Bildiyimiz kimi, Prezident cənab İlham Əliyevin diqqət və qayğısı nəticəsində son illər ölkəmizdə yüzlərlə yeni tibb ocağı tikilib və ya əsaslı təmir edilib. Tibb müəssisələri müasir avadanlıqlarla təmin olunub. Ölkə prezidentinin müəyyən etdiyi proqramlar tibb müəssisələrinin təmir və bərpasını, onların ən müasir avadanlıqlarla təmin olunmasını, vətəndaşların pulsuz dərman vasitələri və preparatlarla təchiz olunmasını, müalicəsini, regionlarda diaqnostika mərkəzlərinin istifadəyə verilməsini, xüsusilə uşaqların bütün tibbi xidmətlərlə ən yüksək səviyyədə əhatə olunmasını və səhiyyə sahəsində digər islahatların başlıca istiqamətlərini təşkil edir. Həyata keçirilən müxtəlif tədbirlərə baxmayaraq, bu gün ölkə əhalisinin böyük bir hissəsi keyfiyyətli səhiyyə xidmətindən istifadə edə bilmir. Təbii ki, bu da bir çox səbəblərlə izah oluna bilər. Başlıcası isə yarıtmaz kadr potensialı ilə ölçülür. Səhiyyə sistemində adicə, mərkəzi xəstəxanalara təyin olunmuş kadrlar bu sahəyə yalnız gəlir mənbəyi kimi baxırlar. Ümumiyyətlə, respublika səhiyyəsində təklif olunan xidmətlərin keyfiyyəti inkişaf etmiş ölkələrə nisbətən xeyli aşağıdır. Məhz bu səbəbdən əhalinin bir qədər imkanlı təbəqəsi Azərbaycanın səhiyyə sisteminə etibar etmədiyindən xaricə üz tutmaq məcburiyyətində qalırlar. Son vaxtlar bu hal, yəni vətəndaşların müayinə və müalicə məqsədilə xaricə üz tutması daha da çoxalıb. Bu isə insanların səhiyyəmizə etibar etməməsinin göstəricisidir. Əgər belədirsə, bəs onda dövlət nəyə görə səhiyyə sektorunun inkişafına hər il milyonlarla vəsait ayırır?

Etiraf edək ki, paytaxtla müqayisədə bölgələrdə yerləşən səhiyyə mərkəzlərində vəziyyət daha acınacaqlıdır. Buna misal olaraq, Ağstafa Rayon Mərkəzi Xəstəxanasında (RMX) üzə çıxan neqativ halları göstərmək olar. Rayon sakinlərindən əldə etdiyimiz məlumatlara görə, mərkəzi xəstəxananın baş həkimi İlham Mustafayevin işinə düzgün yanaşmaması səbəbindən ciddi problemlər meydana çıxıb. İnsaf naminə bildirmək istəyirik ki, rayonda səhiyyənin inkişafı üçün dövlət tərəfindən lazımi tədbirlər görülür. Belə ki, mərkəzi xəstəxana 2008-ci ildə əsaslı şəkildə təmir edilərək sakinlərin istifadəsinə verilib. 150 çarpayılıq xəstəxana dünya standartlarına uyğun tibbi avadanlıqlar, süni tənəffüs aparatları, monitorlar, dərman preparatları və gündəlik qida, həmçinin istilik və lüks iki çarpayılı otaqlarla təmin olunub. Eləcə də rayonda fəaliyyət göstərən tibb müəssisələrində tədricən bu cür şərait yaradılır. Amma Ağstafa Rayon Mərkəzi Xəstəxanasının baş həkimi İlham Mustafayevin, həmçinin onun tabeliyində çalışan bəzi həkimlərin fəaliyyəti bizi qane etmir. Ona görə ki, xəstəxanada pulsuz tibbi xidmət tətbiq olunmur. Bura müraciət edən insanlardan "şirinlik" adı altında nə isə tələb edilir. Sözsüz ki, belə xoşagəlməz hadisələrin qeydə alınması rayonun səhiyyə sisteminə sarsıdıcı zərbə vurur. Onu da qeyd etmək yerinə düşərdi ki, İlham Mustafayev gələn gündən xəstəxanada rüşvət və korrupsiya düz 2 dəfə artıb.

...Yaxşı yadımızdadır. Bu şəxs Ağstafa Rayon Mərkəzi Xəstəxanasına baş həkim gələndə belə söz-söhbət yayıldı ki, guya səhiyyə naziri Mustafayevi göndərib ki, getsin Ağstafa səhiyyəsini düzəltsin. Həkim də isti ev-eşiyini Bakıda qoyub Ağstafaya gedib. Əsla, bu da onun öz sözü imiş. Hazırda, məşhur bir mühasib lazımdır ki, Mustafayevin vaqon götürməz pulunu hesablaya...

Mustafayev əslən Qazax rayonunun Cəfərli kəndindədir. Həmin kənd də bədnam ermənilərlə həmsərhəddir. Burada o gün olmaz ki, atışma səsləri eşidilməsin. Əlbəttə, belə kəndin oğluna yaraşmaz ki, bacı-qardaşlarının başına güllə yağdırıldığı halda, bu da ağstafalılara zülm edərək onların varını-yoxunu əllərindən alsın. Səhiyyə Nazirliyinin rəhbərliyi də dəfələrlə bəyan edib ki, dövlət büdcəsindən maliyyələşən tibb müəssisələrində xidmətlər pulsuzdur. Biz isə Ağstafanın səhiyyə ocaqlarında pulsuz tibbi xidməti müşahidə edə bilmirik. Baş həkim vəzifəsinə biganə münasibət göstərir. Çünki, özü rüşvəti tabeçiliyində olanlardan daha çox alır. Xəstəxananın demək olar ki, bütün şöbələrində qanun pozuntularına rast gəlmək mümkündür. Belə ki, dövlət rayonun imtiyazlı xəstələri üçün hər il dərman preparatları və digər tibbi ləvazimatları ayırır. Buna baxmayaraq, həmin dərman və ləvazimatlar ünvanına çatmır. Daha doğrusu, xəstəxananın bəzi məsul əməkdaşları pulsuz dərmanları vətəndaşlara paylayarkən onlardan nə isə umurlar. Burada yatan xəstələrin qidalanması da istənilən səviyyədə deyil. Dövlət tərəfindən xəstələrin yüksək səviyyədə qidalanması üçün ərzaq məhsullarının ayrılmasına baxmayaraq, xəstə ziyarətinə gələn insanlar özləri ilə yemək gətirirlər.

RMX-nin doğum şöbəsində vəziyyətin daha kritik olduğunu deyən sakinlərin sözlərinə görə, bəzi həkimlərin işinə məsuliyyətsiz yanaşması ana və uşaq ölümü hallarının qeydə alınmasına gətirib çıxarır: "Keçən il ərzində doğum şöbəsində bir neçə xoşagəlməz hadisə qeydə alındı. 1988-ci il təvəllüdlü Təranə Əhmədova martın 2-də Ağstafa Rayon Mərkəzi Xəstəxanasında qeysəriyyə əməliyyatı ilə uşaq dünyaya gətirib. Martın 3-də isə ana dünyasını dəyişib. Bu hadisədən sonra Səhiyyə Nazirliyi məsələyə müdaxilə etdi.

Nazirliyin Doğuşayardım Komissiyasının iclasında Ağstafa Rayon Mərkəzi Xəstəxanasının doğum şöbəsində baş vermiş ölüm hadisələri təhlil edilərkən bu tibb müəssisəsində doğuşayardım xidmətinin həyata keçirilməsində ciddi nöqsanların olduğu aşkar edilib. Komissiya Ağstafa Rayon Mərkəzi Xəstəxanasının doğum şöbəsinin müdiri Ziba Məmmədovanın tutduğu vəzifədən azad olunması barədə qərar qəbul edib. Bundan əlavə, ana ölümləri ilə əlaqədar aidiyyəti olan Ağstafa rayon Muğanlı kənd sahə xəstəxanasının baş həkimi İ.Sofiyevə xəbərdarlıq, mama-ginekoloq M.Qocayevaya töhmət verilməsi barədə qərar verilib. Bütün bunlara rəğmən, doğum şöbəsində vəziyyət hələ də düzəlmək bilmir. Əfsus ki, baş həkim rayonun səhiyyə sistemindəki problemlərin aradan qaldırılması haqda heç nə fikirləşmir. Elə bu səbəbdən Ağstafanın səhiyyəsinin məhvi gündən-günə daha da sürətlənir".

Mustafayev həm də korrupsiyanın içində olan şəxsdir. Dövlət vəsaitini MMC-lərin əli ilə göyə sovurur. Məsələn, bu adam elə hesab edir ki, hər şey başlı-başına və nəzarətsizdir. 2014-cü ildə mərkəzi xəstəxanaya ayrılan 39.338 manat dəftərxana xərcini fiziki şəxs Salmanlı Sabir Etibar oğlunun əli ilə nəğdləşdirmişdir. Əsaslı təmir üçün 80.896 manat, cari təmir üçün 39.400 manatın haraya xərcləndiyi sual altındadır.

Ağstafa səhiyyəsinin tabeçiliyindəki tibb məntəqələri yenə həmin vəziyyətdəcə qalır. Uzağı üzündən boya ilə boyanmış ola, ya olmaya. Bu nə deməkdir? Baş həkimin bu işləri, sadəcə hələ ki, bizə sızan balaca bir məlumatdır. Görün, bilmədiklərimiz nələr vadır.

Güman edirik ki, Səhiyyə Nazirliyi baş həkim İlham Mustafayevin çirkin əməllərinə göz yummayacaq, lazımi tədbir görəcəkdir.

Qarşı tərəfin də münasibət bildirmək hüququ var.

İlham Hacalı