Əli Abbasov Məhəmməd Məmmədovla Beytulla Hüseynovun yaratdığı problemləri araşdırmağa cəsarət etmir; İşçi qrupu isə olmayan problemi təftiş edir

Rabitə və yüksək informasiya texnologiyalar naziri Əli Abbasovun yanvarda keçirilən kollegiya iclasında nazirliyin tabeliyində olan iki mühim qurumun - “Aztelekom” İB və BTRİB-ın rəhbərlərinə xəbərdarlıq etməsindən sonra yaranan komissiya, əslində, mənasız işlərlə məşğuldur.

Bu barədə “Gündəm Xəbər” qəzetinə daxil olan məlumata görə, həmin müşavirədə nazir Əli Abbasov Məhəmməd Məmmədovun baş direktoru olduğu "Aztelekom”la, Beytulla Hüseynovun rəhbərlik etdiyi Bakı Telefon Rabitə İstehsalat Birliyinin fəaliyyətində rüşvət və korrupsiya faktlarının olmasını açıq etiraf edərək, onlara «özünüzü yığışdırın» ultimatimunu verib:

«Nazir açıq şəkildə bu iki qurumda korrupsiya halının olduğunu dedi və tezliklə komissiya yaradaraq, bunların araşdırılacağını bildirdi. Amma nazir bu iki qurumda korrupsiyanın konkret hansı sahələri əhatə etdiyini demədi. Başqa sözlə desək, nazir «Aztelekom» və BTRİB-in nəzarətində olan internet provayderlərinin rəqiblərinin sıxışdırılmasından söz açdı. Lakin nazirliyin sıravi işçiləri də bilir ki, son iki-üç ildir nazirin qeyd etdiyi problem yoxdur. Yəni istənilən provayder istənilən ATS üzərindən abonentə internet xidməti göstərməkdə sərbəst və rahatdır. O səbəbdən nazir Əli Abbasovun bu sahədə 2-3 il əvvələ qədər mövcud olan problemləri nədən indi qabartması isə maraqlıdır. Görünür, Əli Abbasovun ya nazirlikdən xəbəri yoxdur, ya da o, nə danışdığının fərqində deyil».

Müsahibimizin sözlərinə görə, Əli Abbasov yanvar ayında keçirilən kollegiya iclasından təxminən üç həftə sonra komissiyaya bənzər işçi qrupu yaradıb:

«Həmin qrupun fəaliyyəti haqqında dünən nazir müavini İltimas Məmmədov telekanallarda da danışdı. Onun sözlərindən belə çıxdı ki, işçi qrupu Bakı və rayonlarda martın sonunadək araşdırma aparıb, 2014 və 2015-ci ilin mart ayına qədər olan şikayətləri incələyirlər. Sizə əminliklə deyirəm, nazir müavini ağ yalan danışır. Həmin işçi qrupu nazir Əli Abbasovun internet provayderləri ilə bağlı qaldırdığı məsələni ATS-lərdə olaraq abonentlərin özlərindən sorğu əsasında araşdırmaqla, bir daha bu sahədə hər hansı bir problemin olmadığını təsdiqləyiblər. Yəni nazirin cəmiyyətə açıqladığı sahə

üzrə problem yoxdur. Problem telefon çəkilişlərində, onların qiymətlərindədir».

Məlumatlı şəxs deyir ki, bu gün Bakıda elə ərazilər var ki, kabelləşməyib:

«Bu səbəbdən də oraya telefon çəkilişləri qeyri-mümkündür. Mövcud təlimatlara əsasən, kabelləşmədə 100 metrdən artıq məsafə varsa, bunun xərcini də abonent çəkməlidir. Buna görə bəzən adi telefon çəkilişi 150-200 manatı aşır. Pisi budur ki, bəzən vətəndaş evinə telefon çəkdirmək istəyərkən, həmin ərazidə ümumiyyətlə, bunun mümkün olmadığı üzə çıxır. Ancaq Bakıda fəaliyyət göstərən qovşaq rəsmiləri bunu araşdırmadan abonentdən pulu qəbul edir və aylarla onları süründürür. Sonda isə məcbur qalaraq pulunu geri ödəyirlər. Bunları ona görə xatırladıram ki, nazir Əli Abbasov reklam xatirinə çıxış etməkdənsə, real adımlar atıb, paytaxtın telefonlaşdırılmasını kağız üzərində deyil, real faktlar üzərində həyata keçirsin».

Məlumatlı şəxsin sözlərinə görə, «Aztelekom» və Bakı Telefon Rabitəsi İstehsalat Birliyinin nəzarətində olan provayderlərdə tamam başqa problemlər mövcuddur:

«Yəni nazirin iddia etdiyi kimi, bu dövlət müəssisələri hansısa rəqib provayderi sıxışdırmaq və ya onun bazara girməsinə maneyə yaratmır. Zatən bunların, yəni “Aztelekom”la BTRİB-in nəzarətində olan provayderlər özləri başlarını itiriblər. Məsələn, BTRİB-in nəzarətində olan «Bakinternet» son bir ildir ki, keyfiyyətsiz xidmət göstərir. İdarələr, vətəndaşlar internetin tez-tez kəsilməsinə görə bu provayderdən imtina edirlər. Eyni hal Məhəmməd Məmmədovun nəzarətində olan provayderə də aiddir. Ancaq nə o, nə də Beytulla Hüseynov bu problemi aradan qaldırmaq üçün həvəsli davranmırlar. Hətta mənim bildiyimə görə, daha keyfiyyətli internet xidməti üçün sifarişi verilmiş avadanlığın alınmasının ləngidilməsi də, bu iki məmurun özəl maraqlarından qaynaqlanır. Nazir Əli Abbasov mənasız işçi qrupu yaradıb, cəmiyyətin gözünə kül üfürəcək işlərlə məşğul olmaqdansa, iki ay əvvəl dediyi sözün üstündə duraraq, bunları cəzalandırsın da. Niyə bunu etmir?».

İstər Məhəmməd Məmmədov, istər Beytulla Hüseynovun güclü himayədarlara sahib olduğunu deyən müsahibimiz bu barədə geniş və maraqlı açıqlamalar da verib.

Bu və ya digər məlumatlarla yanaşı, “Azərpoçt”un baş direktoru Qənbər Bəybalayev, hətta bir neçə yaxın qohumu ilə bağlı müdhiş planlarla araşdırmalarımızı növbəti saylarımızı izləyin.

CƏFƏR