Ən-Nisə surəsi üstündə dava edən iki nəfər də cəzalandırıldı

Sumqayıt Apelyasiya Məhkəməsində dini qruplar arasında baş verən silahlı insident zamanı xuliqanlıqda təqsirli bilinən Vüqar Xəlilov və Elnur Nəzərəliyevin cinayət işi üzrə məhkəmə prosesi başa çatıb.

İttihama görə, Sumqayıt şəhərində fəaliyyət göstərən eyni dini baxışlarına görə yaradılmış dəstənin (camaatın) üzvü olmaqla həmin dəstənin başçısı hesab olunan (əmiri) Elşən Musayevin digər dini dəstənin üzvü Elmar Məmmədli ilə 11 dekabr 2013-cü il tarixdə günorta saatlarında Sumqayıt şəhərində yerləşən “Şərq bazarı” ticarət mərkəzinin qarşısında aralarında dini fikir ayrılığı üstündə mübahisə yaranıb. Vüqar Xəlilov baş vermiş münaqişəyə aydınlıq gətirməkdən ötrü Elşən Musayevi “Qarabağ” kinoteatrının qarşısında gözləyən Elmar Məmmədli və tərəfdarlarını həmin məqsədlə üzv olduğu dəstənin tərəfdarları ilə birlikdə toplaşdığı Sumqayıt şəhəri, 10-cu mikrorayon ərazisində yerləşən “Soltan” çay evinə gəlmələrini tələb edib.

İki dini qrup, fərqli baxışlar

həmin gün saat 20.30-da çay evinə Elçin Əkbərov, eləcə də sonuncunun başçısı olduğu dəstənin üzvləri olan Elmar Məmmədli, Anar Rəhimov və digərlərinin gəlib. Vüqar Xəlilov əsaslı səbəb olmadan Elşən Musayev, Elnur Nəzərəliyev və digərləri ilə birlikdə bir qrup şəxs təşkil edərək bıçaq, taxta və dəmir parçaları, habelə çay evində olan sərt predmetləri silah qismində istifadə edilən əşya kimi tətbiq etməklə Anar Rəhimov, Elmar Məmmədli, Yusif Eybalıyev və digərlərinin üzərində zor tətbiq olunması, habelə “Soltan” çay evinin icarədarı olan Əliheydər Mənsimova məxsus əmlakın bir qisminin zədələnməsi, bir qisminin isə məhv olunması ilə müşayiət olunan xuliqanlıq hərəkətləri ediblər.

Nəticədə Anar Rəhimov və Elmar Məmmədli sağlamlıqlarının qısa müddətə pozulmasına səbəb olan yüngül zərərvurmaya aid, Yusif Eybalıyevə isə dərəcəsi təyin edilməyən xəsarətlər yetirilib. Əliheydər Mənsimova isə 843 manat 80 qəpik məbləğində maddi ziyan vurulub.

Bundan başqa Vüqar Xəlilov döyüş sursatı olan zavod üsulu ilə hazırlanmaqla təyinatı üzrə istifadəyə yararlı bir ədəd hücum təyinatlı “HGR DM 41” tipli əl qumbarası və 5,45 mm kalibrli (“Kalaşnikov”) “AK-74”, “AKS-74”, “AKS-74U” konstruksiyalı avtomat silahlarda istifadə edilməsi üçün nəzərdə tutulmuş 31 ədəd zavod üsulu ilə istehsal edilmiş və təyinatı üzrə istifadəyə yararlı patronları istintaqa məlum olmayan

mənbədən qanunsuz olaraq əldə edib. Həmin döyüş sursatı 16 dekabr 2013-cü il tarixdə yaşadığı Sumqayıt şəhəri, 13-cü mikrorayon, ev 22, mənzil 8 ünvanda aşkar edilib. Həmin gün Elnur Nəzərəliyevin yaşadığı ı Sumqayıt şəhəri, 11-ci mikrorayon, 2 saylı təmir-tikinti idarəsinin həyətindəki fərdi evdə xeyli miqdarda silah-sursat aşkarlanıb.

Hökm və narazılıq

Cinayət işində adları hallanan Elçin Əkbərov, Əhməd Salmanov, Anar Mirzəyev, Zaur Paşayev, Elmar Məmmədli, Murad Məhərrəmov, Anar Rəhimov, Firudin Musayev, Vüqar Abdullayev, Amil Tağıyev, Elçin Mirzəyev, Cəlal Mikayılov, Kənan Mehrəliyev, Elşən Musayev, Elnur Nəzərəliyev və Vüqar Xəlilov ayrıca icraatda ittiham olunublar. Bakı Ağır Cinayətlər Məhkəməsinin hökmü ilə qəsdən adam öldürməyə cəhd, silah saxlama, narkotiklə ittiham edilən Elçin Əkbərov 9 il, Elmar Məmmədli 9 il, Zaur Paşayev 9 il, Firudun Musayev 7 il, Əhməd Salmanov 8 il, Anar Mirzəyev 8 il, Murad Məhərrəmov 8 il, Anar Rəhimov 8 il, Vüqar Abdullayev 8 il, Amil Tağıyev 7 il, Elçin Mirzəyev 8 il, Cəlal Mikayılov 7 il, Kənan Mehrəliyev 7 il müddətinə azadlıqdan məhrum edilib. Sumqayıtda sələfilərin başçısı olan Elşən Musayev isə tək mühakimə edilib və 13 il cəza alıb.

Vüqar Xəlilov və Elnur Nəzərəliyev isə Cinayət Məcəlləsinin 221.3-cü (xuliqanlıq) və 228.1-ci (qanunsuz olaraq odlu silah gəzdirmə) maddələri ilə ittiham ediliblər. Hər iki təqsirləndirilən şəxs Sumqayıt Şəhər Məhkəməsində mühakimə ediliblər və məhkəmənin hökmü ilə Vüqar Xəlilov 7 il, Elnur Nəzərəliyev isə 6 il 6 ay müddətinə azadlıqdan məhrum ediliblər. Hökmdən narazı qalan təqsirləndirilən şəxslər apelyasiya şikayəti verərək cəzalarının yüngülləşdirilməsini istəyiblər.

Hakim Mübariz Zeynalovun sədrliyi ilə keçirilən prosesdə ifadə verən Vüqar Xəlilov bildirib ki, təxminən 7 ilə yaxındır ibadətlə məşğul olur, əsl din yolunu “Əhli sünnə vəl cəmaət” təriqətində gördüyündən həmin təriqətə məxsus “Sələfi saleh” qolunun nümayəndələrinin qıldıqları kimi namaz qılır: “Sumqayıt şəhərində bu təriqətə, daha doğrusu “Əhli sünnə vəl cəmaət” təriqətinə məxsus “Sələfi saleh” qoluna etiqad edən bir neçə şəxs var. Həmin şəxslərlə dostluq edirəm. Həmin şəxslərdən “Hamza” ləqəbli Elşən Musayev, onun qardaşı Ruslan, “Abdullah” ləqəbli Elnur Nəzərəliyev, Razim və digərlərini tanıyıram. Ümumiyyətlə, bir-birimizi görəndə o qədər “əxi-əxi”, yəni qardaş deyirik ki, adlarımızı yadımızda saxlamamışıq. Özüm həmin camaata daxil deyil, lakin camaatın üzvləri ilə sıx əlaqə saxlayıram. Həmin şəxslərin əmiri “Hamza” ləqəbli Elşən Musayevdir, özünün kunyasım isə “Abduləziz”dir”.

“Elçingilin dəstəsi Elşəni döymək üçün axtarırlar”

Vüqar Xəlilovun sözlərinə görə, dekabrın 11-də “Şərq bazarı” adlanan ticarət mərkəzində əmir Elşən Musayevlə əmiri Elçin Əkbərov olan digər camaatın üzvü Elmarın arasında dini mövzuda mübahisə düşüb: “Elmargilin dini baxışlarına görə bir müsəlmanın digər müsəlmanla mübahisəsi düşdükdə müsəlman bununla bağlı hüquq-mühafizə orqanlarına və yaxud məhkəməyə müraciət edərsə, onda həmin şəxs kafir sayılır. Elşən Musayevin isə dini baxışı əks mövqedə olduğu üçün Elmar “Şərq bazarı” adlanan ticarət mərkəzində olarkən Elşəni yumruqla vurub. Lakin orada olan insanlar Elşənlə Elmarı aralaşdırdığından söhbət dekabrın 12-ə qalıb”.

O, qeyd edib ki, dekabrın 11-də, axşam saatlarında Elşəngilin camaatının toplaşdığı Sumqayıt şəhəri 10-cu mikrorayonda yerləşən “Soltan” çay evinə gedib. Onun sözlərinə görə, çay evinə daxil olanda orada bir neçə nəfər şəxsin olduğunu görüb: “Həmin insanlar Elşənin camaatından olub və həmişə olduğu kimi, həmin gün də oraya yığışıblar. Həmin şəxslərin özlərini aparmalarından hiss etdim ki, hamısı məsələdən xəbərdardırlar, ona görə də kefləri yoxdur. Çayxanaya gedəndə Elşən Musayev hələ gəlməmişdi. Elşən məndən bir qədər sonra gəldi. Elşənin yanına gedərək nə baş verdiyini soruşdum. Onun söhbətlərindən hiss etdim ki, Elçingilin dəstəsi Elşəni döymək üçün axtarırlar, ona görə də Elşən həmin şəxslərlə görüşməyə getmək istəyib”.

“Dedi ki, Elşən, başına kaska tax, gəlirik”

Vüqar Xəlilov bildirib ki, Elşənin yanında olan zaman onun telefonuna zəng gəlib və zəng edən Elşənin “Qarabağ” kinoteatrının qarşısına gəlməsini təkid edib: “Lakin Elşən həmin şəxsə “Zaur, mən gəlmək istəmirəm, söhbətiniz varsa, söhbət etmək üçün siz buraya, yəni çayxanaya gəlin”, - sözlərini dedi. Lakin Zaur Elşənə dedi ki, Elşən, başına kaska tax, gəlirik. 5-10 dəqiqədən sonra təxminən 20-25 nəfərə yaxın, bəlkə də çox insanın bıçaq, dəyənək, zəncirlər və lomla silahlanaraq çay evinə gəldiyini gördüm. Həmin şəxslər gələn kimi irəlidə olan Zaur Paşayev “Elşən, sən hələ çox içəridə qalacaqsan” deyərək Elşənin olduğu otağa hücum etdi və açıq-aydın hiss etdim ki, gələn şəxslərin hədəfi yalnız Elşəndir, ya Elşəni maşına basaraq aparmaq və yaxud döymək istəyirlər. Zaura söhbət etməyi təklif etdim. Zaur mənə kənara çəkilməyimi və işinin Elşənlə olmasını dedi”.

“Qumbara partlamasında Elşən və Elnur Nəzərəliyev xəsarət alıblar”

Təqsirləndirilən şəxsin sözlərinə görə, yenidən Zaura söhbət etməyi təklif edib, bu zaman Zaur yumruqla onun baş nahiyəsinə qüvvətli zərbə vurub: “Zərbənin təsirindən yerə yıxıldım. Bu zərbədən sonra aləm bir-birinə qarışdı, kütləvi şəkildə iki dəstə arasında dava düşdü. Hamı özünü qoruduğundan kim-kimi və nə ilə vurduğunu bilmək mümkün olmayıb. Elmarın, Zaurun, Muradın, “İxlas” ləqəbli Zaurun, qəssab Anarın əllərində bıçaq və dəyənəklər, Firudinin əlində qaz balonu olduğunu görmüşəm. Özüm görməsəm də, sonradan uşaqların deməsindən bilmişəm ki, Firudinlə birlikdə Elçin, yəni həmin dəstənin əmiri olan Elçin Əkbərov da idman formasında oraya gəlib. Gördüm Zaur Paşayev, Elmar Məmmədli, Murad Məhərrəmov Elşən Musayevi döyürlər. Bu vaxt çay evinin ümumi zalında dava-dalaş zamanı olarkən Elşən Musayevin əlində əl qumbarasını görmüşəm. Həmin vaxt hücum edənlər Elşəni döyüblər, ona görə də Elşən özünü müdafiə etmək üçün özündə olan əl qumbarasını döyənlərə tərəf çəkərək hücumun qarşısını almaq istəyib. Elşən Musayev özündə olan qumbaranı hücum edənlərə göstərən zaman , həmin şəxslər bayıra tərəf çıxmağa başladı. Bir müddətdən sonra küçədən qumbaranın partlayış səsi gəldi, bundan sonra yenidən avtomat atəş səsləri gəldi. Lakin avtomatdan kimin atəş açdığını görmədim. Sonradan məlum oldu ki, qumbara partlamasından həm Elşən özü, həm də Elnur Nəzərəliyev xəsarət alıblar”.

Digər təqsirləndirilən Elnur Nəzərəliyev bildirib ki, dekabrın 11-də, saat 17.00-da qaynanasıgilə gedib: “Məğrib namazını orada qılmışam. Saat 19.30-da işa namazının vaxtı girsə də, hələ namazı qılmamışam. Arvadım Aytən ürəyi sıxıldığını bildirərək onu gəzmək üçün havaya çıxarmağımı xahiş etdi. Aytən ilə bir qədər küçədə gəzdik. Bu zaman “Hamza” ləqəbi ilə tanınan və bizim camaatının əmiri olan Elşən Musayevin evlərinin qarşısında insanların toplaşdığını gördüm. Orada təxminən 10 nəfərə yaxın adam olub. Həmin şəxsləri görərək həyəcanlandım. Çünki oradan səs-küy gəldi, elə başa düşdüm ki, nəsə hadisə baş verib. Aytəni başqa adla evə qaytardım. Özüm həmin insanlar toplaşdığı yerə getdim. Orada dini baxışlarıma görə həmfikir olan insanların toplumunun üzvlərini gördüm. Həmin şəxsləri rəsmi ad-soyadla tanımasam da ləqəblə tanımışam. Onlardan Abu Ömər, Abu Umeyr və Abu Yunus kunyəli şəxsləri yadımda saxlamışam. Orada olan insanlardan bəzilərini isə birinci dəfə gördüm. Həmin vaxt orada olan insanlara yaxınlaşaraq görüşdüm və hal-əhval tutdum. Onlardan nə baş verdiyini soruşdum. Lakin nəsə baş verməsi barədə bir söz deyən olmadı”.

Elnur Nəzərəliyev daha sonra ifadəsində kütləvi davanın baş verməsində, sonda qanlı cinayətlə nəticələnən hadisədən danışıb. Zərərçəkmiş Elnur Məmmədli qeyd edib ki,

dini ləqəbi “Hamza” olan Elşən Musayevi ibadət etməyə başladıqdan az sonra tanıyıb və onun da əhli sünnə olduğunu, sünni təriqətinin sələf əqidəsində olduğunu bildiyindən sonra onunla əvvəllər normal, yaxşı münasibətləri olub : “Lakin sonradan aramızda soyuqluq əmələ gəlib. Təxminən 3-4 ay bundan qabaq internet vasitəsi ilə dini saytda yerləşdirilmiş Quranın Ən-Nisə surəsinin 60-cı ayəsində olan ayətə əsasən mühakimənin küfr olduğunu yəni, insanı islamdan çıxaran əməl olduğu yazıdlığından mən və digər həm fikirlərim bunu araşdırdıq. Belə qərara gəldik ki, Allahın mühakiməsindən başqa olan bütün məhkəmə prosesləri, yəni hər hansı bir müsəlman hər hansı bir məsələ ilə əlaqədar məhkəməyə müraciət edərsə, bu Allahın ayətinə ziddir və bunu edən müsəlman artıq islamdan çıxmış olur. Bu fikir mən də daxil olmaqla Elçin Əkbərov və digər həmfikirləri tərəfindən qəbul olundu. Bu barədə Elşən və onun həmfikirləri ilə müzakirə apararaq, bu məsələni qəbul etmələrini istədik. Lakin Elşən və onun həmfikirləri bu məsələni qəbul etmədi”.

Elnur Məmmədli bu səbəbdən mübahisə yarandığını, nəticədə də xuliqanlıq və digər ağır hadisələrin baş verdiyini qeyd edib. Digər zərərçəkmişlər Anar Rəhimov, Yusif Eybalıyev ifadə verəndən sonra apelyasiya şikayətinə baxan hakimlər qərar elan edib. Qərara görə, təqsirləndirilən şəxslərin apelyasiya şikayətləri təmin edilməyib.

gundemxeber.az