Əli Abbasov bu qurumun rəhbəri və regional idarələrini tənqid atəşinə tutandan sonra maxinasiyalar öz axarı ilə davam edir; şok mənimsəmə iddiaları “Gündəm-xəbər”də…

Azərbaycanda bütün sektorlar korupsiyaya bulaşıb. Dövlət başçısının rüşvətxorluğa, məmur özbaşınalığına qarşı amansız mübarizəsi və bu istiqamətdə sistemli, ardıcıl tədbirləri davam etsə də, iqtidarın siyasətinə zərbə vuranlar da az deyil. Artıq nazirlərin də çıxışlarında bu detallara rast gəlmək olar.

Məsələn, Rabitə və yüksək informasiya texnologiyalar naziri Əli Abbasov “Aztelekom” və Bakı Telefon Rabitə İstehsalat Birliklərinin (BTRİB)-in fəaliyyətini tənqid atəşinə tutaraq, onlara xəbərdarlıq etmişdi.

Stasionar telefon operatorlarının fəaliyyətini tənqid edən nazir Əli Abbasov mənzillərə telefon və internet xətlərinin çəkilişi zamanı bir sıra qanunsuzluqlara yol verlidiyini demişdi.

Nazir bildirib ki, vətəndaşlardan daxil olan şikayətlər əsasən rüşvətxorluq halları ilə bağlıdır. O, hər bir kiçik hadisənin Baş Prokurorluğun Korrupsiya İdarəsi tərəfindən tənzimləndiyini bildirib.

Əli Abbasovun fikrincə, “Aztelekom” və BTRİB-nin fəaliyyətində digər çatışmazlıq geniş zolaqlı internetin çəkilişi prosesində özəl şirkətlərin fəaliyyətinin az olmasıdır. Bunun səbəbi isə sözügedən qurumların şirkətlər arasında ayrı-seçkilik etməsidir.

“Hansı şirkətlərsə “Aztelekom” və BTRİB -in rəhbərliyi tərəfindən dəstəklənir. Hansısa maraqlara görə bu şirkətlərə daha çox imkan yaradılır. O birisilərə isə yaradılmır. Bilmirəm. Mən sizə axırıncı dəfə deyirəm, bu korrupsiya elementidir. Burada özgətirəlik olmamalıdır”.

Nazir onu da qeyd edib ki, bu cür faktların araşdırılması üçün audit komissiyası yaradılır. Bu komissiya həmin qurumların əhali ilə apardığı danışıqları qeydə alacaq. Bunun əsasında vətəndaşlar tərəfindən daxil olan şikayətlər araşdırılacaq.


***

Başqa bir fakt - Şamaxı rayon Telekommunikasiya Qovşağının kollektivi adından “Aztelekom” İstehsalat Birliyinin rəhbəri Məhəmməd Məhəmmədova ünvanlanmış şikayət ərizəsini xatırlamaqla kifayətdir.

Şamaxı rayon T.K.Q-də neçə illərdir ki, həmin idarənin müdiri Faiq Hümbətovun qanunsuz əməlləri davam edir. F.Hümbətov idarənin dörd yüz min manata qədər vəsaitini qanunsuz yollarla mənimsəyib.

Belə ki, idarənin DSMF-yə, vergi idarəsinə və digər təşkilatlara köçürməli olduğu pullar mənimsənilib. Hətta işçilərdən tutulan gəlir vergiləri də mənimsənilib. İki ildir ki, idarənin bank hesabları bağlanmışdır. İşçilərə verilməli olan rüblük mükafatlar, müalicə xərcləri və 13-cü əmək haqları mənimsənilir. İşçilər hər ay 90 min manata qədər vəsait toplanmasına baxmayaraq, 3 aydan bir əmək haqqı alırlar. İdarənin 30-40 nəfərə yaxın gizli işçiləri var. Son bir ayda 10 nəfərə yaxın işçi işə qəbul olunub. Hümbətovun Qobustan rayonunda “Diri Baba” adlı şirkəti vardır. O, saxta sənədlər tərtib etməklə idarənin vəsaitini həmin təşkilata köçürür və pullar oradan mənimsənilərək götürülür. Bu yaxınlarda Quşçu kəndinə yeni kabel xətti çəkilməli idi. Həmin 20 km xətt satılaraq Hümbətov tərəfindən mənimsənilib. Çıraqlı kəndinə çəkilən kabel xətti xüsusi briqada tərəfindən çəkilməli idi. Hümbətov həmin xətti öz işçilərinə çəkdirərək, onun üçün ayrılmış külli miqdarda vəısaiti mənimsəmişdir.

İdarədə 2 əməkhaqqı “vedomost”u var ki, bunlardan birinə yaxın işçiləri qol çəkib pul götürür, digəri isə karta buraxılır. İdarənin toplanan pulları inkasator vasitəsi ilə banka göndərilməli olduğu halda, qeyri-qanuni kassir ştatı fəaliyyət göstərir”.

***

Daha bir fakta nəzər salaq.

“Mən bu nazirliyin işindən çox narazıyam. Gədəbəyin kəndlərində, həmçinin Şınıx bölgəsində mənə söz verdikləri elektron ATS sona qədər quraşdırılmayıb. İnternet çox zəifdir, mobil operatorların da 3G-si və s. xidməti çox yarıtmazdır. Bir sözlə, nəzarət zəifdir. Ümid edim ki, tezlikcə bu problem həll olunacaq”.

Bunu keçmiş deputat, iqtisadçı Nazim Məmmədov sosial şəbəkədə açılan müzakirədə deyib.

Xatırladaq ki, rayonlarda rabitə sisteminə “Aztelekom” İstehsalat Birliyi nəzarət edir. Bu qurumun rəhbəri isə eyni zamanda, YAP-ın Mərkəzi Nəzarət-Təftiş Komissiyasının (MNTK) sədri Məhəmməd Məmmədovdur.

Onu da qeyd edək ki, M.Məmmədovun "Aztelekom"da ciddi korrupsiyaya yol verməsini az öncə Hesablama Palatası da rəsmi şəkildə bəyan edib. Bundan başqa, nazir Əli Abbasov da bu ilin əvvəlində kollegiyada ona irad tutaraq "yığışdırın rüşvəti", - deyə, barmaq silkələyib. Ancaq görünən odur ki, M.Məmmədov bu günə kimi şikayətlərə məhəl qoymamaqla yanaşı, həm də vəzifəsini də qorumağı bacarıb.

Bəs, onu kim himayə edir? M.Məmmədov YAP MNTK-nin nüfuzlu üzvlərinin hansılarının adından və necə yararlanır? Bu, baş direktora nə kimi təhlükələr vəd edir? Bax, Azərbaycan reallığında əsl araşdırma və sensasiya burdadır.

***

Rabitə və Yüksək Texnologiyaları Nazirliyinin “Aztelekom” İstehsalat Birliyinin baş direktoru Məhəmməd Məmmədov özü də bu neqativ halların mövcudluğunda mühüm rol oynayır.

M.Məmmədov 4 may 2004-cü il tarixdən etibarən «Aztelekom” İB-nin baş direktoru vəzifəsinə təyin edilib. O, bu vəzifəyə qədər Bakı Telefon Rabitəsi İstehsalat Birliyinin baş direktoru olub. Maraqlı məqam odur ki, M.Məmmədov bir deputatın bahalı avtomobil, illik pulsuz yanacaq və digər xərclərinə 100 min manata yaxın pul xərclədiyini “qara mühasibatlıq”da qeyd etdirib. Halbuki, M.Məmmədovun özü də bilir ki, vəzifə səlahiyyətlərindən istifadə edərək, belə bir maliyyə fırıldağına əl atması cinayət xarakterlidir.

O, heç bir halda dövlət vəsaitini istədiyi kimi istədiyi adama xərcləyə bilməz. Amma baş direktor “Aztelekom”un puluna sanki şəxsi vəsaiti kimi yanaşmaqda davam edir. Daxil olan məlumata görə, Məhəmməd Məmmədov 2012-ci ildən başlayaraq, elektron ATS-lər olan bütün kəndlərin optik kabel vasitəsilə transmissiyasının təşkilindən də böyük vəsaitlər əldə eləyib.

Onun “Aztelekom”un illik 150 milyon manatı aşan gəlirlərinin ölkə üzrə klassik telefondan multimedia xidmətlərinə keçid, genişzolaqlı internet xidmətləri, təmir-tikinti və digər investisiya xarakterli layihələr adıyla neçə faizini mənimsəməsini, heç şübhəsiz ki, peşəkar rabitəçilər əla bilirlər.

***

Məlumat üçün bildiririk ki, "Aztelekom” İstehsalat Birliyinin (İB) rayon Telekommunikasiya Qovşaqlarının (TKQ) xidmət ərazisində göstərilmiş xidmətlərin müqabilində əldə olunan gəlirlər 2010-ci ilə nisbətən 2015-ci ilin əvvəlinə 50%-dən artıq olub. Buna baxmayaraq, bu illər ərzində əmək haqları cəmi 10% artırılıb”.

Bununla yanaşı yığılan vəsaitin dövlətə də ödənilmədiyi iddia edilir. Ötən 5 il ərzində həm dövlət qarşısında olan öhdəliklərin, həm də kreditor borcların külli miqdarda artdığı bildirilir. Elə buna görə də, "Aztelekom” İB-də maliyyə durumunun ağırlaşdığı, işçilərə verilməsi nəzərdə tutulan vəsaitlərin kəsildiyi qeyd olunur. Birliyin idarə aparatı tərəfindən digər struktur vahidlərinə köçürülmüş pul vəsaitlərinin təyinatları üzrə istifadəsinə nəzarət edilməyib.

Hazırladı: Rafiq Qara