Cinayət işləmiş şəxsin kənd icra nümayəndəsi olmağa hazırlaşdığı bildirilir

Azərbaycanda hər gün onlarla cinayət olayı baş verir. Onların arasında insan həyatının itirilməsi ilə sonuclanan cinayətlər də az deyil. Amma bu cinayətlərin bəzilərinin üstü müxtəlif səbəblərdən açılmamış qalır. Açılmamış cinayətlərinsə heç də hamısı əşyayi-dəlillərin tapılmamasından üstüörtülü qalmır, bu işlərdə bəzən cinayəti işləmiş adamların özləri və hamiləri tərəfindən aidiyyatı orqanların müxtəlif vasitələrlə “susdurulması” da ortaya çıxır. 2001-ci ildə Şamaxı rayonunun Avaxıl kəndində baş vermiş ölüm işinin ört-basdır edilməsində oluğu kimi...

Hadisə barədə redaksiyamıza 2001-ci ilin may ayının 6-da müəmmalı şəkildə dünyasını dəyişmiş Şamaxının Avaxıl kənd sakini Hacı Nafis Quliyevin qardaşı oğlu Gingiz Əfəndiyev məlumat verir. Bu yazı da məhz Çingiz Əfəndiyevin verdiyi bilgilər əsasında hazırlanıb. Təbii ki, mətbuat olaraq, yazıda adları çəkiləcək şəxslərin də mövqelərini öyrənməyə hazırıq.

Müəmmalı ölüm

Yuxarıda qeyd etdiyimiz kimi, 2001-ci ilin may ayının 6-da, saat 19 radələrində Şamaxı rayonunun Avaxıl kəndində Hacı Nafis Quliyev küçədə dünyasını dəyişib. Hadisədən evlərində xəbər tutan mərhumun qardaşı oğlu Çingiz Əfəndiyev olay yerinə gəlib. O, həmin əraziyə gələndə görüb ki, əmisi N.Quliyev şəxsi avtomobilinin qarşısında yerə uzanmış halda keçinib. Hadisə yerindəsə Avaxıl kənd icra nümayəndəsindən başqa heç kəs olmayıb. Ç.Əfəndiyev dərhal rayon Polis idarəsinə xəbər vermək istəyib. Bu zaman icra nümayəndəsi bildirib ki, artıq polisə də, prokurorluğa da məlumat verilib. Lakin nədənsə gecə saat 12-yə qədər heç bir aidiyyatı orqandan hadisə yerinə nümayəndə gəlməyib. Nəhayət, təxminən gecə saat 12-də rayon prokuroru, müstəntiq, polis işçiləri və ekspert olay yerinə gəliblər. Gələn orqan işçiləri hadisə yerinə baxış keçirmədən, olay yerinin şəklini çəkmədən meyiti “UAZ” markalı poliş maşınına qoyaraq, rayon mərkəzinə - meyitxanaya (morq) aparıblar. Amma meyitin ekspertizasını sabaha saxlayaraq, dağılışıb gediblər.

Bir də sabah günorta saatlarında ekspert Mamed Abdurazaqov o vaxtkı prokuror Kərimağa Tağıyevin, o vaxtlar müstəntiq işləyən Nəsimi Səfərovun, bir neçə polis işçisinin və mərhumun qardaşı oğlu Ç.Əfəndiyevin iştirakı ilə meyiti yarıb. Meyitin yalnız göyərmiş boğaz hissəsində laxtalanmış qan aşkar olunub ki, bu da boğaz hissəsinin möhkəm sıxılmasından xəbər verir. Meyitin şəklini çəkəndən sonra yiyəsinə təhvil veriblər.

Təbii ki, mərhumun qohumları yas mərasimi ilə məşğul olmağa başlayıblar. Yeddi mərasimindən sonra Ç.Əfəndiyev nəticəni bilmək üçün rayon prokurorluğuna yollanıb. Ona bildiriblər ki, məhkəmə-tibbi ekspertinin rəyinə görə, əmisi Nafis Quliyev infarktdan ölüb və müstəntiq Nəsimi Səfərov işə xitam verib...

Torpaqdan axan qan

Bu yerdə, mərhumun qardaşı oğlu Ç.Əfəndiyev bir neçə il əvvəl əmisi ilə Avaxıl kənd Bələdiyyəsinin sədri olmuş (hadisə baş verən vaxtlarda) Elxan Qədimov və qardaşı Aydın Qədimov arasında torpaq toqquşması olduğuna diqqət çəkir.

Təfərrüat belədir: 1967-ci ildə Kolxoz idarə heyyətinin qərarına əsasən, kolxozun torpaq ərazisindən əkib-becərmək üçün 0.80 ha sahə Nafis Quliyevin istifadəsinə verilib. Ta ki, kolxoz sistemi dağılana qədər adıkeçən sahə N.Quliyevin əkin yeri olub. Kənddə İslahat komissiyası yaradılanda da həmin ərazi bölünən pay torpaqlarının siyahısına salınmayıb. Məlum olduğu kimi, sonradan bələdiyyə qurumları yaradıldı. O zamanlar Avaxıl kənd orta məktəbinin direktoru işləyən Elxan Qədimov bələdiyyə sədri postuna yiyələnib. E.Qədimov bələdiyyə sədri olan kimi N.Quliyevin istifadəsində olan sözügedən torpaq sahəsinə iddia edib. Lakin N.Quliyev torpaqdan

əl çəkmək niyyətində olmayıb. Getdikcə mübahisə qızışıb. Belə olan halda, İslahat komissiyasının sədri Hacağa Quliyev köhnə sənədləri bir daha təsdiq edərək, bütün sənədləri Şamaxı rayon Məhkəməsinə təqdim edib (Kolxozun verdiyi sənədisə N.Quliyev özü hakim Şahlar Babayevə verib). Amma sonradan məhkəmə həmin sənədlərin itdiyini(?) bildirib...

Tərəflərin torpaq zəmnində baş verən çoxsaylı mübahisələri zamanı Qədimov qardaşları N.Quliyevi camaat arasında dəfələrlə ölümlə belə hədələyiblər. Ölüm hadisəsi baş verən gün də həmin yerdə 30-dan çox kənd sakini olub. Ç.Əfəndiyev bildirir ki, əmisinin Qədimov qardaşları ilə əlbəyaxa olmasını və boğularaq öldürülməsini də həmin adamlar görüblər. Lakin iş araşdırılmadığından, cinayət hadisəsinə laqeyd yanaşma(?) ucbatından cinayətkarlar cəzasız qalıblar.

Ç.Əfəndiyev bu barədə dəfələrlə rayonun və respublikanın aidiyyatı orqanlarına müraciət etdiyini, lakin cinayətin açılması üçün heç bir əməli addım atılmadığını söyləyir. Əmisinin məlum cinayətkarlar tərəfindən qətlə yetirildiyini israr edən Ç.Əfəndiyev, hüquq-mühafizə orqanlarının bu işə barmaqarası baxmasını başa düşmədiyini bildirir və səsinin dövlət rəhbəri səviyyəsinə çatdırılmasında mətbuatdan kömək istəyir.

P.S. Bildirildiyinə görə, Elxan Qədimov hazırda bələdiyyə işlədiyi dönəmdə qurub-yaratdığı “Qoşabulaq” restoranlar şəbəkəsinə rəhbərlik edir və rayon İH-də olan havadarlarının köməkliyi ilə Avaxıl kənd icra nümayəndəliyinə rəhbər gəlmək istəyir. Yəqin ki, yuxarıda qeyd olunan hadisənin məzmunu səlahiyyət verən dövlət qurumlarının diqqətindən qaçmaz.