Biznesmenlərin maliyyə xəyanətləri prezidentin gözəgörünməz etibarlı komandası tərəfindən ifşa edildi, dövlətin iqtisadi siyasətinə böyük zərbə vuran 14 oliqarx-məmur istintaqa cəlb olundu; Hacı İbrahim Nehrəmli daha çox sərvət əldə etmək hərisliyinin qurbanına necə çevrildi – “Gündəm-xəbər”də...

Azərbaycanda burjuaziyanın total şəkildə həbsinə başlanıb. Bu həbslər dalğası maliyyə-bank sektorunu əhatə edib. İri ranqlı bankirlərin, oliqarxiyaya çevrilmiş biznesmenlərin maliyyə xəyanətlərinin bağışlanmaz bir xəta kimi qiymətləndirilməsi onların bir -bir qandallanması ilə müşahidə olunur.

Hakimiyyətin ən üst təbəqəsində özünə yer etmiş və iqtidarın kifayət qədər ciddi biznes şəbəkələrini idarə edənlərin tək-tək xəyanət etdiyi, ölkənin büdcəsinə və dövlətin iqtisadi siyasətinə böyük zərbə vurduğu ifşa edilib.

Hökumətin bel bağladığı və maliyyə əməliyyatlarında güvəndiyi kadrların məkrli planı ölkə rəhbərliyinin gözəgörünməz qüvvələri tərəfindən faş olunub. Məlum olub ki, ölkədə ciddi şəkildə qeyri-leqal maliyyə əməliyyatları, pul köçürülməsi, manatın devalvasiyası fonunda dolların külli-miqdarda toplanması müəyyən edilib.

Prezidentin uğurlu dövlət siyasəti

Prezident İlham Əliyevin uğurlu iqtisadi manevrləri və ətrafındakı etibarlı komandası bu “xain şəbəkə”ni tezliklə ifşa etməyi bacarıb. Dövlətin puluna xəyanət edən və büdcəni çətin situasiya ilə üz-üzə qoyan bu qüvvələrin aşkarlanaraq həbs olunması İ.Əliyevə inamı möhkəmləndirmiş oldu. İctimai rəy ondan ibarətdir ki, dövlət burjuaziyanın, korrupsiyaya bulaşmış,

banklardan milyonlarla manat kredit götürmüş oliqarxların fəaliyyətini yaxından izləyir, nəzarət edir.

Hər şey Bayraq Meydanı Kompleksinin sabiq rəisi Rəşad Məmmədov və Beynəlxalq Bankın sədri Cahangir Hacıyevin ətrafında cərəyan edən proseslərlə start götürdü. Ardınca iş adamları - "PNN Group" şirkətinin rəhbəri Nizami Piriyev, "Azərinşaat" MMC-nin rəhbəri Mehdi Əliyev, Şəkinin sabiq icra başçısı, "BakFen" MMC sahibi Murad Cabbarlı, sabiq deputat, "Globus Plaza"nın sahibi Dünyamin Xəlilov, "Avesta" holdinq və "Xəzər İsland"ın rəhbəri Hacı İbrahim Nehrəmli saxlandılar. Baş Mütəşəkkil Cinayətkarlıqla Mübarizə İdarəsi (BMCMİ) tərəfindən dəvət olunan iş adamlarının maliyyə xəyanətləri sübuta yetirildi.

Rəsmilər də bu dövləti aldatmaq istəyən oliqarxların həbsinin davamı olacağını açıqladı. Həbs olunanların ictimai statusu onların sıradan şəxs olmamalarını sübut edir. Burada səbəblər heç də kredit məsələləri və aşağı faizlərlə bağlı deyil. Bu həbslərin arxasında hər hansı bir şəkildə ictimai əmlakın ələ keçirilməsi və başqa xarakterli məsələlər də var. Bu ondan ibarətdir ki, hər zaman hökumət maliyyə-bank sektorunda fəaliyyəti diqqət mərkəzində saxlamalıdır. Çünki böyük pul kütlələri həmişə ölkədəki maliyyə sabitliyinə təsir göstərə bilir.

Manatdan sui-istifadə edən məkrli qüvvələr

Əgər 21 fevral devalvasiyadan sonra kimlərsə ölkədə möhtəkirliyə əl atıbsa, eyni zamanda külli miqdarda vəsaitləri malik olduqları sirlər əsasında əldə ediblərsə və bunun nəticəsi olaraq Azərbaycan özünün müəyyən maliyyə rezervlərindən məhrum olubsa bu yöndə işləri daha konfidensial, daha fərqli şəkildə aparmaq lazımdır.

İkincisi, müxtəlif maliyyə vəsaitlərinin aşağı faizlə verilməsi fonunda əvəzi olaraq qoyulmamış hansısa əmlaklar praktikası aşkarlanırsa, bu cinayətlər müəyyənləşirsə, burada başlıca məsələ külli miqdarda kreditlərin verilməsi mexanizminin dəqiq müəyyənləşməməsi ilə bağlıdır.

Bu həbslərin ən ali nöqtəsi Hacı İbrahim Nehrəmli oldu. Xəzər adaları layihəsini reallaşdıran iş adamı günün birində etdiyi əməllərin cavabını verməli oldu.

Layihə Bakıda fənərli qaloş istehsalı və ya Xəzərin ortasında süni adalar yaradılmasını nəzərdə tuturdu. Həmin layihə ilə bağlı reklam kampaniyası başlanır, təbliğat aparılırdı. Bir qədər keçən kimi kommersiya bankından o layihənin biznes-planına əsaslanan kredit götürülürdü. Kreditin məbləği milyonlarla manat olurdu. Layihə ilə bağlı illüziya davam etdirilir və axırda kreditlərin ümumi məbləği onlarla, yüzlərlə milyon manata çatdırılırdı.

Bu isə yüklənmə və borclanmaya gətirib çıxarmışdı. Hacı İbrahimin ərəb investorlara kələk gəlməsi, adadan ev almaq istəyənlərin pulunu mənimsəməsi ciddi şəkildə problemər meydana çıxardı. Elşad Məmmədovu aldadan iş adamı indi maliyyə xəyanətlərinə görə istintaqa cəlb olunub.

“Çarıqlı milyoner” hacı İbrahimin sonu

Əslində, harınlamış oliqarxların və bankirlərin həbsi gözlənilən idi. Dövlətin pullarını mənimsəyən oliqarxların və onların övladlarının harınlığı hamını təngə gətirmişdi. Saxlanılanlar arasında “dilənçilikdən şahzadəliyə” yüksəlmiş Hacı İbrahim Nehrəmlinin şəxsiyyəti diqqəti daha çox çəkdi.

Ekstravaqant, adı ətrafında qalmaqallar dolaşan, daima gözəl qadınların və bahalı avtomobillərin fonunda fotoqraflara poz verməyi sevən bu əyalətçi ilə cəmi bir neçə dəqiqə söhbət etmək kifayət edirdi ki, şoka düşəsən - bu intellektin sahibi bu qədər sərvətə necə sahib olub?

Hacı İbrahimin rəhbərlik etdiyi “Avesta” konserni 1996-cı ildən fəaliyyət göstərir. Konsernin tərkibinə “Azər-Ross” MTK, “Günel LTD”MMC, “Həsən-96” MTK, “Hüseyn-94” kiçik müəssisəsi, “İlkan”MMC, “Azər-Ross İk ”MMC və “SHIG INVESTMENT LTD” daxildir. “Avesta” tikinti biznesində əsas oyunçulardan hesab edilir. 1995-2000-ci illər ərzində Naxçıvan MR-nin Ali Məclisinin deputatı olub.

Hacı İbrahimin qurbanlarından biri olan iş adamı Elşad Məmmədov “Avesta” konserniinə daxil olan “Həsən - 96” MTK-nın tikdiyi çoxmərtəbəli binada ümumi dəyəri 355 min manat olan iki mənzil almasına baxmayaraq, mənzilinə sahib ola bilməyib.

Məhkəmələrə baş vuran biznesmen heç nəyə nail ola bilməyəcəyini anlayaraq, Hacı İbrahimin süqutunu gözləməyə başlayıb. Hacı İbrahim daha çox sərvət əldə etmək hərisliyinin qurbanına çevrilməli idi. “Xəzər adaları”na 1 milyard manatdan çox vəsait xərclədiyini bildirən Hacı İbrahimin blef etdiyini hətta ən sadəlövh insan da dərk edir.

Ekspertlər əmindirlər ki, ən yaxşı halda, layihəyə 50-60 milyon manat xərclənib. Nehrəmli iş adamı manatın devalvasiyaya uğraması, Rusiyadakı böhranın Azərbaycanın sərhədlərinə yaxınlaşdığı dövrdə möhtəkirliyini daha da artmağa başladı. Aydın məsələ idi ki, dövlət belə bir həssas zamanda İbrahim İbrahimova milyonları mənimsəməyə imkan verməyəcək.

Hacı İbrahim və saxlanılan bankirlərin sayəsində ölkədə iqtisadi sabotajın hazırlandığı ehtimalı da yaranmaqda idi. Özünü “Azərbaycanın Berezovskisi” hesab edən Hacı İbrahim iqtisadi böhran nəticəsində daha da varlanmaq arzusunda bulunurdu. Onun “Xəzər adaları”na qurban edəcəyi 125 milyard manata sabotajdan başqa ad vermək mümkün deyildi.

Hacıyevə üç gün möhlət

Bu prosesin baş qəhrəmanı Azərbaycan Beynəlxalq Bankının (ABB) idarə heyətinin sabiq sədri Cahangir Hacıyevi unutmaq olmaz. Onun brend mağazası cərimə olunub. Məlumata görə, cəriməni C.Hacıyevin françayzeri olduğu “Harvey Nichols” şirkəti edib. Şirkət Azərbaycan nümayəndəliyini onun adına xələl yetirməkdə ittiham edir.

Buna görə də “Harvey Nichols” Cahangir Hacıyevi 25 milyon dollar cərimə edib. Şirkətin Azərbaycandakı rəsmi distribyutoruna 3 gün vaxt verilib. Bu müddət ərzində cərimə ödənilməzsə, “Harvey Nichols” şirkəti françayzinq müqaviləsini pozaraq, adını geri götürəcək.

Məlumat üçün bildirək ki, françayzinq bir şirkətin öz əmtəə nişanından istifadə ediməsinə rəsmi icazə verməsidir. Françayzer onun əmtəə nişanından istifadəyə görə digərinin gəlirindən müəyyən faiz alır. Qeyd edək ki, “Harvey Nichols”un Bak nümayəndəliyinin ofisi “Globus Plaza”da yerləşir. “Globus Plaza”nın rəhbəri, sabiq millət vəkili Dünyamin

Xəlilovun dünən maliyyə xəyanətində ittiham olunaraq saxlanıldığı barədə məlumat yayılıb. Plazanın özü isə polis nəzarətinə götürülüb, mağazaların kassaları möhürlənib və plazada axtarış işləri aparılıb. “Harvey Nichols”un Azərbaycan üzrə françayzerinin isə Cahangir Hacıyev olduğu bildirilir.

Onu da qeyd edək ki,“Harvey Nichols Baku” Böyük Britaniya və İrlandiya hüdudlarından kənarda “Harvey Nichols”un portfoliosunda 8-ci beynəlxalq mağazadır.

Həbslər davam edəcək, bankirlərə çatacaq

“Çox təəssüflər olsun ki, bəzi bank rəhbərləri yalnız özlərini, ətraflarını, qohum-qardaşlarını düşünürlər. Amma Azərbaycanın dövlət müstəqilliyi uğurunda mübarizə aparmağı o qədər də düşünmürlər. Həmin bankların rəhbərləri müəyyən qədər səhvlərə yol veriblər. Ona görə də cəzalarını çəkməlidirlər”. Bunu millət vəkili Vahid Əhmədov deyib. Maliyyə fırıldaqçılığında ittiham edilən oliqarxların kütləvi həbsindən söz açan deputat qeyd edib ki, bundan sonra da həbslər davam edəcək.

V.Əhmədov hesab edir ki, kimliyindən aslı olmayaraq, belə əməllərə yol vermiş bütün şəxslər məsuliyyətə cəlb olunmalıdırlar:

“Həbslər dalğası hələ də davam edəcək. Həbslərin əhatə dairəsi genişlənəcək. Çünki burada külli miqdarda vəsaitin mənimsənilməsindən, dövlətə olan borcalardan və devalvasiya prosesindən sui-istifadə hallarından söhbət gedir.

Həmçinin Bayraq Meydanı ətrafında gedən proseslər, tikinti ilə əlaqədar evləri sökülən insanlardan alınan külli miqdarda vəsaitin mənimsənilməsi dövlətin diqqətindən yayınmır. Hüquq-mühafizə orqanları bu işləri çox yüksək səviyyədə aparacaqlar”. Millət vəkili həmçinin qeyd edib ki, bəzi bank rəhbərlərini də həbslər gözləyə bilər: “Bank sahəsində gedən proseslər son vaxtlar məni heç qanə etmirdi. Bu sahədə çox ciddi qanun pozuntuları hiss olunurdu. Biz buna mütəmadi olaraq toxunurduq.

Amma indi həmin qanunsuzluq halları yavaş-yavaş aşkarlanır. Dövlətin, xalqın etibar ilə bank rəhbəri vəzifəsinə təyin edilən bütün şəxslər qanun

çərçivəsində hərəkət etməlidirlər. Onlar verilən kreditlərin vaxtında geri qaytarılmasına, normal faiz dərəcələrinin tətbiqinə çalışmalıdırlar.

Ancaq kimliyindən aslı olmayaraq, Azərbaycanda qanuni kobud formada pozan və külli miqdarda dövlət vəsaitinin mənimsənilməsinə şərait yaradan bütün şəxslər məsuliyyətə cəlb olunmalıdırlar”.

Rafiq Qara