Əsabil Qasımovdan prezidentə qarşı ajiotaj – Təfərrüat

Biznesmen deputat un bazarında monopoliya hegemonluğu ilə böhrandan mənfəətlə çıxmağa hazırlaşır; dövlət başçısına bazarda inhisarçılıq yaradanlar barəsində dosye təqdim olunub, “Karat” holdinq rəhbəri seçicilərini seçkidə yada salır

Deputat Əsabil Qasımov un bazarında monopoliya yaradıb. “Gündəm-xəbər”ə verilən məlumata görə, biznesmen parlament üzvü manatın üzən məzənnəyə keçidindən sonra un məmulatlarını kəskin şəkildə bahalaşdırıb.

Ölkə başçısının süni bahalaşmaya gedənlərin cəzalandırılacağı haqda xəbərdarlığına məhəl qoymayan Ə.Qasımovun şirkəti böhrandan mənfəətlə çıxmağı hesablayıb.

Bu da azmış kimi, deputat biznesi olduğunu da ictimaiyyətdən gizlətməyib. Halbuki, deputat mandatı olan şəxsin bizneslə məşğul olması qanunla qadağandır. Onun böyük biznes şəbəkəsinə malik olduğu, bir neçə gəlirli sahəni inhisarında saxlaması artıq heç kimə sir deyil.

Halbuki qüvvədə olan müvafiq qanunvericiliyə görə, millət vəkillərinin, dövlət məmurlarının, vəzifəli şəxslərin şəxsi bizneslə məşğul olmaları qəti qadağandır. Lakin Əsabil Qasımov və onun kimi düşünən digər vəzifə sahibləri, dövlət qulluqçuları hələ də qanunlara məhəl qoymadan biznes fəaliyyətilə məşğul olurlar.

Halbuki millət vəkilinin birbaşa işi, üzərinə düşən əsas vəzifəsi parlamentdə vətəndaşların, seçicilərinin problemlərini, vətəndaşaların sosial narazılıqlarının həllilə məşğul olmaq, həmin problemləri gündəmə gətirməklə dövlətin aidiyyəti orqanların diqqətini onların həllinə yönəltməkdir.

Heç şübhəsiz ki, Əsabil Qasımov bu cür millət vəkillərindən deyil. Elə bu səbəbdən də seçicilər onu millət vəkili yox, məhz deputat adlandırırlar. Çünki Əsabil Qasımov seçicilərin yox, məhz öz şəxsi problemlərini həll etmək üçün deputat mandatına yiyələnib.

Əsabil Qasımovun oğlu Taleh Qasımov tərəfindən idarə olunan "Karat Holdinq" özəl sektorda öz mövqelərini günü-gündən gücləndirir. Bu arada, Əsabil Qasımov isə seçicilərilə maraqlanmır, onların görüşlərinə getmir, bir sözlə, özünü əsl millət vəkili kimi aparmır. Bu səbəbdən də İmişli rayonunda yaşayan və Əsabil Qasımovun seçiciləri olan şəxslər ondan razılıq etmirlər desək, yəqin ki, yanılmarıq.

Bunu həmin seçicilərlə ünsiyyət zamanı dərhal müəyyən etmək olur. Məsələn, seçiciləri iddia edirlər ki, seçkiöncəsi Əsabil Qasımovun tərəfdarları qapı-qapı gəzərək, deputat üçün təbliğat aparsalar da, o, seçki dövründə də şəxsən özü kəndlərə getməyib.

Deputat seçiləndən sonra isə nəinki özü, hətta nümayəndələri belə seçicilərin taleyilə maraqlanmır. Müəyyən məsələlərlə bağlı seçicilər tərəfindən edilən şikayətlərə də deputat tərəfindən heç bir reaksiya verilmir. Özünün və köməkçilərinin telefonları yad nömrələr üçün daim qapalıdır".

Ə.Qasımovun rəhbəri olduğu və oğlu tərəfindən idarə edilən “Karat Holdinq” MMC devalvasiyadan qabaq 18 manata olan 50 kiloluq unu 27,50 manata qaldırıb. Un bazarında panika və hegemonluq yaradan deputatın şirkəti prezidentin tapşırıqlarına qarşı gəlməkdədir.

Ə.Qasımov isə özünə arxayın şəkildə süni qiymət artımına yol veməkdən çəkinmir. Mənbənin sözlərinə görə, dövlət başçısına bazarda inhisarçılıq yaradanlar barəsində dosye təqdim olunub.

Prezidentə çatdırılan materiallarda son hadisələrdən hansı monopolist oliqarx və məmurların sui-istifadə etdiyi haqda faktlar toplanıb. Qaynağımız qeyd edir ki, siyahıda Ə.Qasımovun şirkəti də yer alıb.

Deputatın ölkə başçısının göstərişlərinə əks olaraq addım atması və ağır situasiyada “Kərbəlayı İsmayıl” statusunda olması, sabotajla məşğul olması mərkəzi dairələrin diqqətindən yayınmayıb.

Daxil olan məlumatda iddia olunur ki, ölkə başçısı süni ajiotaj yaradan və kəmfürsətlik edən məmurlar haqda ölçü götürəcək. Ə.Qasımovun un bazarında təşviş yaratması, əhalini çətinə salması və belə vaxtda narazı kütləni aktivləşdirməsi hökumətin iqtisadi siyasətinə xəyanət kimi qiymətləndirilir.

Mətbuat nümayəndələri də Əsabil Qasımovun fəaliyyətini qənaətbəxş hesab etmirlər. Elə bu səbəbdən də əksər media qurumları Əsabil Qasımovun nöqsanlı fəaliyyətini tutarlı arqumentlərlə tənqid edirlər.

Həmin yazılarda deputatın biznes fəaliyyəti, inhisarçılıq meylləri, seçicilərlə təmasdan yayınması, mətbuata qapalı olması və s. bu kimi məqamlar öz əksini tapır.

Bundan başqa, onu da vurğulamaq lazımdır ki, bu gün jurnalistlərin böyük əksəriyyəti Əsabil Qasımovu millət vəkili kimi deyil, məhz iş adamı, bir çox gəlirli biznes sahəsini əlində cəmləməyi bacaran sahibkar kimi tanıyır.

Əsabil Qasımovun adı daha çox biznes qalmaqallarında hallandırılır. Onun deputat kimi, qanunvericilik təşəbbüslərinin irəli sürülməsində, həmçinin parlamentin plenar və komitə iclaslarında aktivliyi müşahidə olunmayıb" deyən məlumatlı şəxs iddia edir ki, Əsabil Qasımov ictimai rəylə hesablaşmayan deputatdır.

Onun hər hansı açıqlamasını, hətta həssas məqamlarda belə bir cümlə şərhini belə eşidən olmayıb. Yəqin o, buna ehtiyac duymur. Çünki başı biznesə qarışdığından digər məsələlərə vaxt ayıra bilmir.

Bundan əlavə, deputat açıq şəkildə bizneslə məşğul olduğunu söyləyib. Onun bu etirafı hüquq-mühafizə orqanları üçün araşdırma mövzusudur. Çünki biznesi olan deputatın işinə baxılmalıdır.

Belə ki, Ə.Qasımov müsahibəsində bunları söyləyib: “Biz unu 27-yə satmırıq. Əvvəla, bütün zavodlar 25.50-26 manata satır. Bu, İqtisadi İnkişaf Nazirliyi ilə razılaşdırılıb, əhalinin vəziyyəti, devalvasiyanın həcmi nəzərə alınıb.

Əslində, baha satılmalıdır, ancaq satılmır. Bəli, un 18.50-yə, yaxud 19 AZN-ə idi. Təbii ki, keyfiyyətindən asılı olaraq. Əvvəllər, yəni 18.50 AZN-i 1.05-ə bölürdük, edirdi 17.60 AZN. İndi bunu 1.56-ya vurmalıyıq - 27.48 olur. Əvvəlki qiymətlə müqayisədə vəziyyət belə olmalıdır.

Bu gün bazar tamamilə açıqdır. Azərbaycanda 30-dan da çox zavod var. O zavodlara da heç kəs mane olmur. Un bazarında monopoliya adında şey yoxdur. Azərbaycanda 30 zavod un istehsal edir. 30 zavod məhsul istehsal edirsə, burda monopoliyadan söhbət gedə bilərmi? Mənim biznesimdə, un istehsalımda nə monopoliya, nə maneə var”.

Əsabil Qasımovun ailə şirkəti olan “Karat Holdinq”ə məxsus Karmen" unları eynilə yeni müəssisədə də istehsal edilir və Gürcüstan bazarında “Karmen”unları alıcılarına çatdırılır: "Lakin sonrakı fəaliyyətində Əsabil Qasımova məxsus un dəyirmanının Gürcüstanda davamlı vergidən yayınmalara yol verdiyi və buna görə də qonşu ölkənin vergi orqanları ilə deputat arasında gərginlik yarandığına dair məlumatlar dolaşmaqdadır.

Bu səbəbdən də Gürcüstanın vergi orqanları bir müddət əvvəl Əsabil Qasımovdan dövlətə ödənilməsi nəzərdə tutulan verginin ödənilmədiyini gördükdə məhkəməyə müraciət edib. Məhkəmə isə deputatın sahibi olduğu şirkətin vergidən yayındığını təsdiqləməklə bərabər, eyni zamanda vergini vaxtında ödəmədiyindən məbləğə cərimə faizləri də tətbiq edilib.

Əsabil Qasımov isə öz növbəsində, Gürcüstan məhkəməsinin çıxardığı qərarı icra etməyib və hələ də qeyd edilən vergini ödəməkdən boyun qaçırır. Bu səbəbdən də Gürcüstanın rəsmi dairələri Əsabil Qasımovun Gürcüstan ərazisinə daxil olmasına qadağan qoyublar.

Əsabil Qasımov hələ ki, oğlunun hansı dairədən namizəd olacağını dəqiqləşdirməsə də, böyük ehtimalla Taleh Qasımovun şəxsi istəyilə namizədliyini məhz Sumqayıtdan verəcək. Artıq heç kimə sirr deyil ki, Əsabil Qasımov beş ilə yaxındır deputat kimi fəaliyyət götərsə də, indiyə kimi aktiv millət vəkilləri sırasında yer almayıb.

Yəni qanunvericilik təşəbbüslərinin irəli sürülməsində və parlamentin beynəlxalq əlaqələrinin qurulmasında hər hansı aktivliyi olmayıb. İctimaiyyətə qapalı olan deputat seçicilərlə də sıx təmas yaratmayıb.

Digər tərəfdən, rəsmi olaraq sahibkarlıq fəaliyyətilə də məşğul ola bilmir. Bu səbəbdən o, qarşıdakı seçkilərdə özünün yox, oğlunun namizədliyini irəli sürmək niyyətindədir. Belə ki, Əsabil Qasımov artıq planlarını reallaşdırmaqdan ötrü bir sıra cəhdlərdə bulunub və əlaqələrini işə salıb.

Deputat biznesi olduğunu qeyd edir və üstəlik, monopoliya yaratmadığını iddia edir. Gəlin baxaq “Karat Holdinq”in tərkibinə hansı şirkətlər daxildir: “Karat” MTK, “İdeal” MMC, “İzmir” MMC (tikinti şirkətləri); “Azinvest” tikinti şirkəti; “Everest-M”, “Şin Servis” (armatur alğı-satqısı); “Karmen” MMC (dəyirman və un alqı-satqısı); Hökməlidə makaron fabriki; Hökməlidə kisə fabriki; “ASTEL” MMC (Məhəmmədi, Mehdiabad və Şamaxıda quşçuluq fabrikləri); taxıl anbarları və dəyirman kompleksləri (Şəkidə, Kürdəmirdə, Marneulidə və Gürcüstanın müxtəlif bölgələrində); “Gəncə Fatoğlu” (un dəyirmanı); Bakı şəhəri, Zərifə Əliyeva küçəsində 18 mərtəbəli iki “Marina Plaza” oteli; Zərifə Əliyeva küçəsində iki mərtəbəli restoran; Bakı şəhəri, Səməd Vurğun küçəsində “Ağ saray” binası; Bakı şəhəri, Xan Şuşinski küçəsi, 12, İmran Qasımov küçəsi 16, Qulu Quliyev küçəsi, 21 və Süleyman Rüstəm küçəsi, 61-də yerləşən 18 mərtəbəli dörd bina; İzmir küçəsi, 7A və 7B-də yerləşən 19 mərtəbəli iki bina; Zərifə Əliyeva küçəsi 53-də yerləşən 23 mərtəbəli bir bina; Süleyman Rüstəm küçəsi 61-də yerləşən “Premium Market” və s.

Bunlar sadəcə bizə məlum olan şirkət, fabrik və binalardır. Lakin deputat Əsabil Qasımovun bunlardan başqa saysız-hesabsız əmlaka və mülklərə də sahib olduğu hər kəsə məlumdur. Bu iddialarla bağlı deputatın mövqeyini dərc etməyə hazırıq.

Rafiq Qara

gundemxeber.az