Türkan qəsəbə sakinləri torpaqlarının zəbt olunmasından narazıdır; prezidentə müraciət ünvanlanıb

Bakının Türkan qəsəbə sakinləri yaranmış vəziyyətdən çıxış yolu axtarır. Qəsəbə sakinlərini problemli vəziyyətə salan Xəzər rayon icra başçısının qəsəbəsi üzrə nümayəndəsi Rahil Babayevdir. “Gündəm-xəbər”ə şikayət edən sakinlər deyirlər ki, qəsəbənin dəniz hissəsində 100 hektarlarla ərazi ayrı-ayrı şəxslərə satılsa da, bu ərazidə qəsəbə sakinlərinə pay torpaqların verilməsi qadağan edilib.

Həmin torpaqlarda yalnız rayonun vəzifəli məmurları özləri üçün restoran və istirahət mərkəzləri tikdirməklə bizneslərini artırır. Qəsəbə sakinlərinin dolanışıqlarını təmin etmələrinə isə hər vəchlə mane olurlar. Bu torpaqların daha rahat satışa çıxarılması üçün R.Babayev hektarlarla əraziləri əvvəlcədən öz qohumlarının və yaxın adamlarının adına sənədləşdirib. Bütün bunların müqabilində isə qəsəbənin heç bir probleminin həllinə maraq göstərilmir. Son 4-5 il ərzində Rahil Babayev bir neçə dəfə növbəli olaraq Xəzər Rayon İcra Hakimiyyətinin Türkan qəsəbə nümayəndəsi və qəsəbə bələdiyyəsinin sədri vəzifələrini tutub. Əksər daş karxanalarına nəzarəti məhz R.Babayev həyata keçirir. İcra nümayəndəsi Rahil Babayevin törətdiyi qanunsuzluqları saxladığı qoçu dəstəsi də mühafizə edir. Məmurların özbaşınalıqları, qudurğan hərəkətləri dövlət başçısı İlham Əliyevin siyasətinə qarşı xudbin, məkrli addımlardır. Çünki Prezident dəfələrlə çıxışında məmurlara xəbərdarlıq edib ki, xalq üçün işləməlidirlər. Türkan icra nümayəndəsi isə ölkə başçısının xəbərdarlıqlarını qulaqardına vurur.