Administrasiya rəhbərliyi sadəcə millət vəkillərini
deyil, vəzifə və rütbəsindən asılı olmayaraq bütün
məmurları öz nəzarəti altında saxlamaq istəyir

Məlum olduğu kimi, Milli Məclisin Hüquq Siyasəti və Dövlət Quruculuğu Komitəsinin srağagün keçirilən toplantısında Ədalət partiyasının sədri İlyas İsmayılovun təklif etdiyi qanun layihəsi rədd edilib. Məlumat üçün qeyd edək ki, sözügedən qanun layihəsində sahibkarlıqla məşğul olan vəzifəli şəxslərin cinayət məsuliyyətinə cəlb edilməsinin zəruriliyi öz əksini tapırdı.
Layihə müəllifi hesab edir ki, sahibkarlıq fəaliyyəti ilə məşğul olması qadağan edilən vəzifəli şəxslər məlum qadağanı pozduqları təqdirdə 6 aya qədər azadlıqdan məhrum edilməlidirlər. Lakin bəli olduğu kimi, layihə qəbul edilməyib və bundan sonra mətbuata açıqlama verən komitə sədri Əli Hüseynli məlum problemin həlli üçün tələblərə daha yaxşı cavab verən qanun layihəsi hazırlamağın vacibliyini vurğulayıb. Bununla da, vəzifəli şəxslərin biznes fəaliyyətini yasaqlayan qanun layihəsinin qəbulu qeyri-müəyyən vaxta qədər təxirə düşüb.

Vəzifəlilərə biznes yasağı kimin ideyasıdır?

Qeyd edək ki, vəzifəli şəxslərin biznes fəaliyyətinin yasaqlanması ilə bağlı təkliflər bundan öncə də səslənsə də, bu təkliflərin heç biri indiyə kimi reallığa çevrilməyib. Lakin məlum təklifin zaman-zaman gündəmə gəlməsi ideya müəlliflərinin hələ də öz niyyətindən dönmədiyini göstərir. Şübhəsiz, burada söhbət Ədalət Partiyasının sədrindən getmir və yəqin ki, kifayət qədər demokratik bir şəxs olan İ.İlıyasovun bu təklifi öz iradəsi əsasında gündəmə gətirdiyi hər kəsə bəllidir. Burada daha çox məlum ideyanın bundan öncə müxtəlif şəxslər tərəfindən məqsədli şəkildə dilə gətirilməsindən söhbət gedir.
Belə ki, bugünlərdə məlum məsələ ilə bağlı redaksiyamızı məlumatlandıran özəl mənbə, vəzifəlilərə biznes fəaliyyətini qadağan edən ideyanın Prezident Administrasiyasındakı bəzi qüvvələrə məxsus olduğu ilə bağlı məlumat verib. Mənbənin sözlərinə görə, Prezident Administrasiyasının rəhbərliyi bu qanunu qəbul etdirməklə sadəcə millət vəkillərini deyil, vəzifə və rütbəsindən asılı olmayaraq bütün məmurları öz nəzarəti altında saxlamaq istəyir: “Heç kimə sirr deyil ki, bu gün həm parlamentdə, həm də aparıcı vəzifələrdə təmsil olunan əksər şəxslərin böyük biznes şəbəkəsi mövcuddur. Onların çoxu bu biznesi birbaşa deyil, öz yaxınları vasitəsi ilə idarə etsələr də “yuxarılara” kimin hansı sərvətə malik olduğu yaxşı bəllidir. Buna görə də Administrasiya rəhbərliyində təmsil olunan şəxslər hesab edir ki, bu qanunun qəbulu onlara elitanı nəzarətdə saxlamaqla yanaşı, istənilən şəxsə qarşı istənilən zaman təzyiq göstərmək imkanı verə bilər. Belə ki, rəsmiləşdirilməyən qanun layihəsinə əsasən, istənilən şəxsə qarşı qanunu ittiham irəli sürərək onun bu biznesə necə, hansı yollarla sahib olduğunu ortaya qoymaq, həmin vəzifə sahibinə bu müstəvidə basqı göstərmək olar. Ən azından ona görə ki, əksər vəzifə sahibinin bu biznesə qanunsuz üsullarla sahib olduğu bəllidir və bu yöndə aparılan istənilən araşdırma bu biznesin qaranlıq tarixini ortaya çıxarda bilər”.

Mllət vəkilləri niyə “yox” deyir?

Son olaylardan da göründüyü kimi, deputatlar məlum qanun layihəsinin qəbulundə maraqlı deyil. Millət vəkillərinin sözügedən layihəyə “yox” deməsinə səbəb bu ideyanın heç də yuxarılardan, məqsədli olaraq parlamentə təqdim edilməsi deyil. Buna səbəb məlum qanun layihəsinin millət vəkilləri və onların vəzifəli yaxınlarını də hədəf almasıdır. Bundan başqa, Azərbaycan parlamentinin qeyri-demokratik səsvermə yolu ilə, ayrı-ayrı nəhəng məmurların iradəsi əsasında formalaşdığı hər kəsə bəllidir və bu mənada başda Prezident Administrasiyası olmaqla siyasi elitanın ali eşalonunda qərarlaşan şəxslərin millət vəkillərinə kifayət qədər təzyiq imkanı mövcuddur. Məhz bu baxımdan millət vəkilləri onları deputat seçdirən hamilərinə basqı üçün əlavə rıçaq verməyin yolverilməz olduğu qənaətindədirlər. Onların qənaətincə, belə bir qanun layihəsinin qəbulu onları “yuxarılardan” tam olaraq asılı vəziyyətə sala, asanllıqla həbsxana darvazasının astanasına qədər gətirib çxıarda bilər.

Qanun layihəsi parlamentə qayıdacaq?

Məlum ideyanın gündəmə gəlməsi hakimiyyət daxilində nüfuz dairələri uğrunda daxili savaşın alovlanması kimi də şərh edilməkdədir. Redaksiyamızı məlumatlandıran bilgili qaynağın sözlərinə görə, hakim düşərgə daxilində savaş qızışdıqca, mübarizə qaydaları da sərtləşməkdədir və bu mənada hazırda daha böyük güc nümayiş etdirən Administrasiya yetkililərinin məlum ideyanı yeni qanun layihəsi halında yenidən parlamentə qaytaracağı gözlənilir: “KİV-də yer alan məqalələrdən də göründüyü kimi, hakim düşərgə nə qədər monolit görünməyə çalışsa da, əslində düşərgə daxilində ciddi qarşıdurma mövcuddur. Ölkənin bütün sərvətlərini öz aralarında bölüşdürən iri ranqlı məmurlar artıq yeni nüfuz dairələri əldə etmək üçün bir-birlərinin əlindəki sərvəti talamağa məcburdur. Odur ki, Prezident Administrasiyasındakı müəyyən qüvvələr gələcək hücumlarını qanuniləşdirməyə çalışır ki, bu da özünü vəzifəli şəxslərin biznes fəaliyyətinin qadağan edilməsi ideyasında göstərir. Bu baxımdan məlum ideyanın yeni bir qanun layihəsi şəklində yenidən parlamentə qayıdacağı gözləniləndir”.
Şamil Əlibəyli