındırılması söhbəti də, Xəzər Aslanovun vəziyyətini dramatikləşdirəcək.

Bu və ya digər məqamlarla bağlı yayılan ciddi ittihamlardan sonra Hesablamaa Palatasının qəfil geniş yoxlama qərarı verməsi, təsadüfi deyil. Məncə, Xəzər Aslanov əsas da qardaşının dələduzluğunun güdazına veriləcək.

O ki qaldı Xətaidə aparılan yoxlamalara, hesab edirəm, barəsində son illər artan şikayətlər fonunda bu yoxlama icra başçısı Razim Məmmədova da xoş gələcək vəd etməyəcək».

Mənbə Hesablama Palatasının hazırda “Azərbaycan Televiziya və Radio Verilişləri” Qapalı Səhmdar Cəmiyyəti ilə “Azərbaycan Hava Yolları” Qapalı Səhmdar Cəmiyyətində də (AZAL) yoxlama apardığını deyib. Məsələnin ən maraqlı tərəfi isə bu yoxlamanın Vergilər Nazirliyi ilə birgə aparılmasıdır: «Hazırda hər iki qurumda yoxlama davam etdirilir. Hesab edirəm, Vergilər Nazirliyinin nümayəndələrinin iştirakı ilə aparılan yoxlamada məqsəd hər iki büdcə təşkilatının rəhbərlərinin də gizli əməllərini üzə çıxarmaq və nəticəyə uyğun onları cəzalandırmaq olacaq. Çünki hər iki qurumda rəhbər şəxslər də ayrılan vəsaitləri istədikləri şəkildə xərclənməsi və mənimsənilməsini həyata keçiriblər. Yəqin ki, Vergilər Nazirliyi ilə palatanın peşəkar əməkdaşları bunları üzə çıxarmaqdan çəkinməyəcəklər. Sizi əmin edirəm ki, həm AZAAL, həm də AzTV-də elə maliyyə fırıldaqlarına yol verilib ki, bu, Cahangir Əsgərovla Arif Alışanovun karyeralarını nəinki bitirəcək, hətta onların məsuliyyətə cəlb olunmasına da rəvac verə bilər. Sözsüz ki, bunlar üçün mütləq siyasi qərar olmalıdır. Məncə, o qərar verilərsə, hər iki qurumda üzə çıxacaq heyrət doğrucu faktlar cəmiyyətə də şok yaşadacaq».

AZAL-dakı yoxlama qərarının yaratdığı rezionas haqqında danışan müsahibimiz deyir ki, bu yoxlama qərarı təkcə Cahangir Əsgərovu deyil, həm də onun «patronluq» etdiyi MMC-lərin rəhbər şəxslərini də qorxuya salıb:

«Cahangir Əsgərov özünə yaxın MMC-lərlə müqavilələr bağlayaraq, “Azərbaycan Hava Yolları” Qapalı Səhmdar Cəmiyyətinin əsas maliyyəsinin onların vasitəsiylə reallizə etdirir. Yəqin xatırlayırsınız, bir müddət əvvəl Türk Hava Yollarının rəhbəri də Türkiyədə bu metoddan istifadə edərək, milyonlarla dollar vəsaiti təyinatından yayındırmaqla, mənimsəmişdir. Və bu açılan kimi, o, vəzifəsindən istefa verdi. Hazırda da onun işi prokurorluqdadır. Yəni sözüm odur ki, eyni vəziyyəti Cahangir Əsgərov Azərbaycanda daha rüsvayçı formada təkrarlayıb və bu proses indi də davam

etdirilir. İndisə Hesablama Palatası Vergilər Nazirliyini cəlb etməklə, durumu dramatikləşdirib. Görünür, indi bu pulların hesabını sormaq zamanı çatıb».

Müsahibimiz deyir ki, əslində, adıçəkilən hər iki qurumda yoxlama qərarının verilməsində palatadan daha çox, vergilər naziri Fazil Məmmədov həddən artıq maraqlıdır: «Sadəcə, o, Vergilər Nazirliyinin qəfil yoxlama qərarının rezionas doğurmaması üçün Hesablama Palatasının qərarına hörmətlə yanaşıb. Yəni Fazil Məmmədov palatanın xətti ilə bu iki qurumu və onların nəzarətində olan MMC-lərlə yol verdikləri maliyyə fırıldaqlarını da ifşa etməkdə maraqlı görünür».

Yazıda adları hallanan şəxslərin də mövqeyini dərc etməyə hazırıq.