Yaxud, sərt olduğu qədər də kövrək olan Abid Şərifovu yersiz topatutma sifarişinin arxasında hansı niyyət yatır?
…Yaddaşımızda «Binəqədi müsibəti» kimi qalmış məlum yanğın hadisəsi ilk gündən mətbuatımızın gündəmində oldu… Bu sahədə çalışdığımdan bütün baş verənləri izləyib nəticə çıxarmadan nəsə yazmaq, kimisə ittiham etməyə tələsmədim… Ötən müddətdə diqqətimi ən çox çəkən isə budur ki, sən demə, bəzən gördükləri və şahidi olduqları ilə deyil, eşitdikləri ilə yazan və yazışan mətbuatımıza heç də 15 nəfərin ölümü, 50-dən çox vətəndaşımızın başına od ələnməsi və onların müxtəlif dərəcəli xəsarətlər alması ilə nəticələnmiş bu dəhşətli hadisənin-faciənin nəticələrinin tezliklə aradan qaldırılması yox, baş nazirin müavini Abid Şərifovun ətrafında qalmaqal yaratmaq lazım imiş…

Başına gələnlər başına gələcəklərin ən pisi olmayan Abid Şərifov…

Bu il 75 yaşını qeyd etmiş Abid Şərifovun xarakterini Azərbaycan ictimaiyyətində yaxşı bilirlər… Bir Allah bilir ki, yazdıqlarım yazmaq istədiklərimin çox az bir hissəsidir və ən vacibi, bu yazıdan Abid Şərifovun zərrə qədər də xəbəri yoxdur. Kimsə bu fikirlərimə şübhə ilə yanaşacaqsa, bunu buraxıram onun vicdanının ixtiyarına… Və elə isə, onda mən də həmin jurnalist-yazarların (başqalarının da) Abid Şərifovun barəsində sifarişli yazılar yazmasına şübhələrimdə niyə haqlı olmayım?!
Bəli, bilməyənlərə onu xatırladıram və bilmələrini istəyirəm ki, Abid Şərifovun əsil kişiyə xas sərt xarakterinin içində həm də bir tükənməz olmayan səbr və təmkin, bir də dəli bir kövrəklik yatır. Və qoy indi Abid Şərifovu evinin ətrafında güdənlər və hansısa «jurnalistlərə» güddürənlər, onun vəzifəsindən getməsinin vacibliyini (?) yazanlar… bilsinlər ki, Abid Şərifov ötən ilin mayın 14-də Türkiyədəki kömür şaxtasında baş verən partlayışda çoxsaylı insan tələfatı ilə bağlı Türkiyəyə Azərbaycan dövlətinin rəsmi nümayəndə heyətinin rəhbəri kimi getmişdi (İndi bəzi KİV-lər həmin səhnəni videolaşdırıb «Binəqədi müsibəti»ndəki məlum hadisədə Abid Şərifovun jurnalistlə dialoqunu müqayisəli şəkildə, amma mənfi çalardan təqdim edir). Başsağlığı vermə törənində indi «jurnalistlə sərt danışdı» deyə ittihamladığınız həmin Abid Şərifovun tribunada necə kövrəlib ağladığını, göz yaşını Azərbaycanlı kişisinə xas formada içinə sıxdığını bütün dünya gördü. Türkiyə TV-ləri həmin hüzunlü və ürək parçalayan kövrək səhnəni canlı yayımlayırdılar…
Yazarlarımızın kömpüterin arxasına keçib ağlına gələni yazdığı bir məqamda həmin tarixi anı bir də izlədim. Bütün KİV-lərin və bəzi tanınmışların da barəsində qınaq ünvanı seçdiyi həmin Abid Şərifovun nə qədər böyük ürəyə və bu ürəyin içində yatmış, hamının gördüyü və bildiyi, amma bəzilərinin görməzliyə vurduğu bir kövrəkliyi bir daha kəşf etdim.
Məqsədim Abid Şərifov haqqında hansısa utopik obraz yaratmaq da deyil. Həyat imtahanında çox sınaqlardan üzü ağ çıxmış insan-jurnalist olaraq mən az da olsa bu böyük və dizibərk Kişinin həyatına bələdəm. Kənardan çoxlarının gözünə baş nazirin müavini, bütün tikintilərə, fövqəladə hadisələr zamanı yaradılan dövlət komissiyalarının rəhbəri… kimi görünən Abid Şərifovun ailə həyatında da çox fövqəladə hadisələr olub… İstərdim ki, dövlətinə və xalqına siyasətdən tamamilə kənar səmimi xidmət göstərmiş, ağsaqqal bir insan haqqında nəsə deyəndə və yazanda həm də insani hissələri unutmayaq. Və bu «Abid Şərifov niyə jurnalistin sualına elə cavab verdi?» qara-qışqırıq salıb haray qoparanda unutmayaq ki, bu qabaqdangəlmişlik və dünyagörmüş ahıl insana deyilənlər bir gün bumeranq kimi özümüzə və üzümüzə dönüb qayıda bilər. Və heç kim də bundan sığortalanmayıb. Yoxsa, bu gün «Əlimdə bir saytım var, nə istəsəm yaza bilərəm» prinsipi ilə jurnalistika formalaşdırılmır. Heç adi insanlıq hissi də. Bu zərərli ənənə cəmiyyət üçün çox pis nümunədir! Çünki Abid Şərifov həyatında 13-17 mart 1995-ci il hadisələrini yaşayıb, onun yeganə oğlu on ildən çoxdur yataq xəstəsidir və bu ata-böyük Kişi hər gün həmin oğlunu qucaqlayıb hardasa olmuş fövqəladə hadisələrin aradan qaldırılmasına tələsir… Mən digərlərini dilə gətirmək istəmirəm, çünki bu yazını oxuyanda ola bilər ki, sərt xarakterli və kövrək ürəkli Abid Şərifov bunları mənə irad tuta bilər… Bəzi sirlər və hadisələr var ki, onu ailə bilir, dərdini içində çəkir, kimsənin bilməsini istəmir. Bunun özü də təməli möhkəm, sirri özünün olan ailələrə məxsus keyfiyyətdir.
Dostlar, mövzu çox həssas və məsuliyyətli olduğundan deyə bildiklərimdən min dəfə çoxunu deyə bilmirəm… Amma deyəcəyim odur ki, yaddaşınızı itiləyin, bir il əvvəl manşet yazılarınızda qürurla «Abid Şərifov Türkiyədəki faciəyə görə ağladı» yazdığınız nədir, bir həftə əvvəl Binəqədidə baş vermiş insan tələfatı ilə nəticələnmiş məlum dəhşətli hadisə ilə bağlı yaradılmış Dövlət Komissiyasının sədri olan, məlum yanğının qara tüstüsü başını dumanladığı bu kövrək insanın o anda jurnalistlərdən kiminsə tələm-tələsik verdiyi sualına cavabından şou düzəltmək nə??? Abid Şərifov həmin insandır ki, bir il əvvəl Türkiyədəki məlum faciədə kövrəlmiş və bu ağrını ağlamışdı… Binəqədidə baş verən hadisə isə Türkiyədəkindən də dəhşətli idi. Çünki Türkiyədə baş verənlər iş prosesində törənmişdi, Binəqədidəki isə bəzi məmurlarımızın pul hərisliyinin fəsadlarından, hansı ki, onların bir neçəsi artıq həbs edilib… Qoy Abid müəllim bu sözlərimdən inciməsin, məlum faciə ilə bağlı Dövlət Komissiyasının işçi qrupuna daxil olan, amma israrlı xahişi ilə adının çəkilməsini istəməyən məmurlardan biri ilə dünən olmuş təsadüfi görüşümüzdə mənə dedi ki, «…Abid müəllim həmin binadakı ölümləri görəndə göz yaşlarını saxlaya bilmədi, halı pisləşdi, dərhal lazımi dərmanları tapıb verdik, bir təhər özünə gəldi… Onun Prezidentin sədrliyi ilə keçirilən müşavirədəki pərişan halı da bunu təsdiqləyirdi ki, Abid müəllim həmin vaxtlarda çox pis durumda idi…».
Və belə bir insanı bu gün jurnalistin sualına birtəhər cavab verməkdə qınamaq nə dərəcədə ədalətlidir? Hansı saytı açırsan, bir mənbədən götürülüb paylaşılmış məntiqsiz iddialarla, gülməli və elə həm də ağlamalı… ittihamlarla doludur. Hansısa «jurnalistlərə» bu insanın evini güddürmək, təkrarən sual verib nəsə bir qalmaqal yaratmaq üçün yeni fürsət axtarmaq hansı niyyətə köklənib, bir düşünün. Təsəvvür edirsinizmi, artıq bəziləri Abid Şərifovun uzun illərdir bu vəzifədə olmasını, artıq yorulduğunu, deməli, vəzifədən getməli olduğunu və s. dilə gətirlər. Şəxsən mən bilirəm ki, bu Kişi yorulmayıb və… Deməli, məqsəd «Binəqədi müsibəti»nin fəsadlarının tezliklə aradan qaldırılmasına dəstək verəcək məlumatları yaymaq deyil, Abid Şərifovun vəzifədən getməsini dilə gətirməklə bu sərt və həm də kövrək insanı qıcıqlandırmaq, hövsələdən çıxarmaqdır. Təsəvvür edirsinizmi, 1940-cı ildə anadan olub 1962-ci ildən tikintidə əmək fəaliyyətinə başlamış (Azərbaycan SSR Nazirlər Sovetinin əsaslı tikinti şöbəsində böyük referent, "Azərnəqliyyattikinti" trestinin rəisi, 1988-ci ildən "Azərnəqliyyatyoltikinti" layihə-sənaye tikinti birliyinin rəisi, 1991-ci ildən Türkiyə Respublikasının Çerkesköy-Kapıkulu şəhərləri arasında dəmir yolunu elektrikləşdirən tikinti idarəsi rəisinin müavini, 1993-cü ildən "Azərnəqliyyatyoltikinti" layihə-sənaye tikinti Birliyinin bazasında yaradılan eyniadlı Dövlət Şirkətinin prezidenti) və 1995-cü ildən Baş nazirinin müavini vəzifəsində çalışan "Şöhrət" ordenli, böyük təcrübəyə və idarəetmə qabiliyyətinə malik mütəxəssisi istefaya səsləyirlər… Özü də kimlər! Və sonra da deyirlər ki, filankəs səbrini basa bilmədi, təmkinini pozdu, acı danışdı və s. Və bu xaraktercə sərt, ürəkcə kövrək Abid Şərifovu qaralayanların, yümşaq desəm, qara niyyəti artıq bununla da ortadadır. Sübut: «Binəqədi müsibəti»nə görə yersiz sual verib bu faciəni görüb özündə olmayandan alternativ cavab alan, sonra Abid Şərifovu topa tutan həmin KİV və ya saytlar həmin faciəni unudub keçiblər Abid Şərifov «problemi»ni çözməyə… Artıq hər şey unudulub, sən demə, mediamızın bir nömrəli problemi xaraktercə sərt, ürəkcə kövrək Abid Şərifov imiş!
Keçmiş olsun, özü də bütün mənalarda… Amma mən birmənalı olaraq deyirəm ki, medianın gündəmini zəbt etmiş bu topatutmada qara niyyət istisna deyil… Əgər bu jurnalist və ya KİV təəssübkeşliyidirsə, niyə hansısa jurnalist təqib olunanda, əsassız həbs olunanda, məhkəməyə veriləndə, döyüləndə, haqqı pozulanda… susursunuz, amma adını heç kimin hələ də dəqiq bilmədiyi bir jurnalistin bozarmış sualına qara tüstü fonunda, məlum dəhşətli faciəni görərək içindən qara qanlar axan Abid Şərifovun hansısa bir cavabı indi sizləri bu qədər narahat etməyə başlayıb???
Asif Mərzili