Yeni yaradılan idarələrə müdir təyinatı tərəfləri üz-üzə gətirib

Xəbər verildiyi kimi, Azərbaycanda rayon icra hakimiyyətlərində daha bir struktur islahatı həyata keçirilib.

«Gündəm xəbər»in məlumatına görə, aprelin 1-dən etibarən rayon icra hakimiyyətləri başçılarının aqrar məsələlər üzrə müavini ştatı ləğv edilib. Bununla yanaşı, İcra Hakimiyyətlərində aqrar məsələlər şöbəsi də ləğv olunub.

Aldığımız məlumata görə, artıq icra başçılarının sözügedən sahə üzrə müavin ştatı və şöbələrində ixtisar aparılıb. Onların bəziləri İcra Hakimiyyətinin “İqtisadiyyat” şöbəsində işlə təmin olunub. Bəziləri isə hələ də işsiz qalıb.

İxtisarların aparılmasının zərurətinə gəlincə isə, bunun rayonlarda kənd təsərrüfatı idarələrinin yaradılması ilə bağlayırlar. Hansı ki, aprelin 1-dək icra başçılarının aqrar məsələlər üzrə müavinləri kənd təsərrüfatı və torpaqla bağlı məsələləri koordinasiya edirdilər. Bundan sonra isə həmin fuksiyanı yeni yaradılan idarələr həyata keçirəcək. Burada diqqətçəkən bir məqam isə hələ də həmin idarələrin rayonlarda fəaliyyətə başlamamasıdır.

«Gündəm xəbər»in apardığı araşdırma zamanı o da aydın olub ki, hətta əksər rayonlarda Kənd Təsərrüfatı Nazirliyinin tabeliyində olacaq həmin idarələrin inzibati binalarının tikintisi də başa çatdırılmayıb:

«Bundan əlavə, prezident sərəncamına baxmayaraq, bu idarələrin hələ də ştat cədvəli müəyyən olunmayıb. Bu səbəbdən də idarələrə heç bir işçi qəbul olunmayıb. Bu prosesin isə may ayının 15-dən etibarən aparılacağı bildirilir».

Məlumata görə, may ayının 15-dən iyunun sonunadək kənd təsərrüfatı naziri Heydər Əsədov bu prosesi bitirəcəyi vədini verib:

«Maraqlıdır ki, bu müddətə qədər rayonlarda kənd təsərrüfatı sahəsinin necə kurasiya ediləcəyi və subsidiyaların necə paylanacağı, hələ də müəmma olaraq qalır».

Bu və ya digər məsələlərlə bağlı «Gündəm xəbər»i məlumatlandıran mənbə deyir ki, hakimiyyətin belə addım

atması, yanvar ayında Prezident İlham Əliyevin icra başçıları və iri ranqlı məmurlara keçirdiyi müşavirədə etdiyi xəbərdarlıqla bağlı olub:

«Xatırlayırsınızsa, Prezident İlham Əliyev həmin müşavirədə subsidiyaların məmurlar tərəfindən mənimsənildiyini açıq şəkildə deyərək, icra başçılarına və kənd təsərrüfatı nazirinə xəbərdarlıq elədi. Hətta Heydər Əsədovun ötən il istehsalın aşağı düşməsinin əsl səbəbini quraqlıq və digər bəhanələrə bağlamasına da irad tutaraq, onu açıq danışmamaqda ittiham etdi. Həmin müşavirədən bir neçə gün sonra isə ölkədə “Kənd təsərrüfatı ili” elan olundu. Bununla bərabər, bu sahə ilə bağlı müxtəlfi sərəncamlar verilməklə, Heydər Əsədovun qarşısında duran maneələr götürüldü. Yəni ötən ildən fərqli olaraq, Heydər Əsədov daha gizli hesabatlarında kimsəni, daha dəqiqi, icra başçılarını və onların tabeliyində olan məmurları ittiham edə bilməyəcək. Artıq nazirin yolunu tam açıblar. Elə icra başçılarının müavinləri və şöbə müdirlərinin ixtisar olunması və onların səlahiyyətinin bütövlükdə Heydər Əsədovun nəzarətində olacaq idarələrə verilməsi də, buna hesablanıb. İlk baxışdan Heydər Əsədovun icra başçılarına qalib gəldiyini deyə bilərik. Amma onu da unutmayaq ki, bu proses onun üzərinə çox ciddi məsuliyyət yükləyib. Yəni, bu qədər geniş imkanların yaradılması qarşılığında bu sahədə çox böyük inkişaf gözləntisi var. Və baş verəcək hər hansı bir eniş Heydər Əsədovun gələcəyini zərbə altında qoyacaq».

Müsahibimiz deyir ki, indilikdə hər şey Heydər Əsədovun «yolunun açılması» kimi sezilir və onun icra başçıları üzərində mütləq qalibiyyəti kimi görünür. Ancaq icra başçıları ilə naziri qarşıdakı aylarda daha bir gərgin mübarizə gözləyir:

«Bildiyiniz kimi, hazırda Prezident sərəncamı əsasında rayonlarda kənd təsərrüfatı idarələrinin yaradılması istiqamətində ciddi işlər aparılır. Yuxarıda qeyd etdiyimiz kimi, hələ ki, bəzi rayonlarda bu idarələrin inzibati binaları və ştat cədvəli də hazır deyil. Məhz bu məqam da nazirlə icra başçılarını üz-üzə gətirib. Bəli, nazir Heydər Əsədov rayonlardakı kənd təsərrüfatı idarələrinə rəbhər və işçilərin götürülməsini müdaxiləsiz özü həyata keçirməyə çalışır. Amma icra başçıları və hakim dairələr həmin idarələrə də digərləri kimi, icra başçılarının təqdimatı ilə müdir təyinatının həyata keçirilməsini istəyirlər. Bu isə tərəfləri yenidən üz-üzə gətirib».

Məlumatlı şəxs deyir ki, bu məsələdə icra başçıları haqlı sayıla bilərlər: «İcra başçıları rayondakı hər şeyə cavabdehdir. Onlar prezidentin yerdəki nümayəndəsi olaraq, bütün idarə və müəssisələrin fəaliyyətini koordinasiya etməli, onlara səlahiyyətləri çərçivəsində nəzarət etməlidirlər. Bəli, bunlar qanunla tənzimlənir. Yəni bütün idarələrdə ikili tabeçiliklər var. Çünki belə halda bir nəfərin təkbaşına «hakimiyyətli»liyi daha dərin korrupsiyya və digər xoşagəlməz hallara yol aça bilər. Ona görə qanuna bu məsələ salınıb. Ancaq Heydər Əsədov düşünür ki, «təkhakimyyətlilik» nəticəsində o, daha uğurlu fəaliyyət göstərər, daha böyük inkişafa nail olar. Bütün bunlar isə Azərbaycan şəraitində hər iki tərəf öz arqumentlərində haqlı göründüyünü göstərir. Ancaq qanunla bu durumda icra başçıları haqlıdır. Yəni indiki qanun və müvafiq aktlarla icra başçısının təqdimatı olmadan Heydər Əsədov həmin idarələrə müdir təyinatı həyata keçirə bilməz. Bəzi icra başçıları da bunu əsas götürərək, həmin idarələrə öz adamlarını yerləşdirməklə, böyük pulların dövran edəcəyi sahəni nəzarətdə saxlayacaqlarını planlayırlar. Heydər Əsədov da bunu bildiyindən, təyinat məsələsində vəziyyəti dəyişməyə çalışır. Ona görə də icra başçılarının aqrar məsələlər üzrə müavin və şöbə müdirlərinin

ixtisara düşməsinə baxmayaraq, hələ də rayonlarda bu sahələrə nəzarət edən iddarə rəisləri təyinatı olmayıb».

Cəfər Mərdanoğlu