Bacısının toyuna gəlmək üçün məzuniyyət götürən əsgər tabutda gətirildi

Sumqayıtda qızına toy etməyə hazırlaşan Bayramovlar ailəsi əsgər olan oğullarına yas çadırı qurdular

Müdafiə Nazirliyinin Göygöl rayonunda yerləşən “N” saylı hərbi hissəsində dəhşətli cinayət hadisəsi baş verib. Cinayəti hərbi hissənin 1-ci taborunun 2-ci bölüyünün 1-ci tağımının 2-ci manqasının komandiri Tural Bəyverdiyev törədib.

Tural Bəyverdiyev 1989-cu ildə Cəlilabad rayonunda anadan olub. Rayonun Privolnoye kəndində qeydiyyatda olan Tural Bəyverdiyev müddətdən artıq xidmət edən hərbi qulluqçudur, rütbəsidə kiçik çavuşdur.

Tural Bəyverdiyev 6 mart 2015-ci il tarixdə, saat 12.00- 12.30 radələrində tağım komandiri, eyni zamanda onun xidmət apardığı döyüş postunun başçısı olan leytenant İqbal Şərbətovun tapşırığına əsasən ailə vəziyyəti ilə əlaqədar qısa müddətli məzuniyyətə buraxılması nəzərdə tutulan, həmin manqada qumbaraatan vəzifəsində xidmət edən əsgər Anar Bayramovun üzərində böyük təyin olunub.

Bacısının toyuna tələsirdi

O, Anar Bayramovu taborun dayaq məntəqəsinə aparmaq məqsədilə postdan birlikdə yola düşüblər. Onlar təxminən 5 saata yaxın 0,8-1 metr hündürlüyündə qarla örtülmüş, enişli-yoxuşlu dağlıq ərazidə yeni cığır aça-aça hərəkət ediblər. Sonra, saat 17 radələrində adət etmədiyi şəkildə uzun müddət hərəkət etmək məcburiyyətində qalaraq taqətsiz vəziyyətə düşməklə hərəkət qabiliyyətini itirən Anar Bayramov yolda gələrkən Tural Bəyverdiyevin istifadəsində olan mobil telefonla təxminən 30-40 dəqiqə ailə üzvləri ilə danışması ilə əlaqədar dayanmalarını irad tutub.

Anar Bayramov qeyd olunan səbəbdən gecikdiklərini, ona görə də yorulduğunu, taborun dayaq məntəqəsinə nəzərdə tutduğu vaxtda çata

bilməyəcəyini, nəticədə hərbi hissədən gec çıxacağına görə bacısının 7 mart 2015-ci il tarixdə Sumqayıt şəhərində keçirilməli olan toy məclisində iştirak edə bilməyəcəyini bildirib. O, acıqlı şəkildə narazılığını ifadə edib, artıq yorulduğundan hərəkət edə bilmədiyini deyib, cığırın kənarında, qarın üstündə oturub.

“Vura bilməzsən, hünərin çatmaz”

Tural Bəyverdiyev bir neçə dəfə Anar Bayramovdan ayağa qalxaraq hərəkəti davam etdirməsini tələb edib. Amma Anar Bayramov hərəkət edə bilmədiyini deyib və ayağa qalxmayıb. Vəziyyəni belə yarandığını görən Tural Bəyverdiyev Anarı qorxutmaq üçün, postdan çıxarkən təhlükəsizlik məqsədilə götürdüyü, özünə təhkim olunmuş AKM markalı avtomat silahını çiynindən çıxarıb və qoruyucunu açaraq “tək-tək” atış rejiminə qoyub. O, silahın lüləsini Anar Bayramovun sifətinə tuşlayıb.

Bu zaman Tural Bəyverdiyev əsgərə “vuraram”- deyə bildirib. Anar Bayramov “vura bilməzsən, hünərin çatmaz” deyə qeyd edib. Tural Bəyverdiyev cavabında deyib ki, göstərərəm, görərsən, çatır-çatmır.

Bundan sonra Tural silahın üzərində olan darağı silahdan ayırıb, darağın içindən üstdəki iki ədəd təlim patronlarını çıxararaq şalvarının cibinə qoyub, içində 28 ədəd döyüş patronu olan darağı yenidən silaha birləşdirib. O, sürgü qolunu çəkərək buraxıb.

Bundan sonra Tural Bəyverdiyev silahı atəş üçün hazır vəziyyətə gətirib. Tural sonra Anar Bayramovun həyatına və yaşamaq hüququna açıq etinasızlıq və hörmətsizlik göstərib.

Belə ki, Tural Bəyverdiyev üstünlüyünü göstərmək üçün özünü Anar Bayramovyun onun tələbinə baxmayaraq ayağa qalxıb hərəkətini davam etdirməməsini, atəş açacağı ilə qorxutduqda isə atəş açmağa hünərinin çatmayacağını deməsinin ona pis təsir edib. Tural Bəyverdiyev bunları bəhanə edərək avtomat silahının lüləsini Anar Bayramovun alnının ortasına tuşlayıb. Bu zaman o, tətiyi basaraq təxminən 1-2 sm məsafədən

bir dəfə atəş açıb. Nəticədə Anar Bayramov aldığı xəsarətdən hadisə yerində ölüb.

18 il cəza

Tural Bəyverdiyev Cinayət Məcəlləsinin 120.2.2-ci (xuliqanlıq niyyəti ilə adam öldürmə) maddəsi ilə ittiham edilib. Gəncə Hərbi Məhkəməsinin hökmü ilə Tural Bəyverdiyev 18 il müddətinə azadlıqdan məhrum edilib. Məhkəmə onun cəzasının ilk 5 ilini həbsxana rejimində, qalan hissəsini isə ciddi rejimli cəzaçəkmə müəssisəsində çəkməsi barədə qərar qəbul edib.

Hökmdən narazı qalan Tural Bəyverdiyevin vəkili Habil Bəhmanov apelyasiya şikayəti verərək, müdafiə etdiyi şəxsin barəsində olan hökmün ləğv edilməsini, ona ədalətli cəza təyin edilməsini istəyib. Vəkilin yazdığı şikayət baxılması üçün Gəncə Apelyasiya Məhkəməsinə göndərilib.

“Məhkəmə işi səthi araşdırıb”

Tural Bəyverdiyevin vəkili Habil Bəhmanov bildirib ki, birinci instansiya məhkəməsi Tural Bəyverdiyevin qeyd olunan ifadəsinə özünü müdafıə xarakteri daşımaq kimi hüquqi qiymət verib. Vıəkilin sözlərinə görə, işin faktiki hallarıı, iş üzrə toplanmış materialları tam tədqiq etmədən ibtidai istintaqın gəlmiş olduğu nəticəni olduğu kimi formal cəhətdən deyil, məzmun cəhətdən anlayış verməli və ittihamın zahiri təzahürlərinin arxasında nəyin durduğunu nəzərdən keçirməli, ittihamın irəli sürülməsi prosedurunun reallıqlarını araşdırmalı olduğu halda bunlara səthi yanaşılıb.: “İş üzrə yeganə istinad olunan ilkin sübut növü Tural Bəyverdiyevin 8-9 mart 2015-ci il tarixlərdə vermiş olduğu ifadələrdir və ittihamın məzmununu da məhz həmin ifadə təşkil edir ki, bu da verilən ittihamın hüquqi tövsüfünü mübahisələndirir. İş üzrə məhkəmənin istinad etdiyi digər şahid ifadələri və ekspertiza rəyləri də vardır. Lakin həmin sübut növlərindən kompleks məhkəmə psixiatrik və psixoloji ekspertizanın rəyi istisna olmaqla, digər sübut növləri Tural Bəyverdiyevin əməlinin subyektiv cəhətini deyil, yalnız əməlin törədilməsini sübut etmə vəzifəsini daşıyır. Qeyd etdiyi kimi kompleks

məhkəmə psixiatrik və psixoloji ekspertizanın rəyi və Tural Bəyverdiyevin ifadəsi isə birbaşa əməlin motivinə təsir edən amillərdir. Bu da ittihamda qeyd olunan xüliqanlıq niyyəti ilə əməlin törədilməsini istisna edən haldır. Göründüyü kimi, məhkəmənin və ibtidai istintaqın istinad etdiyi ittihamın məzmununda xüliqanlıq niyyəti ilə cinayət əməlinin törədilməsi təkzib olunur”.

Vəkil qeyd edib ki, Tural Bəyverdiyevin mərhum Anar Bayramova qarşı hər hansı neqativ hərəkəti olmayıb, ona qarşı əxlaq normalarını pozan, bunlara etinasızlıq və hörmətsizlik ifadə edən, laqeyidlik göstərən hərəkətlər və ifadələr etməyib: “Tural mərhumu mübahisəyə və münaqişəyə sövq edəcək hər hansı nalayiq hərəkəti, ifadəsi olmayıb. Hadisə ictimai yerdə, yaxud digər əsgər yoldaşlarının yanında baş verməyib. Məhkəmə də bu kimi halları, eləcə də, onlar arasında olan münasibəti, mərhumun hadisədən əvvəlki davranışını, cinayətin subyektiv cəhətini təhlil etməyib. Məhkəmə əgər qeyd etdiyim izahat və ifadəni sübut götürürsə, o, zaman nəzərə almalı idi ki, məhz mərhum Anar Bayramovun davranışları mübahisənin qısa zaman içində kəskinləşməsinə, nəticədə nəhayət nəlayiq ifadədən sonra Tural Bəyverdiyevin psixi-emosional durumunun gərginləşməsinə gsəbəb olub”.

“Ədalətli hökm qəbul edilməsini xahiş edirəm”

Habil Bəhmanovun sözlərinə görə, məhkəmənin Tural Bəyverdiyevin hadisə zamanı psixi-emosional vəziyyəti barədə istinad etdiyi kompleks ambulator məhkəmə-psixatrik və psixoloji ekspertizasının rəyindən görünür ki, Tural Bəyverdiyevin cinayət əməli törədərkən psixi-emosional sferasında hirslilik, qəzəbilik əmələ gəlib: “Həmin halın yaranma səbəbləri situasiya ilə əlaqədar olub, psixiemosional durumunda yaranmış hirslilik, qəzəblilik halı Anar Bayramovun ona tabe olmaması, ona qarşı nalayiq ifadə işlətməsi kimi amillərlə şərtləşib. Göründüyü kimi, kompleks ambulator məhkəmə-psixatrik və psixoloji ekspertizasının rəyi də ittihamın hüquqi tövsüfünü mübahisələndirir. Bu da xüliqanlıq niyyəti ilə adam öldürmə cinayət əməlini istisna edir. Bundan başqa iş üzrə bir sıra ziddiyyətli məqamlar vardır. Belə ki, 8-9

mart 2015-ci il tarixlərində alınmış ifadələrdə qeyd olunur ki, Tural Bəyverdiyev atəşdən əvvəl daraqdan götürmüş olduğu təlim güllələrini sonradan izi itirmək məqsədi ilə mərhumun isti gödəkçəsinin cibinə qoyub. Paltarlara baxış protokolundan isə görünür ki, həmin təlim güllələri mərhumun şalvarının yan cibindən aşkar olunub. Bu şübhə də digər sübutlarla aradan qaldırmaq mümkün olmadığı üçün Cinayət-Prosessual Məcəlləsinin 145.3-cü maddəsinə əsasən təqsirləndirilən şəxsin xeyrinə təsfir edilir. Məhkəmə Tural Bəyverdiyevə cəzanın 5 ilini həbsxana rejimində çəkməklə 18 il azadlıqdan məhrumetmə cəzası təyin etməklə onun şəxsiyyətinə də düzgün yanaşmayıb. İş üzrə dindirilən şahid ifadələrindən görünür ki, Tural Bəyverdiyev nizam intizamlı əsgər olmaqla yanaşı, zəhmətkeşliyi ilə də yadda qalıb. Hətta şahidlər onun bu hadisənin törətməsinə belə təəccüblə yanaşıblar. Hadisə vaxtına qədər özünü digər əsgər yoldaşlarından üstünlüyünü nümayiş etdirən hərəkətlər etməyib, ətrafdakılara qarşı laqeyid olmayıb”.

Vəkil bildirib ki, cinayətin Tural Bəyverdiyev tərəfindən törədilməsi halında belə, yaxud məhkəmənin qeyd etdiyi kimi özünü müdafıə kimi təqsirli bilməməsi halında belə ona amansız, qəddar, islah olunmaz bir insan kimi həbsxana rejimi təyin etmək hümanizm prinsipindən tam uzaqdır: “Ona görə də, Gəncə Hərbi Məhkəməsinin hökmünü ləğv edib, Cinayət Məcəlləsinin 120.2.2-ci maddəsi ilə məhkum olunmuş Tural Bəyverdiyev barəsində ədalətli yeni hökm qəbul edilməsini xahiş edirəm”.

Apelyasiya instansiyasında çıxış edən dövlət ittihamçısı Nəsif Nəcəfov bildirib ki, birinci instansiya məhkəməsinin hökmü tam ədalətlidir. Müdafiə tərəfinin ittihamlarına cavab verən dövlət ittihamçısı qeyd edib ki, apelyasiya şikayətində göstərilən dəlillərin heç bir əsası yoxdur. Nəsif Nəcəfov Tural Bəyverdiyevin vəkilinin səsləndirdiyi apelyasiya şikayətini təmin edilməməsini istəyib.

Zərərçəkmiş şəxsin hüquqi varisi Günəş Bayramova bildirib ki, mərhum Anar Bayramov onun oğludur. Günəş Bayramova oğlunu qatilinin cəzalandırılmasını istəyib.

Tərəfləri dinləyən hakim kollegiyası sonda qərar elan edib. Hakim Bədəl Əliyevin sədrlik etdiyi kollegiyanın qərarı ilə Tural Bəyverdiyevin vəkili Habil Bəhmanovun verdiyi apelyasiya şikayəti təmin edilməyib. Tural Bəyverdiyevin barəsində Gəncə Hərbi Məhkəməsinin çıxardığı hökm qüvvəsində saxlanılıb.

gundemxeber.az